English | عربی | Kurdî دواهەواڵ
ڕاستەوخۆ  
 
دەڤەرا ئاکرێ یا ھاتیە ژ بیرکرن
2021-02-15 [10:59 AM]

نڤیسینا : فەرزندە زبه‌یر زێباری


ئاکرێ ئێک ل کەڤنترین باژێرێن کوردستانێ یە کو دیرۆکا وێ دزڤریتەڤە لسەر دەمێ چەرخێ تەباشیری و بەرییا زایینێ ب (٧٠٠) ساڵان و ل سالا ١٨٧٧ ێ ژی بوویە قەزا واتە کەڤنترین قەزایە ل سەر ئاستێ ھەرێما کوردستانێ، دەڤەرەکا پێکڤە ژیانا ئولی و نەتەوەیی یە وھەردەم ژی خەلکێ ڤێ دەڤەرێ ھەلگرێ ھەستا نەتەوەیی و نیشتمانی و وەلاتپارێزی بوویە، رولەکێ دیار و بەرچاڤ ژی ھەبوویە د بزاڤا رزگاریخوازا کوردستانێ دا و نەمازە دشۆرشا مەزنا ئەیلولێ و گولانا پێشکەفتنخواز و کلیلا سەرھلدانا بھارا پیرۆز یا سالا (١٩٩١) بوویە ل دەڤەرا بادینان ول بەرەڤانیکرنێ ژی ھەردەم دسەنگەرێن بەرخودانێ دابووینە و ھەتا نھۆژی زێدەتر ل (١٠٠٠) شەھیدان داینە و ب سەدان ژی بریندار و پەککەفتی ھەنە و ل شەرێ دژی تیروریستێن داعش ژی (١٤٨) شەھید داینە .
لێ مخابن کو ھەر ل پشتی سەرھلدانا بھارا سالا ١٩٩١ێ و دامەزراندنا حکومەتا ھەرێما کوردستانێ وەکو پێدڤی خزمەت و پرۆژێن خزمەتگوزاری پێشکێشی ئەڤێ دەڤەرێ نەھاتینە کرن سەرەرای گرنگیا ئەڤێ دەڤەرێ ژ ئالیێن جوگرافی و ئابوری و سیاسی و ....ھتد کو نەک ب تنێ گرنگی پێ نەھاتیەدان بەلکو سنورێ کارگێری یێ وێ ژی ھاتیە دابەشکرن مینا جوداکرنا بەردەرەش و ھەروەھا  چەندین گوندێن سنورێ  کارگێری ئەڤێ قەزایێ بو قەزایێن دی ھاتینە ڤەگوھاستن وەکو گوندێن زێباریێن دەشتازێ بو قەزا ئامێدیێ و گوندێن رەخێ  نزارێ زێبارێ بو قەزا مێرگەسۆرێ .
دیسان ل دەمێ دابەشکرنا بودجەیێ پارێزگەھا دھوک ل سەر قەزایێن وێ تایبەتمەندیا قەزا ئاکرێ ل بەرچاڤ نەدھاتە وەرگرتن کو ھژمارا ئاکنجیێن وێ زێدەترن ل (٢٥٠٠٠٠) دووسەدوپینجەە ھزار کەسان وپانیا عەردێ وی ژی دبیتە (٦٤٨٠)کم٢ و (١,٠٤٧,٦٢٢)دونەمێن عەردێ چاندنێ ھەیە وئەڤە ژی فاکتەرەکە کو ب ڤی رێژەیا بودجەی وەکو پێدڤی خزمەتا دەڤەرێ نەھێتە کرن و پرۆژێن خزمەتگوزاری یێن پیشەسازی وکشتوکالی وچاندنێ و گەشتوگوزارێ ...ھتد لێ بھێنە ئەنجام دان .
ئەگەر ئەم ب وژدان ڤە بەراوردەکێ ڤێ قەزایێ دگەل قەزایێن دی یێن سەر ب پارێزگەھا دھوکێ ڤە بکەین دێ بومە دیار بیت ژ لایێ جێبەجێکرنا پرۆژەیان ڤە  قەزایا ئاکرێ نەھاتیە بەرچاڤ وەرگرتن مینا قەزایێن دی کو ئەڤە ژی جھێ داخێ یە .
لەوما پێشنیار دکەین و بۆ بەرژەوەندیا گشتی و ب ئەرکێ خو ژی دزانین کو داخازێ ل جھێن پەیوەندیدار بکەین کو ب چاڤەکێ بلندتر بەرێ خۆ بدەنە ئاکرێ تاکو ھیچ دەرگەھەکێ بو چ لایەن و دەستێن خراپ ڤەنەبن وخەلکێ کوردپەروەرو دلسۆز ھەربمینن لسەر ھەستا خو یا کوردایەتیێ و پابەندبن ب گەل و وەلاتێ خوڤە لەوما ب پێدڤی دزانین و داخازدکەین :
١- یا خویایە کو ل سالا (١٩٩٩)ێ بریارا پەرلەمانێ کوردستانێ دەرچوویە بو ب پارێزگەھبوونا ئاکرێ لەوما جێبەجێکرنا ڤێ بریارێ ھیڤی و ئومێدا خەلکێ ئاکرێ یە چونکی ئاکرێ یا دناڤبەرا دوو پارێزگەھێن کوردستانێ ڤە کو ئەو ژی دھوک و ھەولێرن کو بجھکرنا ڤێ دێ بیتە ئاسانکرنا برێڤەچوونا کاروبارێن ھاولاتیان ژھەمی ئالیەکێ ڤە و دیسان پتر خزمەتکرنا ھاولاتیان و بجھگەھاندنا پرۆژەیێن خزمەتگۆزاری .
٢-  داخازدکەین سنورێن کارگێری ڤی قەزایێ ئەوێن کو ھاتینە ڤەقەتاندن بو سەر قەزایا ئامیدیێ ل پارێزگەھا دھوک و مێرگەسۆر ل پارێزگەھا ھەڤلێر بھێتەڤ زڤراندن کو جارەکا دی بکەڤنەڤە سەر ئاکرێ، ژلایەکێ دی ڤە لدویڤ سیستەمێ نوی یێ ھەلبژارتنا خەلکێ ئەڤان دەڤەرێن ڤەقەتیایی ل ئاکرێ نکارن دەنگێ خو بدەنە بەربژێرێن قەزا ئاکرێ .
٣- بودجەیەک ل دویڤ رێژەیا ئاکنجییان و رووبەرێ عەردێ وێ بۆ ئاکرێ بھێتە تەرخانکرن چونکە دیارە پێشێلکارییەک ل ڤێ قەزایێ ھاتیە کرن وھیچ دادوەرییەک د دابەشکرنا بودجەی دا نەبوویە .





ئەم هەواڵە 10210جار خوێندراوەتەوە
 
 
ڤیدیۆ گەلەری
ئه‌سپێك ره‌دووی ئه‌مبولانسێك ده‌كه‌وێت كه‌ برایه‌كه‌ی له‌ناودایه‌
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad