2020-12-22 [03:35 AM]

وتەبێژی بەڕێوەبەرایەتیی بەرگریی شارستانیی سۆران رایگەیاند، تەنھا لەم چەند رۆژەی رابردوودا بەھۆی شۆرتی کارەباوە چەندین دوکان و ماڵی ھاووڵاتییانی سنوورەکەمان سووتاون.

 موقەدەم بەیار باڵەکی، وتەبێژی بەڕێوەبەرایەتیی بەرگریی شارستانیی سۆران، بە ئاژانسی ھەواڵی زاگرۆسی راگەیاند: سنووری بەڕێوەبەرایەتییەکەمان ھەر چوار قەزاکانی سۆران و مێرگەسۆر و چۆمان و رواندز، لەخۆ دەگرێت، کە لە سەرجەم قەزا و ناحییەکانی سنوورەکەمان بنکەی بەرگریی شارستانیی کراونەتەوە، بۆ ئەوەی لە ھەر رووداوێکی لەناکاودا بتوانن بە زووترین کات فریای ھاووڵاتییان بکەون و کۆنترۆڵی بکەن.

وتەبێژی بەڕێوەبەرایەتیی بەرگریی شارستانیی سۆران گووتی: بەداخەوە ئێستا بەتایبەت دوای ھاتنی سەرما و سۆڵە رووداوەکانی ئاگرکەوتنەوە روویان لە زیادبوون کردووە، کە چەندین دوکان و ماڵی ھاووڵاتییان سووتاون، تەنانەت رووداوی ئاگرکەوتنەوە لە دامودەزگاکان و بارەگا حیزبییەکانی دەڤەرەکەش ھەبووە، زۆربەی ئەم رووداوانەش بەھۆی شۆرتی کارەبا بوون و زیانی زۆری ماددی بەر ھاووڵاتییان کەوتووە.

 ھەروەھا موقەدەم بەیار باڵەکی، وتەبێژی بەڕێوەبەرایەتیی بەرگریی شارستانیی سۆران ئەوەشی بۆ ئاژانسی ھەواڵی زاگرۆس خستەروو، کە بەکارھێنانی سۆپا و ئامێرەکانی خۆگەرمکردنەوە و خراپیی کوالێت و بێباکی بەشێک لە ھاووڵاتییان، ھۆکاری سەرەکی بووە کە ببێتە ھۆی ئاگرکەوتنەوە لە ماڵ و دوکان و شوێنەکانیان، بۆیە ئەرکە ھاووڵاتییان پابەندی ڕێنوێنییەکانی بەرگریی شارستانیی بن و ماوە ماوە پشکنین بۆ ئامێر و تۆڕی کارەبایی ماڵ و دووکان و شوێنەکانیان بکەن، ھەروەھا لە کاتی خەوتن و چوونەدەر لە ماڵەکانیان سۆپای کارەبایی و ئامێرەکانی خۆگەرمکردنەوە بکۆژێنەوە، لەگەڵ ئەوەشدا ئەم شوێنانەی کە ئەم ئامێرە خۆگەرمکەرەوانەی لێ دادەنێن، دڵنیا بن لەوەی کە مەترسیی ئاگرکەوتنەوەیان لەسەر نییە.

رێباز یونس