English | عربی | Kurdî دواهەواڵ
ڕاستەوخۆ
 
ئیتر شەڕ بەسە
2016-09-17 [10:15 AM]

نووسینی: نه‌وڕه‌س ره‌شید


 

حیزبەکان، سەرکردە سیاسیەکان، کادیرەکان، ڕێکخراوە بەناو مەدەنیەکان، ڕۆشنبیرەکان، مەلاکان، سەرمایەدارو خاوەن کۆمپانیاو دەوڵەمەندەکان، سیاسیە بێلایەنەکان، خاوەن پلەو پۆست وکاربەدەستەکان، سەرۆک هۆزو تیرەو بنەماڵەکان، خەڵکە لە خشتەبراوەکان، میدیاو ڕاگەیاندنکاران، هەمووتان پێویستە بزانن ٢٥٠٠ ساڵە شەڕخوازانی جیهان شەڕمان پێدەفرۆشن، سەدە لەدوای سەدە، قۆناغ بەقۆناغ، شەڕیان کردووین، وڵاتیان کاولکردوین، لەت و پەت ودابەشیان کردین، بێ ناسنامەو بێ کولتوریان کردین، ئازادیان لێ زەوتکردین، مافی سروشتیان پێشێل کردووین، بێ دەوڵەت وبێ دەسەڵاتیان کردووین، لەشارستانیەت بەدەریان کردین، بە دێو درنج ودەعبای دوور لە مرۆڤ ناوزەدیان کردین، بە عەرەب وتورک وفارس ولادەرو گێرەشێوێنیان کردین، شەڕ نەما لەگەڵمانا نەیکەن، تاوان نەما دەرهەقمان نەیکەن، هەرچی لە تواناو لەدەستیاندا بوو، بەکاریان هێناو کردیان بۆ ئەوەی لەناومان بەرن، چەك نەما دژمان بەکاری نەهێنن،  چەکی دین ، چەکی ڕەگەز، چەکی مێژوو، چەکی ئایدۆلۆژیا، چەکی سیاسی، چەکی ئابووری، چەکی زمان، چەکی کولتور، چەکی یاسایی، چەکی چینایەتی، چەکی کۆمەڵایەتی، چەکی ناوچەگەرێتی، تا چەکی کۆکوژی وداعشیان داهێناو کردیان بە گژماندا، هەر شەڕمان پێدەفرۆشن، بەڵام لەهەموو ئەو چەك وشەڕانە خراپترو ترسناکتر چەکی دووبەرەکی وشەڕی ناوخۆی خۆمانە، لەناو خۆماندا شەڕخوازی دژ بە خۆمانیان دروستکرد، کردنیان بە گژ خۆماندا، خۆمانیان کردە دوژمنی خۆمان، دەستمان چووە خوێنی یەکتری.

 هەمووتان بزانن ئەوە چەکێکی ترسناکە، لە چەکی کۆکوژی دوژمن وداعش ترسناکترە. ٢٥٠٠ ساڵە کورد لە شەڕدایە، ماندووە، شەکەتە، بریندارە، پێویستی بە چارەسەرکردن وئارامی وحەوانەوە هەیە، توو ویژدانتان ڕەحمی پێ بکەن، گەر بڕواتان بە یەزدان وبەهای مرۆیی هەیە، ئیتر شەڕی ناوخۆمان بەسە. بە هۆشیاری و ویژدانەوە ژیانی ئەم نەتەوە ستەم لێکراوە بخوێننەوەو لێکی بدەنەوە، دروشم بازی وموزایەدە بەسە، ئایا ئیتر شەڕ بەس نیە؟ دەبا کۆتایی بێت، ویژدانتان، کەرامەتتان، مێژووتان، پاشەڕۆژی نەوەکانتان بکەنە حەکەم وچەکی شەڕی یەکتری فڕێبدەن، بیرو عەقڵیەتی دووبەرەکی وناوچەگەرێتی لەگۆڕ بنێنن، وانە و پەندتان لە ناکۆکی وشەڕ وەرنەگرت؟ تکایە چەکی عەقڵانیەت ومەعریفەو شارستانیەت بەکار بهێنن، چەکی نیشتیمانپەروەری ڕاستەقینەو سەربەخۆیی وسەروەری شکۆی کوردو کوردستان بەکاربهێنن، ئەرک وبەرپرسێتی مێژوویی، مرۆیی، ئەخلاقی ونیشتیمانی هەمووان بیرکردنەوەیە بۆ ئەوەی خۆمان لە هەموو جۆرە شەڕەکانی ناوخۆمان ڕزگار بکەین، ڕێز لە ئازادی بیرو ڕای یەکتر بگرین، ڕێز لە پاشەڕۆژی نەتەوەیەکی بریندار بگرین.

دەزانم شەڕەکانی ناوخۆ برینەکانی چەند قوڵن، کوشندەن، دەزانم تا چەند شیرازەو تانوپۆی کۆمەڵایەتی، سایکۆلۆژی، سیاسی، ڕۆشنبیری وئەخلاقی لێکترازاندوەو هەڵوەشاندوە، دەزانم پەل وپۆی دەرەوەش تا چەند ڕیشەی داکوتاوەو تێوە ئاڵاوە، دەشزانم هەر لەدەرەوە چۆن ئاو دەدرێت وپەروەردە دەکرێت وچۆن وکەی هان دەدرێت تا شەڕی یەکتری بکەین، بەڵام یەک جار بیرکردنەو، بەخۆدا بچنەوە ئەو هەموو ناکۆکی ودووبەرەکی وپێداگیری لەسەر ناوچەگەرێتی ودژایەتیکردنی یەکتری وشەڕی خۆمان لەگەڵ خۆمان بۆ و لەپێناوی چیدا؟ بۆ تۆ ئەو ڕەت بکەیتەوەو نەتەوێ، ئەویش تۆ ڕەت بکاتەوەو نەیەوێیت؟ ئەوە چی بۆ کورد بەدەستهێناوەو دەهێنێت؟ جگە شەڕ چ دەستکەوتێکی بۆ کورد بەرهەمهێناوە؟ دەبا ئیتر بەس بێت شەڕەکانی ناوخۆمان، چەکەکانی ئەو شەڕە بشکێنن وفڕێیان بدەن، با نەفرەت لەو شەڕەو لە مێژووەکەی بکەین.

با هەمووتان بزانن تا کورد سەربەخۆ نەبێت وخاوەنی دەوڵەتی کوردستان نەبێت، چارەسەری کێشەو قەیرانە دروستکراوەکان ئەستەمە، چونکە ڕێگامان لێدەگرن، کێشەو قەیرانی ترمان بۆ دروستدەکەن، زیاتر شەڕی خۆمانمان پێدەکەن وبە گژ یەکرتماندا دەکەن، دەبا خۆمان لەم گێژاوە ترسناکە ڕزگار بکەین، با خوێنی شەهیدەکانمان، خەباتی گەلەکەمان وخۆڕاگری ولەخۆبوردووی وگیانبازی پێشمەرگە بە فیڕۆ نەدەین، با سوود لە وانەکانی ئەو گیان لەسەر دەستانەی ناو سەنگەری بەرگری لە کوردو کوردستان وەربگرین. دەیڵێمەوە دەبا ئیتر بەس بێت چەکەکانی شەڕی ناوخۆمان فڕی بدەین، بەر لە هەمووی چەکی ژەهراوی میدیاکان لەناو بەرین، ئەو میدیایەی بەناوی ئازادی ودروشمی بریقەدارەوە، ژەهری دووبەرەکی دەڕێژێ وئاگری شەڕی ناوخۆ خۆش دەکات، ئەو میدیایەی شەڕی سایکۆلۆژی وکولتوری وڕوخاندنی مرۆڤی کورد دژ بە خودی خۆی وکورد بەرپا کردووە، وای کردووە کورد خۆی لەبیر بچێتەوە، خۆی نەناسێت، ڕقی لە خۆیی ولەهەموو کەس وشتێك بێت، خۆی لەلا بێ سەنگ وبێ بایەخ وبێ بەها بێت، ئەو میدیایە ژەهری دووبەرەکی وناوچەگەرێتی وشەڕی ناوخۆ و ڕق لە یەک بوون وسووکایەتی کردن بە کوردو مێژوو خەبات وقوربانیدان وبەهاکانی دەڕێژێ، ئەوەی ئەو جۆرە میدیایە لە دژایەتیکردنی کورد ودۆزەکەیدا دەیکات، میدیای هیچ داگیرکەرو دوژمنێکی کورد بەو ئاشکراییە ئەو ژەهرە ناڕێژێ ونایکات، دەشبێت بزانرێت کە حکومەتی هەرێمی کوردستان وحیزبەکان، سیاسیەکان، ڕۆشنبیرەکان، مەلاکان، لەبەشێکی ئەو ژەهر ڕشتنەی میدیایی کوردی بەرپرسن، بێ دەنگی وپشتگوێ خستنی ئەو ژەهر ڕژاندنە بەناوی ئازادی وبیرو ڕای ئازاد، بەشێکە لەو شەڕە کە خۆمانی پێ دەکوژین، چەکێکە لە چەکەکانی شەڕی ناوخۆمان، دەبا ئیتر بەس بێت، دەبا ئەو چەکانەی بەرەو سەربەخۆییمان دەبات و زوتر وزیاتر لە سەربەخۆیی کوردستان نزیکمان دەکاتەوە بەکاری بهێنین وشەڕی ناوخۆمان تا هەتایە کۆتایی بێت.





ئەم هەواڵە 2809جار خوێندراوەتەوە
 
 
ڤیدیۆ گەلەری
شا سه‌لما به‌ قاوه‌ی عه‌ره‌بی پێشوازی له‌ تره‌مپ ده‌كات
ناسا روونترین وێنه‌ی شه‌وی زه‌وی له‌ بۆشاییه‌وه‌ بڵاو ده‌كاته‌وه‌
به‌یه‌ك موشه‌كی تازه‌ دروستكراو، تانكێك وردوخاش ده‌كات
ته‌قینه‌وه‌ی عه‌مباری چه‌ك و ته‌قه‌مه‌نی
جاڵجالۆکە چۆن تەونی خۆی دروست دەکات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad