English | عربی | Kurdî دواهەواڵ
ڕاستەوخۆ  
 
لەبارەی ژنانەوە. تێڕوانینی ئێمە و ئەوان
2016-04-04 [12:22 PM]


ئازا حەسیب قەرەداخی


لە پرۆسەكانی ئەنفالی بەدناودا، بەعسییەكان كچان و ژنانیان لە پیاوان جیاكردنەوە و تا ئێستا بە تەواوی نەزانراوە چییان لێ كردوون.

ئایا هەموویان كوشتوون یان بازرگانییان پێوە كردوون و لە بازاڕی سەرمایەداران و سەرەك عەشرەتەكانی عەرەبدا وەكو سەبایا فرۆشتوویانن.

داعشی سوننە مەزهەب، كە تێكەڵەیەكە لە قەومەچی عەرەبی شۆفێنی و ئیسلامی سەلەفی جیهادی فاشی، ژنان و كچانی كوردی لە شنگال بە دیل گرتن و وەكو سەبایا بەسەر جەنگاوەرەكاندا دابەشی كردن.

ئەوانیش جگە لە دەستدرێژی و تێركردنی هەوەسە وەحشییەكانی خۆیان، هەروەها لە بازاڕەكانی موسڵ و رەققە بازرگانییان پێوە كردن.

پەرلەمانتارێكی شیعە مەزهەب لە رەوتی سەدر تەنیا لەبەر جیاوازیی راو بۆچوون لەبارەی كەیسی حكوومەتی عێراق و هەڵوەشانەوە و پێكهێنانەوەی، بە ژنە پەرلەمانتارێكی كوردی ئێزيدی گوت؛ ئێوە دەبێ بكرێنە سەبایا بۆ مانگرتووەكانی دەوروبەری ناوچەی سەوز لە بەغدا. هەر یەك لەمانە لقی جیان لە یەك ئەسڵ كە بڕوای تەواوی بەوەیە، ژنانی كورد دەستكەوتی غەزان و بە كەنیزە بردنیان حەڵاڵە و بەشێكی دانەبڕاوه لە بنچینەی فیكر و عەقیدە و باوەڕ و جیهاد.

بزووتنەوەی رزگاریخوازی گەلی كوردستان، بزاڤێكی تەواو و تەنیا سیاسی نەبووە، بەڵكو كۆمەڵایەتیش بووە كە ئامانجی رزگاركردنی ژنان بووە لە پەلاماری ئەم لق و جۆرە غەزاكەرانە. بۆیە، یەكێك لە بناغە هەرە گرنگەكانی ئەم بزووتنەوەیە دانانی بناغەكانی دادپەروەری و هاوشانێتی ژنانە لەگەڵ پیاوان وەكو دوو ستوونی پایەداربوونی كۆمەڵگا و سستمی سیاسی و ئابووری و گەشەكردن.

لە قۆناغی شۆڕشی پێشمەرگایەتیدا رۆڵی ژنان بەرچاو و گرنگ بووە گەرچی سنووردار بووە. وەلێ، هەمیشە ئاسۆی كرانەوەی زیاتر بەسەر ئازادی و بەشداری ئافرەتاندا، لە فیكر و كردەوەدا مەیسەر و فەراهەم بووە. ئەگەر فشاری نەریتە كۆمەڵایەتییەكانی دژی ژنان و بەها و پێوەرە تەقلیدییەكان و فشاری بەشێك لە پیاوانی ئایینی و حزبە ئیسلامییەكان نەبوونایە، ئێستا پرسی ئافرەتان زۆر لە پێشتر دەبوو، جێی شایستەی خۆیشی لە پرۆسەی بە دیموكراتیكردنی كایە جیاجیاكان، بە باشی دەكردەوە.

سەڕەڕای ئەو هەموو خورافات و گوتارە سیاسییە - كۆمەڵایەتییەی كە بانگخوازە ئیسلامییەكان لە مینبەرە جیاجیاكانەوە دژی ئافرەتان بەرپایان كردووە، بەڵام ئیرادەی ئازادی و یەكسانی و دادپەروەری پاشەكشەی نەكردووە. لە شوێنی خۆشیدا نەچەقیوە، بەڵام سست و لاواز بۆ پێشەوە هەنگاو دەنێ.

بۆیە، ئەركی سیاسی و رۆشنبیری و مەدەنیمانە كە وێڕای پشتیوانی هەروەها ببینە داینەمۆی بەره‌و پێشەوە چوونی.

شەڕی ئێمە لە دژی تیرۆر هەڵگری هەموو توخمەكانی شەڕە لەگەڵ فیكر و كردەوە و ئەخلاقی كۆنەپەرستانەی دژی ژنان. بۆیە جگە لە پیاوان، ئافرەتانی كوردستانیش لە سەنگەری رووبەڕووبوونەوەی وەحشییەكانی داعش و هاوفیكرەكانیانن. بۆ نموونە شەڕڤانانی ژن لە رۆژئاوا داستانی مەزنیان لەم بوارەدا تۆمار كردووە.

ژنان جگە لەوەی پێشمەرگەیەكی قارەمانن، هەروەها مۆتەكەی ئەخلاقی و مانەوین بۆ چەتەكانی داعش. چونكە تیرۆریستان لەو باوەڕەدان كە ئەگەر بەدەستی ژن بكوژرێن ناچنە بەهەشت و جیهادەكەیان پیس و بەتاڵ دەبێتەوە.

لە ماوەی دوو ساڵ شەڕ لەگەڵ داعشدا، لە هەرێمی كوردستان پێشمەرگە ژنەكان بەشداریی شایانی باسیان كردووە. لە شنگال و بەرەكانی دیكەی جەنگدا شەهید و برینداریان بەخشیوە. پرۆسەی ئامادەكردنی ژنان بۆ جەنگی تیرۆر، لە ئایندەدا سەردەكێشێ بۆ دامەزراندنی بنەمای پتەو بۆ بەشداری ئافرەتان لە هێزە چەكدارەكان بەگشتی و هێزی پێشمەرگە بەتایبەتی. هەروەها ئەو بەشدارییەی ئێستا هەیە لە سلكی پۆلیس و زێرەڤانی و ئاسایش و پێشمەرگەدا، نەك هەر بەهێزتر دەكات، بەڵكو پایەدارتر و كاریگەرتر دەكات تا ئەو رادەیە كە ژنان لە پێگەكانی بڕیاری هێزە چەكدارەكانی كوردستاندا شوێن دەكەنەوە.

لە مەراسیمی دەرچوونی 201 ئەفسەری ئافرەت لە ئاكادیمایی لەشكریی زاخۆ، سەرۆكی ھەرێمی كوردستان و فەرماندەی گشتیی ھێزە چەكدارەكانی كوردستان، ڕایگەیاند، ئومێدمان پێتانە هاوشانی براكانتان خەبات بكەن و قارەمانێتی نیشانی جیهان بدەن. وڵاتمان لەبەردەم مەترسیی تیرۆریستان دایە، كوڕ و كچانمان گیانی خۆیان بۆ پاراستنی خاك و نیشتیمان بەخت دەكەن.

لە بەرەكانی جەنگیشدا جیاوازییەك لە نێوان نێر و مێدا نییە. ئەم ئەركە لەگەڵ هەڵكشانی بارودۆخەكە لە خزمەتی سەربەخۆیی كوردستاندا، بێگومان سەر دەكێشێ بۆ بەشداری هاوبەشانەی كچان و كوڕان لە پتەوكردنی ستوونەكانی باڵەخانەی سەربەخۆیی. ئەوەش ئومێد و چاوەڕوانی هەموومانە.





ئەم هەواڵە 3019جار خوێندراوەتەوە
 
 
ڤیدیۆ گەلەری
ببینە ھاندەرانی بەرازیل چۆن بەرد بارانی ھەڵبژاردەکەیان دەکەن
وانەی وەرزش لە ژاپۆن
به‌ ڤيديۆ.. جيهانى ئه‌مڕۆمان چى به‌سه‌ردا هاتووه‌
سەیرترین رووداوەکانى ھاتووچۆ
كوشتنی به‌رێوه‌به‌ری پاسه‌پۆرتی پارێزگای بابل
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad