2021-02-28 [04:27 AM]

ئەندامێکی لیژنەی پەروەردە و خوێندنی باڵای و توێژینەوەی زانستی پەرلەمانی کوردستان، کە لە رێگەی ھەمواری یاساوە، گۆڕانکاریی لە سیستەمی زانکۆ ئەھلییەکاندا دەکرێ، کە دەبێت بە ھۆی دا بەرزکردنەوەی کوالێتیی خوێندن لەو زانکۆیانە.

دکتۆر زێدان برادۆستی، ئەندامی لیژنەی پەروەردە و خوێندنی باڵای و توێژینەوەی زانستی پەرلەمانی کوردستان، بە ئاژانسی ھەواڵی زاگرۆسی راگەیاند: بە ئامانجی بەرەوپێش بردنی سیستەمی خوێندن و بەرزکردنەوەی کوالێتییەکەی، ھەمواری یاسای زانکۆ ئەھلییەکان ئامادە کرا و خوێندنەوەی یەکەمیشی بۆ کراوە، بۆ زیاتر دەوڵەمەندکردنی ھەموارەکە و وەرگرتنی سەرۆکی زانکۆ ئەھلییەکان، بڕیارە لە رۆژانی ھەفتەی داھاتوودا کۆبوونەوەیەکی فراوان لەگەڵ سەرۆکی زانکۆ ئەھلییەکان ئەنجام بدەین.

ئەندامی لیژنەی پەروەردە و خوێندنی باڵای و توێژینەوەی زانستی پەرلەمانی کوردستان گووتی: دوای وەرگرتنی بۆچوونی سەرۆکی زانکۆ ئەھلییەکان و شارەزایانی بوارەکە، ھەمواری یاساکە ئامادە دەبێت و دەخرێتە بەرنامەی کاری کۆبوونەوەکانی داھاتووی پەرلەمان بۆ ئەوەی خوێندنەوەی دووەمی بۆ بکرێت پاشان دەنگی لەسەر بدرێت.

ھەروەھا دکتۆر زێدان برادۆستی، ئەندامی لیژنەی پەروەردە و خوێندنی باڵای و توێژینەوەی زانستی پەرلەمانی کوردستان ئەوەشی بۆ ئاژانسی ھەواڵی زاگرۆس خستەروو، کە چەندین گۆڕانکاری لە سیستەمی خوێندن زانکۆ ئەھلییەکاندا دەکرێت، لەوانەش چۆنییەتی وەرگرتنی قوتابییان و سیستەمی دەوامکردن، بۆ بەرزکردنەوەی ئاستی  زانستی و تێگەیشتنی قوتابییان.

رێباز یونس