2021-01-17 [11:03 AM]

ئەندامێکی لێژنەی دارایی پەرلەمانی کوردستان رایدەگەیەنێت، پێش دەست پێکردنەوەی وەرزی بەھارەی پەرلەمانی کوردستان، حکوومەتی ھەرێمی کوردستان پرۆژەیاسای بودجەی ٢٠٢١ رەوانەی پەرلەمانی کوردستان دەکات.

ئەرشەد حسێن لۆلانی، ئەندامی لێژنەی دارایی پەرلەمانی کوردستان، بە ئاژانسی ھەواڵی زاگرۆسی راگەیاند: بڕیارە پێش مانگی سێ و دەست پێکردنی وەرزی بەھارەی یاسادانان، حکوومەتی ھەرێمی کوردستان پرۆژەیاسای بودجەی ٢٠٢١ی ھەرێمی کوردستان رەوانەی پەرلەمان بکات.

ھەروەھا ئەرشەد حسێن لۆلانی، ئەندامی لێژنەی دارایی پەرلەمانی کوردستان ئەوەشی بۆ ئاژانسی ھەواڵی زاگرۆس خستەروو، کە لە ١ی ٣ی ٢٠٢١، وەرزی بەھارەی یاسادانان دەست پێدەکاتەوە و ئەولەویەتی کارەکانیشیان بۆ تیپەڕاندنی پڕۆژەیاسای بودجە دەبێت.

مەسرور بارزانی، سەرۆکی حکوومەتی ھەرێمی کوردستان، ھەریەک لە وەزارەتەکانی دارایی و ئابووری و پلاندانانی ڕاسپاردبوو، بۆ ئامادەکردنی پڕۆژەیاسای بودجەی ٢٠٢١ی ھەرێمی کوردستان، لە چوارچێوەی ھەنگاوەکانی کابینەی نۆیەمی حکوومەتی ھەرێمی کوردستان بۆ شەفافیەت و چاکسازی لە داھات و خەرجییەکاندا.

رێباز یونس