English | عربی | Kurdî دواهەواڵ
ڕاستەوخۆ  
 
نێچیرڤان بارزانی:کێشەی ھیچ نەتەوە و پێکھاتەیەکی عێراق نابێتە مایەی سەرکەوتن بۆ پێکھاتەیەکی دیکەی عێراق، بەڵکو لێکەوتەی خراپی دەبێت بۆ ھەموو پێکھاتەکانی
2021-02-21 [02:20 AM]

ZNA - ھەولێر


سەرۆکی ھەرێمی کوردستان لە رێوڕەسمی "شەھیدی نیشتمان" لە ھەولێر باسی لە پێکەوە کارکردنی عێراقییەکان بۆ داھاتوویەکی باشتر کرد، ئاماژەی بەوەکرد، کێشەی ھیچ نەتەوە و پێکھاتەیەکی عێراق نابێتە مایەی سەرکەوتن بۆ پێکھاتەیەکی دیکەی عێراق، بەڵکو لێکەوتەی خراپی دەبێت بۆ ھەموو پێکھاتەکانی. گوتیشی، "ئێمە ئامادەین گفتوگۆی راشکاوانە بکەین بۆ راستکردنەوەی پرۆسەی سیاسیی عێراق". 
 

رێوڕەسمی "شەھیدی نیشتمان" لە ھەولێر بەبۆنەی ١٨ـەمین ساڵیادی شەھیدکردنی محەممەد باقر حەکیم بەڕێوەچوو، کە عەممار حەکیم، سەرۆکی رەوتی حیکمەی نیشتمانی و ھاوپەیمانیی عێراقیون ئامادەی بوو. نێچیرڤان بارزانی، سەرۆکی ھەرێمی کوردستان لە گوتارەکەیدا رایگەیاند، کێشەی سەرەکی عێراق لەسەرەتای دامەزراندنییەوە "نەبوونی شەراکەت و ھاوبەشی بووە لەنێوان ھەموو پێکھاتەکانی عێراق دا لە بەڕێوەبردنی عێراق دا، لەبەرئەوەش عێراق لەسەرەتای دامەزراندنییەوە بەبێ کێشە نەبووە". 
 
سەرۆکی ھەرێمی کوردستان دەڵێت "ئێمە ئامادەین بۆ ئەوەی دەست بە گفتوگۆیەکی جیددی راشکاوانە بکەین بۆ راستکردنەوەی پرۆسەی سیاسی و بەڕێوەبردنی عێراق، لێرەشەوە لەو یادە پیرۆزەدا ئەو بانگەوازە ئاراستەی ھەموو لایەنە عێراقییەکان دەکەین کە دەستپێبکەین".
 
نێچیرڤان بارزانی لەبارەی کێشەکانی عێراق رایگەیاند، "ھەردوو پێکھاتەی عەرەبیی عێراق کە سوننە و شیعەن، دەزانن ھیچ یەکێکیان بەتەنیا و ھەردووکیشیان بەبێ کورد ناتوانن ھاوسەنگی دروست بکەن، لەبەرئەوەش ھاوبەشی ھەموو پێکھاتەکانی عێراق لە بەڕێوەبردنی عێراق دا تاکە رێگەیە بۆ بەڕێوەبردنێکی سەرکەوتووانەی عێراق. ھەر ئەوەش تاکە رێگەیە بۆ حوکمێکی مەدەنی خزمەتگوزار کە ھاووڵاتیانی عێراق دڵخۆش بکات". 
 
لەبارەی سەقامگیریی و پێشکەوتنەکان لە ھەرێمی کوردستان، سەرۆکی ھەرێمی کوردستان گوتی، سەقامگیری و پێشکەوتن و ئاوەدانی ھەرێمی کوردستان دەبێ مایەی دڵخۆشی بێت بۆ ھەموو لایەنە سیاسییەکانی عێراق، چونکە ئێمە بەشێکین لە عێراق. ئەو پێشکەوتنەی ھەرێمی کوردستان پێشکەوتنی بەشێکی عێراقە و بۆ ھەموو عێراقییەکانە. ھەروەک چۆن پێشکەوتن و ئاوەدانی نەجەف و کەربەلا و بەسرە و ئەنبار و تکریت پێشکەوتنە بۆ ھەرێمی کوردستان. 





ئەم هەواڵە 214جار خوێندراوەتەوە
 
 
ڤیدیۆ گەلەری
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad