English | عربی | Kurdî دواهەواڵ
ڕاستەوخۆ  
 
مەكتەبی سیاسی پارتی دیموكراتی كوردستان كۆچی دوایی هەڤاڵی تێكۆشەر (د. ڕۆژ نوری شاوەیس) ڕادەگەیەنێت
2021-02-15 [12:52 PM]

ZNA_ هەولێر


 

 بە داخ و پەژارەیەكی زۆرەوە هەواڵی كۆچی دوایی هەڤاڵی تێكۆشەر (د.ڕۆژ نوری شاوەیس) ئەندامی مەکتەبی سیاسی پارتیمان رادەگەیەنین، کە ئەمڕۆ دووشەممە ١٥ـی شوباتی ٢٠٢١ بە نەخۆشی لە ھەولێری پایتەخت دڵە گەورەکەی لە لێدان کەوت. بەو بۆنە خەمناكەوە پرسە و سەرەخۆشی خۆمان ئاراستەی خانەوادە و تێكۆشەرەكەیان و سەرۆك بارزانی و ئەندامانی مەكتەبی سیاسی و ئەنجوومەنی سەرکردایەتی و کادیر و هەڤاڵانی پارتیمان دەكەین.

 هەڤاڵی خوالێخۆشبوو (ڕۆژ نوری سدیق عەلی) ناسراو بە (د.ڕۆژ نوری شاوەیس) لە ساڵی(1947) لە خێزانێكی ناسراو و تێكۆشەری شاری سلێمانی لە دایك بووە، (نوری شاوەیس)ی باوکی كەسایەتییەكی دیار و نیشتیمانپەروەری ئەو دەڤەرە و ئەندامی مەكتەبی سیاسیی پارتیمان  بووە، هەروەها (ناهیدە شێخ سەلام)ی دایكی ئافرەتێكی ناسراو و كۆڵنەدەر بووە و ئەندامی كۆمیتەی ناوەندیی پارتیمان بووە و رۆڵی ئەو خانەوادەیە لە بزووتنەوەی ڕزگاریخوازیی گەلەكەمان و ھەردوو شۆڕشی مەزنی ئەیلوول و گوڵان مایەی شانازی و پێزانینە. 
 خوالێخۆشبوو (د.ڕۆژ نوری شاوەیس)لە ساڵی (1962)پەیوەندیی بە ڕیزەكانی هێزی پێشمەرگەی كوردستان كردووە و، ساڵی(1971) كۆلێژی ئەندازیاریی زانکۆی موسڵی تەواوكردووە، پاشان بڕوانامەی ماستەر و دكتۆرای لە ئەندازەی كارەبا لە وڵاتی ئەڵمانیا وەرگرتووە و هەمان ساڵ بۆتە ئەندامی لقی شەشی ئەوروپای پارتیمان.

(د.ڕۆژ نوری شاوەیس)كەسایەتییەکی رۆشنبیر و ناسراوی گەلەكەمان بووە، لەساڵی(1979)لە (كۆنگرەی نۆیەم) ی پارتیمان وەك ئەندامی كۆمیتەی ناوەندیی هەڵبژێردراوە و، لە شۆڕشی گوڵان قارەمانانە بەشداری چەندین داستان و بەرخۆدانی مێژوویی كردووە.
 خوالێخۆشبوو جگە لەوەی پێشمەرگەیەكی خەباتگێڕ و ماندوونەناس بووە، رۆڵێكی دیار وكاریگەریی رۆشنبیری و سیاسی و جەماوەریشی هەبووە، وەك مامۆستا بەشداری چەندین خولی سیاسی و رۆشنبیریی پێگەیاندنی كادیرانی كردووە. لە ساڵی(1983)بۆتە ئەندامی مەكتەبی سیاسی پارتیمان، هەروەها لە ساڵانی(1987-1988)وەك فەرماندەیەكی سەربازی بەشداری و فەرماندەیی چەندین شەڕی دژی رژێمی داگیرکەر كردووە لەوانە داستانی خواكوڕك، کانی ماسی، دیرەلوک و بامەڕنێ. ھەروەک لە شەڕی دژی تیرۆرستانی داعش وەکو فەرماندەیەکی ئازا و چاونەترس رۆڵی گرنگ و کاریگەری لەناو سەنگەرەکانی بەرگریدا گێڕاوە.

خوالێخۆشبوو(د.رۆژ نوری شاوەیس) لە کاری سیاسیدا، كەسایەتییەكی رۆشنبیر و چالاك و دیپلۆماتكارێكی ناسراو و خودان رۆڵێکی کاریگەربوو لە دانوستاندنەکان لە پێناو یەکڕیزی و رێکخستنەوەی نێوماڵی کوردستانی و، لە ژیانی پارتایەتی و سیاسی و حكومیدا چەندین لێپرسراویەتی لە ئەستۆ گرتووە و نوێنەرایەتی دەیان شاندی حزبی و حكومی كردووە، لەوانە: ئەندامی ئەنجوومەنی نیشتیمانیی كوردستان(خولی یەكەم)ساڵی (1992)، ساڵی(1993)جێگری سەرۆكی ئەنجوومەنی وەزیران(كابینەی یەکەم و دووەم)،   لەساڵی(1996)بۆتە سەرۆكی ئەنجوومەنی وەزیران(كابینەی سێیەم)لە ساڵی(1999)بە سەرۆكی ئەنجوومەنی نیشتیمانیی كوردستان هەڵبژێردراوە، ساڵی (2003) جێگری سەرۆک کۆمار و لە (2005)یش بۆتە جێگری ئەنجوومەنی وەزیرانی عیراقی فیدراڵ، لەساڵی(2010) لە (كۆنگرەی  سێزدەهەم)بە ئەندامی ئەنجوومەنی سەركردایەتی و مەکتەبی سیاسی پارتیمان هەڵبژێردراوەتەوە و، ھەمان ساڵ بۆتەوە جێگری سەرۆكی ئەنجوومەنی وەزیرانی حكومەتی فیدراڵ. 

خوالێخۆشبوو سەرکردە و كادیرێكی دێرینی دڵسۆز و وەفاداری رێبازی بارزانی بوو، جگە لەوەی بەشداری لە هەردوو شۆڕشی مەزنی ئەیلوول و گوڵانی پێشكەوتنخواز كردووە، لە ڕاپەرینە شكۆدارەكەی گەلەكەشماندا رۆڵی بەرچاوی هەبووە. لە سۆنگەی ئەو خەبات و تێكۆشانە نەپساوەیدا لە ساڵی (٢٠١٠) میدالیای (بارزانی نەمر ) ی پێ بەخشراوە.
 
دووبارە پرسە و سەرەخۆشی خۆمان دووپات دەكەینەوە و ئومێدەوارین خانەوادەی تێكۆشەری خوالێخۆشبوو(د.رۆژ نوری شاوەیس)لە خەم و ئازار و كۆستی دیكە بە دوور بن و جێگای هەڤاڵی كۆچكردوویشمان بەهەشتی بەرین بێت...

انا للە وانا الیە راجعون

مەكتەبی سیاسی
 پارتی دیموكراتی كوردستان
١٥ـی شوباتی ٢٠٢١





ئەم هەواڵە 292جار خوێندراوەتەوە
 
 
ڤیدیۆ گەلەری
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad