English | عربی | Kurdî دواهەواڵ
ڕاستەوخۆ  
 
ئەمڕۆ پەرلەمانی ئیسرائیل هەڵوەشایەوە
2020-12-23 [08:21 AM]

ZNA- هەولێر


 بەرەبەیانی ئەمڕۆ چوارشەممە پەرلەمانی ئیسرائیل هەڵوەشایەوە و بڕیاردرا مانگی ئاداری داهاتوو هەڵبژاردنی پێشوەختە بکرێت, كە ئەمە چوارەم هەڵبژاردنە لەماوەی دووساڵدا.

لە کۆبوونەوەی درەنگانی شەوی رابردوو و بەرەبەیانی ئەمڕۆ پەرلەمانی ئیسرائیل بڕیاری هەڵوەشانەوەی خۆی پەسەندکرد  بەهۆی هەڵوەشانەوەی هاوپەیمانییەکەی ناتنیاهۆ و گانتز،  بڕیاردرا لە 23ـی مانگی ئاداری ساڵی داهاتوو، هەڵبژاردنێکی دیکەی پێشوەختە بکرێت کە دەبێتە چوارەم هەڵبژاردن لەماوەی دوو ساڵدا.

ئووری میکائیل، گوتەبێژی پەرلەمانی ئیسرائیل بە فرانس پرێسی راگەیاند: هەتاوەکو نیوەشەوی رابردوو، ئەو هاوپەیمانییە کاریدەکرد بۆ تێپەڕاندنی بودجە، "بەڵام شکستهێنانیان  بووە هۆی ئەوەی پەرلەمان هەڵبووەشێتەوە"،

هاوپەیمانییەکەی پارتی لیکود بەسەرۆکایەتی ناتانیاهۆ و پارتی شین و سپی بەسەرۆکایەتی بێنی گانتز ماوەی چەند هەفتەیەک بوو رووی لە داڕمان بوو، بەهۆی بێمتمانەیی و لێکتێنەگەیشتن

پێشتر گانتز، وەزیری بەرگری رایگەیاندووە ئەو هەرگیز متمانەی بە ناتانیاهۆ نەبووە، بەڵام (بەستنی هاوپەیمانی لەگەڵ پارتەکەی) بۆ ئەوە بوو، ئیسرائیلییەکان ناچار نەبن بۆ چوارەم جار هەڵبژاردن بکەن لەکاتێکدا پەتای کۆرۆنا بڵاوە.

بەپێی رێککەوتنی هەردوولا، ناتانیاهۆ دەبوو بۆ ماوەی 18 مانگ سەرۆک وەزیران بێت و دواتر لە مانگی نۆڤەمبەر، گانتز شوێنی بگرێتەوە.

هۆکاری سەرەکیی ناکۆکییەکەش ئەوە بوو گانتز داوای دەکرد حکومەت بودجەی 2020 و 2021 تێبپەڕێنێت، "بۆ ئەوەی ئیسرائیل و هاوپەیمانییەکەیان لە دۆخێکی جێگیر بن"، بەڵام ناتانیاهۆ رەتیکردەوە بودجەی 2021 پەسەند بکرێت.

رەخنەگرانی ناتانیاهۆ دەڵێن ئەوە تاکتیکی ناتانیاهۆ بوو بۆ ئەوەی هاوپەیمانییەکە بە ناجێگیری بمێنێتەوە و نقوومکردنی حکومەتەکەی ئاسان بێت بۆی پێش ئەوەی ناچاربێت دەسەڵات بە گانتز بدات.

 





ئەم هەواڵە 241جار خوێندراوەتەوە
 
 
ڤیدیۆ گەلەری
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad