English | عربی | Kurdî دواهەواڵ
ڕاستەوخۆ  
 
پارێزگاری پێشووی مووسڵ بەتۆمەتی گەندەڵی دەستگیر كرا
2020-10-20 [09:00 AM]

​ZNA – هەولێر


دوای تۆمەتباربوونی بە گەندەڵی كردن و دیارنەمانی 64 ملیۆن دۆلاری حكومەت، دوێنێ پارێزگاری پێشووی مووسڵ دەستگیر كراو دەبرێتە بەردەم دادگا.

رۆژی دووشەممە، دەسەڵاتدارانی عێراق رایانگەیاند: پارێزگاری پێشووی مووسڵ، پاش ساڵ و نیوێک لە راکردن لە تۆمەتی دیارنەمانی 64 ملیۆن دۆلاری پارەی ئاوەدانکردنەوە و هاوکاریی پەنابەرانی شارەکە دەستگیرکراوە.

بەرپرسێکی دەستەی دەستپاکی عێراق، بە ئاژانسی  فرانس پرێسی راگەیاندووە: لە دوای نوقمبوونی بەلەمێک لە نێو رووباری دیجلەدا كە 150 کەس گیانی لەدەستدا، دوێنێ نەوفەل عاگوب پارێزگاری پێشووی مووسڵ کە حکومەت لەپۆستەكەی لای دابوو، دەستگیرکرا.

بەرپرسەکە ئاشکرایکردووە، عاگوب خۆی چووەتە بەردەم دادگا بۆ یەکلاکردنەوەی سکاڵایەکی دیکە، کە لەسەری تۆمارکراوە و بڕیاربووە  بەكەفالەت ئازادبکرێت، بەڵام لەلایەن تیمێکی دەستەی دەستپاکییەوە دەستگیرکراوە، بەهۆی دۆسیەی دیارنەمانی 64 ملیۆن دۆلارەوە.

هەروەها عاگوب لە دوای هەڵهاتنییەوە لە رووداوەکەی مووسڵ، نیشتەجێی هەرێمی کوردستان بووە، کە خاوەنی دەسەڵاتێکی خۆبەڕێوەبەرییە و بەشێکی بەرچاوی بەرپرسان بەئارامگەیەکی باشی دەبینن بۆ خۆیان، بەبێ ترسان لە هێزەکانی حکومەتی فیدراڵی.

دەستەی دەستپاکی، نەوفەل عاگوبی تۆمەتبارکردووە بە گەندەڵی لە پارەی گشتی و دەستتێکەڵاوی لەگەڵ بەرپرسانی ناو پارێزگای نەینەوا، کە بودجەکەی 800 ملیۆن دۆلارە، لە کاتێکدا هەزاران ئاوارەی شارەکە، لە نێو کەمپەکاندا دەژین.

دەستەکە پێشتر رایگەیاندبوو کە تیمێکی ئاستبەرزی پێکهێناوە، بۆ دەستنیشانکردنی چارەنووسی ئەو پارانەی دیارنەماون و ژمارەیەک بەرپرس و فەرمانبەری دیوانی پارێزگاکەی، بەتۆمەتی گەندەڵی و بەفیڕۆدانی پارە، دەستگیرکردبوو.

پارێزگاری پێشووی مووسڵ، هەروەها تۆمەتبارە بە گەندەڵیکردنی زیاتر لە 11 ملیار دینار (9،4 ملیۆن دۆلار) لە پارەی تەرخانکراو بۆ ئاوارەکانی پارێزگای نەینەوا.

پەرلەمانی عێراق دەڵێ، وڵاتەکە ساڵانێکی زۆرە بەدەست گەندەڵییەکی بەربڵاوەوە دەناڵێنێت لە دامەزراوەکانیدا، ئەو گەندەڵییە لە ماوەی 15 ساڵی رابردوودا، بووەتە هۆکاری دیارنەمانی 450 ملیار دۆلار لە بودجەی گشتی وڵات و چووەتە گیرفانی سیاسەتمەدار و خاوەن پرۆژە گەندەڵەکانەوە.

بەپێی رێکخراوی شەفافیەتی نێودەوڵەتی، لە لیستی گەندەڵترین وڵاتانی دونیادا، عێراق پلەی شانزەیەمی جیهانی گرتووە.

 

 

 





ئەم هەواڵە 283جار خوێندراوەتەوە
 
 
ڤیدیۆ گەلەری
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad