English | عربی | Kurdî دواهەواڵ
ڕاستەوخۆ  
 
نێچیرڤان بارزانی: فرسه‌ت سۆفی بە چیرۆكی سەركەوتووی ژیانی وێنەیەكی زۆر جوانی لای هەمووان جێهێشت
2020-11-19 [11:28 AM]

ZNA - هه‌ولێر


 

تەرمی دکتۆر فرسەت سۆفی، پارێزگاری کۆچکردووی هەولێر لە ئەنقەرەوە گەڕایەوە بۆ هەولێر و لە رێوڕەسمێکی شایستەدا لە فڕۆکەخانەی نێودەوڵەتیی هەولێر پێشوازیی لە تەرمەکەی کرا، له‌ وتارێكدا نێچیرڤان بارزانی وتی، دكتۆر فرسەت كەم ژیا، بەڵام ژیانی پڕ لە كار و بەرهەم بوو، بە جوانەمەرگی ماڵئاوایی لێكردین، بەڵام بە چیرۆكی سەركەوتووی ژیانی وێنەیەكی زۆر جوانی لای هەمووان جێ هێشت، نموونەی كارزانی، دەستپاكی، نیشتمانپەروەری و دڵسۆزی و خەمخۆریی وڵات بوو.

کاتژمێر 7ی بەرەبەیانی ئەمڕۆ پێنجشەممە 19-11-2020 تەرمی دکتۆر فرسەت سۆفی، لە نەخۆشخانەی مەمۆریالەوە گواسترایەوە فڕۆکەخانەی ئەسەنبووغا لە ئەنقەرە، لە کاتژمێر 09:30 خولەکی بەیانیش بە فڕۆکەیەکی تایبەت تەرمی دکتۆر فرسەت سۆفی بەرەو فڕۆکەخانەی نێودەوڵەتی هەولێر بەڕێکرا.

لە ڕێوڕەسمی پێشوازیكردنی تەرمی د.فرسەت سۆفی، پارێزگاری هەولێر، لە فڕۆكەخانەی نێودەوڵەتیی هەولێر، سەرۆكی هەرێمی كوردستان لە وتەیەكدا، ئاماژەی بە رۆڵی گرنگی پارێزگاری كۆچكردووی هەولێری دا و ڕایگەیاند بە دڵێكی پڕلەخەمەوە پێشوازی لە تەرمی د. فرسەت سۆفی دەكەین.

ئەمڕۆ پێنجشەممە 19/11/2020، لە ڕێوڕەسمی پێشوازیكردن لە تەرمی د.فرسەت سۆفی، پارێزگاری هەولێر، لە فڕۆكەخانەی نێودەوڵەتیی هەولێر، نێچیرڤان بارزانی، سەرۆكی هەرێمی كوردستان وتارێكی پێشكەش كرد و لە بەشێكی وتەكانیدا، ئاماژەی بەوە كرد، كە دكتۆر فرسەت كەم ژیا، بەڵام ژیانی پڕ لە كار و بەرهەم بوو، بە جوانەمەرگی ماڵئاوایی لێكردین، بەڵام بە چیرۆكی سەركەوتووی ژیانی وێنەیەكی زۆر جوانی لای هەمووان جێ هێشت، نموونەی كارزانی، دەستپاكی، نیشتمانپەروەری و دڵسۆزی و خەمخۆریی وڵات بوو. بە تێكەڵبوونی لەگەڵ خەم و ئازاری خەڵكدا، بە كاركردن بۆ نەهێشتنی كەموكوڕییەكانی بەڕێوەبردن، بووبووە خۆشەویستی ئێمە و هەموو خەڵك.

لە بەشێكی دیكەی وتەكانیدا، ئاماژەی بەوەش كرد، كە دوێنێ سەرۆك بارزانی، نووسی كوڕێكی خۆم لە دەست دا، كەسایەتی و پێكهاتەكانی كوردستان و كونسوڵ و دیپلۆماتكارەكان كە لە هەولێرن، زۆر بەڕێزەوە باسی د.فرسەتیان كرد، زۆر لە خەڵكی هەولێر و كوردستان بە ئەستێرەیەكی ئاسمانی هەولێر وەسفیان كرد.

هەروەها سەرنجی خستە سەر ئەوەش، لە سەروەختی شۆڕشی ئەیلوولدا، ماڵبات و كەسوكاری د. فرسەت لە ناوچەكانی شۆڕشدا ژیاون، گوندی گەزنەی قەزای چۆمان، بۆ خێزانەكانی پێشمەرگە شوێنێكی گرنگ بوون، چونكە خەڵكی گوند و ماڵباتی د.فرسەت سۆفی زۆر هاوكارییان دەكرن و تێكەڵ و یارمەتیدەری شۆڕش بوون، هەر بۆیە گوندەكەیان وەك هەزاران گوندی دیكە لە لایەن بەعسەوە وێران كران و خەڵكەكەی لە ئۆردوگای زۆرەملێی دیانا نیشتەجێ كران.

ئاماژەی بەوەش كرد، بە هۆگریی یەكجار زۆرییەوە بۆ خوێندنەوە، زانینەكەی زۆر لە تەمەنی خۆی زیاتر بوو، بۆیە بە شێوەیەكی زۆر خێرا لە ریزەكانی یەكێتیی قوتابیان و پارتی دیموكراتی كوردستان پێش كەوت. هەروەها بە دەنگێكی زۆریش بووە پەرلەمانتاری كوردستان و لە پەرلەمانیش بە هۆی پسپۆڕییەوە لە یاسادا ڕۆڵێكی بەرچاوی لە نووسین و گفتوگۆ لەسەر یاساكانی پەرلەمان لە خولی رابردوودا هەبوو.

سەرۆكی هەرێمی كوردستان دووپاتیشی كردەوە، كە هەبوونی پەیوەندی لەگەڵ لایەنە سیاسییەكان و هەوڵدانی بەردەوام بۆ خاوكردنەوەی گرژییەكان و تێكەڵاوی لەگەڵ خەڵك، وایان كرد كە ببێتە كەسێكی گونجاو بۆ پارێزگاری هەولێری پایتەخت، لە یەكەم رۆژی دەستبەكاربوونیشیەوە بە چالاكی چووە ناو كارەكانییەوە و سەرپەرشتیی چالاكانەی زۆر پڕۆژەی كرد، بەداخەوە ماوەی كاركردنی وەك پارێزگاری هەولێر زۆر كەم بوو، ئەگەرنا خەڵكی هەولێر و كوردستان كاری بەرچاوتریان لێی دەبینی.

لە بەشێكی دیكەی وتەكانیدا، گوتیشی: د. فرسەت بە منی گوت لەبەر دۆخی دارایی و كەمیی توانای دارایی، ناتوانم، وەك پێویست خزمەتی هەولێر و كوردستان بكەم.

ئاماژەی بەوەش كرد، كە جاری یەكەم پەتای كۆرۆنای بە سووكی گرت و چاك بووەوە، بەڵام ئەمجارە لە كار دایبڕاند تا سەرئەنجام كۆچی دوایی كرد.

مەراسیمی ماڵئاواییکردن لە فرسەت سۆفی، پارێزگاری کۆچکردووی هەولێر





ئەم هەواڵە 316جار خوێندراوەتەوە
 
 
ڤیدیۆ گەلەری
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad