English | عربی | Kurdî دواهەواڵ
ڕاستەوخۆ  
 
ئەوروپییەکان خۆیان بۆ کوتانی بەکۆمەڵ لە دژی کۆرۆنا ئامادە دەکەن
2020-12-17 [07:26 AM]

ZNA ــ هەولێر


                                                                                       
 
لە کاتێکدا ئەڵمانیا یەکێکە لە بەرهەمهێنەرە سەرەکییەکانی پێکوتەی دژ بە ڤایرۆسی کۆرۆنا، بەڵام تائێستا هیچ کام لە وڵاتانی ئەندام لە یەکێتی ئەوروپا، دەستی بەبەکارهێنانی پێکوتە بەرهەمهێنراوەکەی کۆمپانیاکانی 'فایزەر و بایۆنتێک' نەکردووە، ئەوەش سەرکردە ئەوروپییەکانی ناچارکردووە رێوشوێنەکانی داننان بە پێکوتەکەدا خێراتر بکەن.
 
لە دوای بەریتانیا و ویلایەتە یەکگرتووەکانی ئەمریکا، دەوڵەتانی یەکێتیی ئەوروپا رێوشوێنەکانی دوا لێکۆڵینەوەکانی خۆیان چڕدەکەنەوە، بۆ مۆڵەتدان بەبەکارهێنانی پێکوتەی هەردوو کۆمپانیای فایزەری ئەمریکی و بایۆنتێکی ئەڵمانی، ئەمەش لە کاتێکدا پەتاکە لە کیشوەرەکەدا جارێکی دیکە بەفراوانی سەریهەڵداوەتەوە و ئەڵمانیا کەرەنتینەی گشتی راگەیاندووە.
 
حکومەتی ئەڵمانیا، کە یەکێکبوو لە سەرکەوتووترین حکومەتەکانی دونیا لە مامەڵەکردن لەگەڵ بڵاوبوونەوەی پەتای کۆڤید 19، ئێستا کاردەکات بۆ رەزامەندبوونی وڵاتانی ناو یەکێتیی ئەوروپا، بەبەکارهێنانی پێکوتەکە و دەستپێکردنی هەڵمەتەکانی کوتان. ئانگێلا مێرکڵ، راوێژکاری ئەڵمانیا گەشبینی خۆی بەوە پێشاندا، لە سەرەتای هەفتەی داهاتووەوە ئەوروپییەکان هەڵمەتەکانی کوتان دەستپێبکەن.
 
'دەستەی ئەوروپی بۆ چاودێری دەرمان' لە ئەمستردام، ئاشکرایکرد لە 21ی ئەم مانگەدا دوا راپۆرتی خۆی لەبارەی پێکوتە بەرهەمهێنراوەکەی کۆمپانیاکانی فایزەر و بایۆنتێک دەکات. لە کاتێکدا پێشتر بڕیاربوو ئەو راپۆرتە لە 29ی هەمان مانگدا رابگەیێندرێت.
 
سەرچاوە ئەوروپییەکان رەزامەندبوونی دەستە ئەوروپییەکە لەسەر بەکارهێنانی پێکوتەکە بەیەکلابووەوە ناودەبەن، پێشبینیدەکەن بەر لە جەژنەکانی کریسمس هەڵمەتەکانی کوتان لە ئەوروپا دەستپێبکات.
 
یەکێتی ئەوروپا پێوانەی هەرە باڵای رێگەدان بەبەکارهێنانی پێکوتە و دەرمان پەیڕەو دەکات. دەستەی ئەوروپی بۆ چاودێری دەرمان ئاشکرایکردووە، هیچ چاوپۆشییەک لە مەرجەکانی کواڵیتی پێکوتەکەدا ناکەن بۆ رێگەدان بەبەکارهێنانی، تەنانەت ئەگەر ژمارەی تووشبووانی نەخۆشییەکە لە کیشوەرەکەدا، روو لە هەڵکشان بێت.
 
حکومەتی ئەڵمانیا سەرجەم رێوشوێنەکانی بەرپاکردنی هەڵمەتی فراوانی لە وڵاتەکەدا ئامادەکردووە، چەندین دەوڵەتی دیکەش هەمان رێوشوێنیان گرتووەتەبەر و تەنیا چاوەڕێی رەزامەندی کۆتایی دەستەی دەرمانن.
 
رۆژنامەی 'بیڵد'ی ئەڵمانی ئاشکرایکردبوو نووسینگەی راوێژکاری وڵات، گوشاری لەسەر دەستەی دەرمان و دەوڵەتانی یەکێتی ئەوروپاش کردووە، بۆ دەستوبردکردن لە رێگەپێدانی بەکارهێنانی پێکوتەکە، لە کاتێکدا ئەوروپا تا دێ ژمارەی تووشبووانی بەرز دەبێتەوە.
 
ئەڵمانیا و هیچ دەوڵەتێکی دیکەی یەکێتی ئەوروپا، ناتوانن تاکلایەنە رەزامەندی لەسەر بەکارهێنانی پێکوتەکە بدەن، ئەو کارە تەنیا لەدەسەڵاتی 'دەستەی ئەوروپی بۆ چاودێری دەرمان'دایە. بۆیە کاتێک ئەو دەستەیە رەزامەندی لەسەر بەکارهێنانی پێکوتەکە دەدات، کۆی دەوڵەتانی یەکێتییەکە هەڵمەتەکانی کوتانی فراوان دەستپێدەکەن.
 
مێرکڵ کە بڕیاری داخستنی وڵاتی تاوەکو رۆژی 10ی مانگی کانوونی دووەمی داهاتوو راگەیاندووە، داوای لێبووردنی لە ئەڵمانەکان کرد کە ناتوانن ئازادانە کۆببنەوە و ئاهەنگەکانی سەری ساڵ پێکەوە بکەن، ئەوەشی خستەڕوو، لە مانگەکانی کانوونی دووەم و شوباتی داهاتوودا، مەترسییەکانی پەتاکە زۆر پەرەدەسێنن، لە کاتێکدا لە کۆی هەر 100 هەزار دانیشتووی ئەڵمانیا، وەک مێرکڵ گوتوویەتی، 200 کەسیان تووشی کۆرۆنا بوون





ئەم هەواڵە 622جار خوێندراوەتەوە
 
 
ڤیدیۆ گەلەری
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad