2020-12-20 [07:21 AM]

وەزیری دەرەوەی ئەمەریکا لەچاوپێكەوتنێكی تەلەفزیۆنیدا رایدەگەیێنێت، وڵاتەکەی دەتوانێت بەبێ ناردنی هێزێکی زۆر بۆ رۆژهەڵاتی ناوەڕاست و شوێنەکانی دیکە ئامانجەکانی بپێکێت.

مایک پۆمپەیۆ، وەزیری دەرەوەی ئەمەریکا لە چاوپێکەوتنێکیدا لەگەڵ میدیای وڵاتەکەید گوتی: سیاسەتەکانی دۆناڵد ترەمپ لە بەرەنگاربوونەوەی هەڕەشە دەرەکییەکان سەرکەوتوو بووە، هەروەها ئەمریکا دەتوانێت هێز و توانای خۆی لە ناوچەکە نیشانبدات بەبێ ئەوەی پێویست بە ناردنی هێزێکی زۆر بکات و ژیانی سەربازان بخاتە مەترسییەوە.

وەزیری دەرەوەی ئەمەریكا لەچاوپێكەوتنەكە کوشتنی قاسم سولەیمانی بەنموونە هێنایەوە و گوتی، کە بینیمان قاسم سولەیمانی، فەرماندەی فەیلەقی قودسی سوپای پاسداران هەڕەشەیە کوشتمان، هەروەها کاتێک داعش خەریکبوو ببێتە هەڕەشە بۆ سەر ئەمریکا، واشنتن بە هاوبەشی لەگەڵ هێزە لۆکاڵییەکان لە عێراق و سووریا لەناویبرد.

ترەمپ بڕیاری دا، تاوەکو ناوەڕاستی کانوونی دووەم هێزەکانی لە ئەفغانستان لە 5000 سەرباز بۆ 2500 سەرباز کەمدەکاتەوە، لە عێراقیش لە 3000 سەرباز 500 سەربازیان دەگەڕێنەوە ئەمریکا.