English | عربی | Kurdî دواهەواڵ
ڕاستەوخۆ  
 
حه‌وت ساڵ خه‌بات، هه‌گبه‌یه‌كی به‌تاڵ!
2016-06-05 [01:10 AM]

نووسینی: هاوده‌نگ فاروق


له‌ ( 25/7/2009 ) که‌سیان له‌ مه‌ریخه‌وه‌ دانه‌به‌زیبوون، به‌ڵكو هیچیان غه‌ریب نه‌بوون، خاوه‌ن مه‌قام و پله ‌و پایه‌ و كورسیی ده‌سته‌ڵات و، جێگری سكرتێری گشتی، مه‌كته‌ب سیاسی، سه‌ركردایه‌تی، فه‌رمانده‌ و وه‌زیر و وه‌كیل و پارێزگار و لێپرسراوی مه‌ڵبه‌ند و قایمقام و مدیر ناحییه‌ بوون.


به‌ڵام، له‌و ڕۆژه‌وه‌ی‌ هاتوون، له‌ ئاوی لیخندا ڕاو‌ده‌كه‌ن، سیاسه‌تی هه‌ڵهاتن و بازدان به‌سه‌ر كێشه‌كاندا جێبه‌جێده‌كه‌ن، به‌ ناوی ڕیفۆرمی سیاسی و چاكسازیی ئیداری هاتن و، خۆڵیان له‌ چاوی خه‌ڵك كرد، دروشمی خه‌ڵه‌تاندن و فرتوفێڵیان به‌رزكرده‌وه‌!


ئێمه‌ هه‌ر زوو وتمان، ئاخر ئێوه‌ش هه‌ڵتۆقیوی نێو ئه‌م كه‌لتوور و كۆمه‌ڵگایه‌ن، هه‌مان په‌روه‌رده‌ ‌و نه‌ریتی سیاسی و حزبی له‌ ناخ و عه‌قڵ و دڵتاندا چه‌سپیوه‌، به‌شدارن له‌ گه‌نده‌ڵی و خواری و خێچییه‌كانی وڵات، کەچی ته‌خوینیان ده‌كردین . ئیدی، ئه‌و نیقاشه‌ له‌ نێوان ئێمه‌ و ئه‌واندا به‌رده‌وامی هه‌بوو، تا چاره‌نووسی بزووتنه‌وه‌ی گۆڕان و ڕۆژی گۆڕانخوازانیان به‌م ئاخیره‌ته‌ گه‌یاند.


وتمان، ئه‌مانه‌ به‌ ناوی گۆڕانخوازییه‌وه‌، به‌رنامه‌یان ته‌نها دروشمه‌بازی و بزواندنی عاتیفه‌ی خه‌ڵكی ناڕازی و فریودانی عه‌وامه‌، وتیان: نه‌خێر خۆتان لاده‌ن ئه‌یگۆڕین!.
وتمان به‌ردی گه‌وره‌ نیشانه‌ی نه‌هاویشتنه‌، وتیان: سیسته‌می سیاسی ده‌گۆڕین و ده‌ستوورێكی مه‌ده‌نی و حكوومه‌تی خه‌ڵك دروستده‌كه‌ین..


وتمان سه‌رده‌می (بژی و بڕووخێ) نه‌ماوه‌، وتیان، ئێمه‌ ده‌ستی (حزب له‌ ناو حكوومه‌تدا ده‌بڕین!!) كه‌چی ده‌ستی حكوومه‌تیان بڕی و په‌رله‌مان وحكوومه‌تیان به‌ حزبی كرد..


وتمان: ئه‌وانه‌ عاشقی دوو ئیداره‌یی و ئۆباڵی لێكترازان و دابه‌شكاریی سیاسی و ناوچه‌گه‌ریێتی و تێكدانی یه‌كڕیزیی لایه‌نه‌ سیاسییه‌كانی كوردستانن .


وتیان نه‌خێر ئه‌مانه‌ داهێنه‌ری چاکسازین.! كه‌چی ده‌ركه‌وت، ته‌نها داهێنه‌ری: كه‌مپین، پاكێج، بایكۆت، حكوومه‌تی سێبه‌ر و ته‌پڵلێدان و فیكه‌فه‌لافل بوون. داهێنه‌رتریش بوون له‌ برەودان بە فه‌رهه‌نگی سوکایەتی و جنێونامەی نێو میدیای سێبه‌ر و بێحورمه‌تیكردن به‌ سه‌رجه‌م كایه‌كانی نێو كۆمه‌ڵگه‌ی كوردستان، هیچ شتێكتان به‌ پیرۆزی و ڕێزلێگیراو نه‌هێشته‌وه‌..


وتیان: چوار ساڵی ئارامیمان له‌ حكوومه‌تێكی بنكه‌فراواندا گه‌ره‌كه‌، كه‌چی پشێوییان خوڵقاند و حكوومه‌تیشیان له‌ كارخست و پیلانی كونسوڵكوشتن و ڕفاندنی ئه‌ندازیاری بیانیان دانا!..


ئێستا، گۆڕانخوازان هه‌قی خۆیانه‌، گله‌یی له‌ قه‌ده‌ر و به‌ختی خۆیان بكه‌ن و، بڵێن: تا ئێوه‌ نه‌چوونه‌ حكوومه‌ت، مووچه‌ وه‌كو خۆی و له‌ كاتی خۆی دابینده‌كرا، كاره‌بای نیشتمانی باشتر و سه‌عاتی زیاتر ده‌درا، سلفه‌ی زه‌واج و عه‌قار و ئاوه‌دانكردنه‌وه‌ له‌ لووتكه‌یا بوو، ئیتر هیچی نه‌ما و هه‌موویتان سفركرده‌وه‌.


ئێوه‌ منداڵی خه‌ڵكی هه‌ژار و بێ ده‌ره‌تانتان له‌ خۆپیشاندانه‌كاندا به‌ كوشتدا، ئاڵوگۆڕی بازاڕ و جموجۆڵی ئابووری و بازرگانیتان وەستاند، قه‌یرانی نه‌وت و به‌نزینتان داهێنا، گه‌نجه‌كانتان له‌ خانه‌واده‌ و كۆمه‌ڵگه ‌و ئینتیما و باوه‌ڕی خاك و نیشتمان دوورخسته‌وه‌ و، ڕێگای ده‌ریای ئیجه‌ و هه‌نده‌رانتان بۆ كردن به‌ گوڵ و ڕه‌یحان.


ئێوه‌ چ وه‌ڵامێكتان بۆ گۆڕانخوازان و ئه‌و خه‌ڵكه‌ هه‌یه‌، كه‌ ڕۆژگارێك دوای دروشمه‌ بێ بنه‌ماکانی ئێوه‌ که‌وتن.؟ ئه‌ی ئه‌وانه‌ی پێیانوابوو ده‌نگی پڕ هیوا و ئومێدیان پێداون و چاره‌نووسی خۆیان به‌ ئێوه‌وه‌ گرێدا، كوا چییان لە به‌رهه‌مه‌كەتان‌ چنییەوە !؟


مخابن به‌ری ڕه‌نج و ده‌نگی هەزاران کەستان به‌ هه‌ده‌ردا، ئێستا گه‌ل هه‌قی خۆیه‌تی بتانخاته‌ به‌ر حسابات و به‌ ‌قه‌د كرده‌وه‌ چه‌واشه‌كار و دروشمه‌ درۆیینه‌كانتان سزاتان بدات. دواجار ئێوه‌ ئه‌مڕۆشتان نه‌برده‌وه‌ و دواڕۆژیشتان دۆڕاند.!





ئەم هەواڵە 3400جار خوێندراوەتەوە
 
 
ڤیدیۆ گەلەری
ببینە ھاندەرانی بەرازیل چۆن بەرد بارانی ھەڵبژاردەکەیان دەکەن
وانەی وەرزش لە ژاپۆن
به‌ ڤيديۆ.. جيهانى ئه‌مڕۆمان چى به‌سه‌ردا هاتووه‌
سەیرترین رووداوەکانى ھاتووچۆ
كوشتنی به‌رێوه‌به‌ری پاسه‌پۆرتی پارێزگای بابل
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad