English | عربی | Kurdî دواهەواڵ
ڕاستەوخۆ  
 
دوای داعش، تیرۆر سەرھەڵدەداتەوە؟!
2016-04-11 [12:49 PM]

نووسین: ئازا حەسیب قەرەداخی


ھێشتا، کە شەڕی جیھانی ئازاد بەگشتی و ھەرێمی کوردستان بەتایبەتی، لەگەڵ داعش بەردەوامە، ئەم پرسیارە ئیلحاحمان لێ دەکات: ئایا پاش تێکشکاندنی داعش لە عێراق و شام، ئەگەری سەرھەڵدانەوەی گرووپی تیرۆریست و توندڕۆی ھاوشێوەی داعش چەندە و چۆنە؟!

(مەسرور بارزانی) راوێژکاری ئەنجوومەنی ئاسایشی ھەرێمی کوردستان لە دیدارێکیدا لەگەڵ تەلەفزیۆنی Viceی ئەمەریکیدا دەڵێ: ئەگەر کێشەکانی ناوچەکە لە رەگوڕیشەوە چارەسەر نەکرێن، لەوانەیە لە ئایندەدا گرووپی ھاوشێوەی داعش دەربکەوێتەوە.

ئەم پێشبینییە، لەسەر بناغەی تێڕوانین و حیسابکردن بۆ ھۆکارەکانی سەرھەڵدانی کولتوور و رەفتاری توندوتیژی لەم ناوچەیەدا دامەزراوە. ھۆکارەکانیش کۆمەڵایەتی و ئابووری و سیاسی و ئایینی- مەزھەبین.

لە عێراقدا دوای رووخاندنی رژێمی بەعس، سوننەکان خۆیان خستە پەراوێزی پرۆسەی سیاسییەوە و لاتەریک وەستان و نیازیان بوو بە بەرخودانی میللی "حکوومەت و دەسەڵاتی داگیرکاریی ئەمریکا و ھاوپەیمانەکانی"!! بڕووخێنن و جارێکی دیکە ھەژموونی سیاسی سوننە بونیات بنێنەوە. ئەم شەڕە بووە زەمینەی لەبار بۆ ھاتنی رێکخراوی ئەلقاعیدە و تەحویل بوونی ناوچە سوننەنشینەکان بۆ موڵگەی تیرۆریستان کە دواجار ئەوەندەی لە سوننەکانیان کوشت زۆر زیاتر بوو لەوانەی لە شیعەیان کوشت. بۆیە عەشایەری سوننە لەگەڵ ئەمریکییەکان و حکوومەتی عێراق ھێزی سەحوەیان پێکھێنا و قاعیدەیان لەناوبرد.

بەڵام چەوسانەوەی شیعە بۆ سوننە و پەراویزخستن و غەدری زۆر لێیان لەلایەن حکوومەتەکەی مالیکییەوە وای کرد رێکخراوی داعش لەناویاندا پەیدا بێت. کەواتە تا حکوومەتێک لە بەغدا بێت "شەراکەت" قبووڵ نەکات و پێی وابێ مادەم شیعە زۆرینەیە و دەبێ حوکمڕان بێ و بەشی ئەوانی دیکە بدات وەکو "بەشدار"، ھۆکار و زەمینەی دروستبوونەوەی توندوتیژی و تیرۆر ھەردەمێنێ.

تا حکوومەتێک لە بەغدادا بێت لە بری لەشکرێکی نیشتمانی،حەشدی شەعبی لەو ناوچانەی لەدەست داعش ئازاد دەکرێن، باڵادەست بکات و ئەوانیش خەڵکەکەی لەسەر ناسنامە و نەتەوە بکوژن و بچەوسێننەوە و راگوێزن، ئەوا ھۆکار و بیانووی سەرھەڵدانەوەی داعشێک و قاعیدەیەکی دیکە ھەردەمێنێ.

کە بە پێی داتاکانی وەزارەتی پلاندانانی عێراق، رێژەی ھەژاریی لە عێراقدا " بە بێ ھەرێمی کوردستان" تا کۆتایی ساڵی پار ٣٠%ی تێپەڕاندبێ.

کە رێژەی بێکاریی"بە بێ ھەرێمی کوردستان" تا کۆتایی پار، ٢٥%ی تێپەڕاندبێ. کە لە وڵاتانی عەرەبیدا ٣٣ ملیۆن کەس لە خوارووی ھێڵی ھەژارییەوە بن.

کە کوشتن و سەربڕین و راگواستن لەسەر ناسنامە و ناو و مەزھەب پەیڕەوێکی رۆژانە بێ. واتە لە عێراق و ناوچەکەماندا کەرەستەی خاوی کارکردنی کارگەی بەرھەمھێنانی تیرۆر و توندوتیژی ھەر دەمێنێ.

لە ھەرێمی کوردستانیشدا، سەرەڕای ئەوەی کە بەڵگەکان دەیسەلمێنن تیرۆر بەرھەمێکی کوردستانی نییە و لە دەرەوە بەگشتی و بە تایبەتیش لەو وڵاتانەوە بۆمان رەوانە دەکرێن کە نیشتمانی کوردستانیان داگیرکردووە، بەڵام بە شێوەیەکی رێژەیی کۆمەڵگای ئێمەش بێ بەش نییە لە بەگەڕخستنی ئەو کارگە مەترسیدارە.
کاتێک حزب و کەسانی ئیسلامەوی دەست لەگەڵ ئەجندای گوماناوی دژی کوردستانیی تێکەڵ دەکەن، واتە دەبنە داینەمۆی جموجوڵی توندڕۆیی دژی میللەتەکەمان.

کاتێک بانگخوازێک دەڵێ وەرگرتنی ئیقامە لە ئەوروپا و وڵاتانی کافر حەرام و کوفرە. لەسەر ئەو بنەمایەی کە گوایە پێغەمبەر (د.خ) فەرموویەتی: نابێ موسڵمان دراوسێی نەسارە و یەھود، واتە کافران بێ و دەبێ ماڵی موسڵمان ئەوەندە دوور بێ لەوانەوە کە رووناکی ئاگریان نەبینێ، ئەوە ئەم بانگخوازە کولتوور و ھوشیاری دژی ھەموو غەیرە موسڵمانان بڵاودەکاتەوە و دەبێتە ھەڕەشە لەسەر بنەماکانی پێکەوەژیانی ئاشتەوایی کە کۆمەڵگای کوردستانی پێناسراوە و بۆتە شانازی بۆی لە ناوچەکە و جیھاندا.

کاتێک "مەلا کرێکار" ھاوار دەکات؛ پێویست ناکات ھەموو جارێ بۆ کوشتنی پارتییەک یان یەکێتییەک بگەڕێنەوە بۆ من فەتواتان بدەمێ، بیانکوژن و ئەجرەکەی مسۆگەر بکەن، کەواتە فەتوای کوشتن کراوەیە. خۆ ئەگەر مەلا کرێکار بڵێ ئەوە چەند ساڵ پێشتر وتوومە، دەبێ وەڵام بدرێتەوە کە ئیبن تەیمیە و سەید قوتب و ئەوانی دیکەیش بە ھەزار ساڵ و چەندین ساڵ پێشتر فەتوایان داوە یان لێکدانەوەیان کردووە، بەڵام ئێستا دەقاودەق بەکاردەھێنرێنەوە بۆ شەرعییەت دان بە کوشتن و سەربڕین.

کاتێک نەورۆز بە جەژنی کافران دادەنرێ و ھاوار بۆ موسڵمانان دەکرێ بەشداری لە ئاھەنگەکانی نەورۆزدا نەکەن، کەواتە مافی ئەوەیشیان دەدرێتێ کە تێکی بدەن و ئەوانەی بەشداری تێدا دەکەن تەکفیر بکەن.

کاتێک مەلایەک بڵێ لەبەرکردنی پانتۆڵ لەلایەن ئافرەتەوە کوفر و حەرامە، واتە ھانی کولتوور و رەفتاری توندوتیژ دەدات بەرامبەر ژنان.

کاتێک مەلایەک زانکۆکانی کوردستان بە " رووتکۆ" وەسف دەکات واتە ھانی کولتووری نەخوێندنی ئافرەتان و داخستنی زانکۆکان بە رووی ئافرەتاندا دەدات و لەناو زانکۆشدا کوڕان بە گژ کچاندا دەکات چونکە ئەوە کچەکانن رووت بوونەتەوە.
تا ئەم ھۆکارانە و سەدانی تریش لە ئارادابن، واتە کارگەی دروستکردنی فیکر و رەفتاری توندوتیژی و تیرۆر ھەر دەمێنێ. شەڕکردن لەگەڵ تیرۆر و توندڕۆیی تەنیا سەربازی و ئەمنی نییە. بەڵکو شەڕێکی کولتووری و ئابووری و سیاسی و کۆمەڵایەتی و پەروەردەییشە. جا کە ئێمە خەریکی بیناکردنی کوردستانێکی سەربەخۆین، کەواتە دەبێ سیاسەت و بەرنامەی شەڕی توندڕۆییمان لەو ھەموو بوارانەدا ھەبێ.

واتە لە ریشەوە ھۆکارەکانی دروست بوونی تیرۆر ھەڵکێشن. لە سەرچاوەکانیانەوە فیکری توندڕۆیی لەناوببەین. پێکەوەژیان بە گیان بپارێزین. ژنانمان بکەینە بەشێکی راستەقینە و کاریگەر لە مەنزومەی حوکمڕانی و یاسادانان و پێشمەرگە و بەرگری و چەندین ھەنگاوی دیکە بۆ بنەبڕکردنی سەرچاوەکانی گەندەڵی ئیداری و ئابووری بنێین. سیاسەتێکی روونمان ھەبێ بۆ گەشەکردنی ھەمەلایەنە و پێشکەشکردنی خزمەتگوزاری و بەرەنگاربوونەوەی ئەگەرەکانی زیاتر بوونی رێژەی ھەژاری و بیکاری و بەلاڕێدا بردنی پرۆسەی خوێندن و پەروەردە.





ئەم هەواڵە 2821جار خوێندراوەتەوە
 
 
ڤیدیۆ گەلەری
خەونی ھەمو ئافرەتێک , کەسێکی ئاوای ھەبێت
ھەڵوێستێکی جوانی محەمەد سەڵاح
خاڵ بەدەستھێنان ئاوا دەبێت
زۆر خراپ دەکەوێتە خوارەوە
لە قافا گیرا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad