English | عربی | Kurdî دواهەواڵ
ڕاستەوخۆ
 
لە یۆتۆبۆری سێیەمین خولی فیستیڤاڵی فیلمی کوردی دەستی پێکرد
2016-11-27 [11:30 AM]

یۆتۆبۆری (ZNA) ـ بە ئامادەبوونی سینەماکارانی شارە جۆراوجۆرەکانی کوردستان، سێیەمین خولی فیستیڤاڵی فیلمی کوردی "یۆتۆبۆری" لە سوید دەستی پێکرد.


رێوڕەسمی دەسپێکردنی سێیەمین خولی فیستیڤاڵی فیلمی کوردی "یۆتۆبۆری" بە ئامادەبوونی دڵشاد ئەحمەد، سەرۆکی سێیەمین خولی فیستیڤاڵی فیلمی کوردی یۆتۆبۆری و سەرۆکی کۆمەڵەی هونەرە جوانەکانی یۆتۆبۆری، لاگێ بیۆرک بەرپرسی پەیوەندییەکانی کۆمەڵەی هونەرە جوانەکانی یۆتۆبۆری، پیتێر ئۆلف سۆن سەرۆکی دەزگای ABF شاری یۆتۆبۆری و ژمارەیەک کەسایەتی هونەری، لە 25 ئەم مانگە سێیەمین خولی فیستیڤاڵی فیلمی کوردی "یۆتۆبۆری" بە دروشمی "سینەما و دیدی نەتەوە" لە هۆڵی سینەمایی "فۆڵکت هیووس" لە شاری یۆتۆبۆری لە سوید دەستی پێکرد.

 

لە سەرەتای ئەم رێوڕەسمەدا کە بە پێشکەشکاریی کەماڵ هەلویست و ریبین رەشید بەڕێوەچوو، "لاگێ بیۆرک" بەرپرسی پەیوەندییەکانی کۆمەڵەی هونەرە جوانەکانی یۆتۆبۆری گوتی: فیستیڤاڵی نێودەوڵەتی فیلمی سلێمانیم لە نزیکەوە بینی و لەڕاستیدا زۆر حەزم لێکرد و کۆمەڵەی هونەرە جوانەکانی یۆتۆبۆری بەنیازە کە لەگەڵ ئەم فیستیڤاڵە هاوکاریی بکات و لە داهاتوودا هەڵسووکەوتی فەرهەنگی و چالاکی هونەریی زیاتر لەگەڵ یەکتری ئەمدان دەکەین، هەر بەم هۆیەوە سێ فیلمی براوەی سەرەکی ئەم فیستیڤاڵەمان بۆ بەشداریی لە سێیەمین خولی فیستیڤاڵی فیلمی کوردی "یۆتۆبۆری" بانگهێشت کرد تاکوو ئەم فیلمانە لێرە نمایش بکەین.    

 

گوتیشی: هونەر و بەتایبەت سینەما و شانۆ، رۆڵی یەگجار زۆر گرینگ و کاریگەیان لە نەهێشتنی تندووتیژی و هەروەها بەرەنگاربوونەوەی و بەتایبەت هێورکردنەوەی تیرۆر هەیە و فەرهەنگی جیاوازی نەتەوە جۆراوجۆرەکانی دنیا یەکێک لە جوانترین و گرینگترین وێنە جوانەکانی ئەم جیهانەی بەدیهێناوە.

 

لە درێژەی دەسپێکی سێیەمین خولی فیستیڤاڵی فیلمی کوردی یۆتۆبۆری، پیتێر ئۆلف سۆن سەرۆکی دەزگای ABF شاری یۆتۆبۆری گوتی: ئێمە لەم کۆمەڵەیە لە هونەرمەندان و بەرهەمەکانیان پشتگیری پشتگیری دەکەین و هیوادارین کە رێژەی ناوەندە هونەرییەکانی وەکوو کۆمەڵەی هونەرە جوانەکانی یۆتۆبۆری لەوە زیاتر بێت کە لەڕاستیدا یەکێکە لە نموونە سەرکەوتووەکان لەم بوارەدا کە ئێمە لەگەڵیان هاوکاریی بەردەواممان هەیە و بێگومان لە داهاتووشدا درێژە بەم هاوکارییە دەدەین. 

 

گوتیشی: ئێمە نزیکەی سێ ساڵە کە لەگەڵ فیستیڤاڵی فیلمی کوردی یۆتۆبۆری هاوکاریی دەکەین و یەکێکە لە فیستیڤاڵە سەرکەوتوو و بەرچاوەکان لە شاری یۆتۆبۆری کە هیوادارین ساڵ بە دوای ساڵ بەرەو پێشەکەوتن بە خۆیەوە ببینێت.

 

لە بەشێکی دیکەی ئەم رێوڕەسمەدا، دڵشاد ئەحمەد سەرۆکی سێیەمین خولی فیستیڤاڵی فیلمی کوردی "یۆتۆبۆری" گوتی: لەم دۆخەی دنیای ئێمە پێیدا گوزەر دەکات رەنگە سانا نەبێت لە توانای بەرهەمهێنانی جوانی بکەینەوە. جوانییەک بتوانێ گوزارشت لە دیدێکی مرۆیانە بکات و هەوڵێک بێت بۆ ورووژاندنی پرسیارگەلێکی زیندوو کە زەینی چەند نەوەیەکی داگیر کردووە. پرسیارگەلی شێوەی لەم سەردەمی جیهانگیری و تێکەڵاوبوونی کەلتووورانەدا ئێمە لە کوێی گوتاری نەتەوەییداین؟ ئایا ئەم سەردەمە سەردەمی زیندووکردنەوەی دیدێکە بە ئاراستەی بیرکردنەوە لە قەوارەی گەلێکی بێ دەوڵەت؟

 

گوتیشی: تایبەتمەندتر دەتوانین لە میانەی دیداری فیلمەوە بپرسین ئاخۆ سینەما وەکو نێوەندێکی فرەهەستەوەر و گرینگ لە کوێی پرسەکانی ئێمەدایە؟ ئایا ئێمە دەتوانین فیلم بکەینە ئامرازێک بۆ بەرهەمهێنانی دیدێکی نوێ کە دەیەوێت لە ناو دنیای نوێدا جێی خۆی بکاتەوە؟ دیدێک گوزارشت لە خواستی تۆلێرانس و پێکەوە ژیانی ئاشتیانە بکات لەم رۆژگارەی تیرۆر وەک رمۆزن چۆتە وردترین جومگەکانی ژیانی کۆمەڵایەتییەوە.

 

سەرۆکی کۆمەڵەی هونەرە جوانەکانی یۆتۆبۆری ئەوەیشتی خستەڕوو: هەڵبژاردنی هونەر بۆ گەیاندنی ئەو پەیامە لەوێوە دێت کە هونەر رێگەیەکی ئاسانتر و کاریگەرترە بۆ گەیشتن بە دنیای ئەوانی دی وەک لە زۆری تر لەو لەو رێگایانەی بەربەستی فرەیان لە بەردەمدا قوت دەبێتەوە. هونەر دەتوانێ وێنەکانی واقیع بگوێزێتەوە و وەرگر بهێنێتە سەر ئەو بڕوایەی ئەوەی ئەو پیشانی دەدات حەقیقەتە و هەموو شتێک لە دەرەوەی ئەو کایەیە درۆیەکی ڕووتە. هونەر فاکتەرێکی کاریگەری گواستنەوەی یادەوەری و مێژووە و دەتوانێ دنیا ڕووبەڕووی وێنەکانی خۆی لە هەر سەردەمێکدا بکاتەوە. فیلمە هەڵبژێردراوەکانی ئەم دیدارە هەروا لامسەلایی نەهاتوون، بەڵکوو بەو ئاراستەیە کار بۆ کۆکردنەوەیان کراوە کە ببنە بەشێک لە گەیاندنی ئەو گوتارەی خودی دیدارەکە دەیەوێت ئاراستەی دنیای بکات.

 

سەرۆکی سێیەمین خولی فیستیڤاڵی فیلمی کوردی "یۆتۆبۆری" لە کۆتایی قسەکانیدا راشیگەیاند: سێیەمین دیدار بە دروشمی "سینەما و دیدی نەتەوە" بەرێوەدەچێت، کە بە هەموو پێودانگەکان دەبێت لە ئێستای ئێمەدا سینەما ئەرکی وێناکردنی دنیای کورد لە ئەستۆ بگرێت، وێنەیەک لەم گەردوونە فراوانەدا پێگەیەکی شایستەمان بۆ فەراهەم بکات. ئومێدی گەورەمان لەسەر ئەو ستراتیجە هەڵچنیوە و چاوەڕوانی زۆریشمان لێی هەیە.        

 

لە بەشێکی دیکەی رێوڕەسمی دەسپێکردنی سێیەمین خولی فیستیڤاڵی فیلمی کوردی "یۆتۆبۆری" ئەندامانی گرووپی موزیکی "نەوا" کە لە هونەرمەندانی کوردیی شارە جۆراوجۆرەکانی کرودستان پێکهاتبوون هاتنە سەر تەختەی شانۆ و لە سەرەتا بە دەنگی هەڵبەست دیلان یەکێک لە بەستە رەسەنەکانی محەمەد ساڵح دیلان پێشکەش کرا و پاشان گۆرانی "هەی نار" بە دەنگی هونەرمەندی کرماشانی فەریبورز کەرەمی ئاراستە ئامادەبووانی ناو هۆڵی "فۆڵکت هیووس" کرا.

 

ئەندامانی گرووپی موزیکی "نەوا" بریتی بوون لە: فەریبورز کەرەمی ـ ژەنیاری سێتار، ئیبراهیم عوسمان ـ ژەنیاری ڤیۆلۆن، ئاسۆ دیلان ـ ژەنیاری عوود، شەهریار ئارقینی ـ ژەنیاری نەی، تاهیر دەمیرداش ـ ژەنیاری دیوان (ساز)، شاخەوان حەسەن ـ ژەنیاری سەنتوور، حەمید ئیمانی ـ ژەنیاری زەرب و فەریبورز عینایەتی ـ ژەنیاری دەف.

 

لە درێژدەدا سێیەمین خولی فیستیڤاڵی فیلمی کوردی "یۆتۆبۆری" بە نمایشی کورتە فیلمی "وڵاتی ونبوو" لە درهێنانی سینەماکاری کورد هەوراز محەمەد دەستی پێکرد و لە پاشان فیلمی سینەمایی "عاشقەکان بە پێوە دەمرن" لە دەرهێنانی سینەماکاری کورد شەهرام مەسلەخی و لە رۆڵ بینینی ئەکتەری کورد شوان عەتووف و چەندین ئەکتەری ناوداری ئێرانی لەوانە: سرووش سیحەت، لەعیا زەنگەنە و پووریا پوورسورخ نمایشکرا کە لە لایەن بینەرانەوە بە گەرمی پێشوازیی لێکرا.

 

لە درێژەی بەرنامەکانی سێیەمین خولی فیستیڤاڵی فیلمی کوردی "یۆتۆبۆری" و لە رۆژی دووهەمی ئەم فیستیڤاڵەدا سەرەتا کاتژمێر 3ی دوانیوەڕۆی رۆژی شەممە 26ی نۆڤەمبەری 2016 کورتە فیلمەکانی "کوڕانی چیا" و "کاتژمێر 14:36 و 22:8" لە دەرهێنانی هاوبەشی ژیرۆ ئاگا هەستیار و فریدریک کارلسۆن و هەروەها کورتە فیلمی "ئاوێنە ڕەنگ بزرکاوەکان" لە دەرهێنانی سینەماکاری کورد سالم سەڵەواتی نمایشکرا و پاشان فیلمی سینەمایی "مناڵانی دیاربەکر" لە دەرهێنانی سینەماکاری کورد میراز بێزار چووە سەر پەردە سینەما.

 

هەروەها لە سێیەمین رۆژی ئەم فیستیڤاڵەشدا سەرەتا رۆژی یەکشەمە 27ی نۆڤەمبەری 2016 فیلمی سینەمایی "کوێستانی قەندیل" لە دەرهێنانی کۆچکردووی کورد تەها کەریمی نمایش دەکرێت و پاشان لە هەمان رۆژ کورتە فیلمی "ماڵی سپی" لە دەرهێنانی سینەماکاری کورد ئەرەستوو مەفاخیری و بە  رۆڵ بینینی ئەکتەری کورد شیما مولایی پێشکەش دەکرێت.

 

سەرجەم داهاتی فرۆشی بلیتەکانی سێیەمین خولی فیستیڤاڵی فیلمی کوردی "یۆتۆبۆری" پێشکەش بە نەخۆشخانەی (سۆزی دەروونی ) تایبەت بە خانمان دەکرێت لە شاری سلێمانی.

 

سێیەمین خولی فیستیڤاڵی فیلمی کوردی "یۆتۆبۆری" بە سەرۆکایەتی دڵشاد ئەحمەد سەرۆکی کۆمەڵەی هونەرە جوانەکانی یۆتۆبۆری و بە نمایشی بەرهەمی سینەماکارانی کورد لە شارە جۆراودۆرەکانی کوردستان و بە نمایشی بەرهەمی فۆتۆگرافی هونەرمەندانی کورد ناسح عەلی خەیات، بابان ساڵح، هۆشمەند هەڵگورد و هونەرمەندی سویدی لاگێ بیۆرک، لە رۆژانی 25 تا 27س نۆڤەمبەری 2016 لە هۆڵی سینەمایی "فۆڵکت هیووس" لە شاری یۆتۆبۆری لە وڵاتی سوید بەڕێوەدەچێت.

   

مەنسوور جیهانی





ئەم هەواڵە 1078جار خوێندراوەتەوە
 
 
ڤیدیۆ گەلەری
سه‌یر بكه‌ دۆناڵد ترامپ له‌ زۆرانبازیدا چ لێدانێك ده‌خوات
هندستان...سه‌رتاشێك ئاگر بۆ سه‌رتاشین به‌كار ده‌هێنێت
گورگه‌كان وایان زانی نێچیرێكی ئاسانه‌، به‌ڵام له‌به‌رده‌م گامێشه‌كان هه‌ڵاتن
شه‌مه‌نده‌فه‌رێك له‌ دوو ئوتۆمبێل ده‌دات
ئه‌ندونیسیا... له‌دوا ساتدا هه‌ردوو منداڵه‌كه‌ی رزگار ده‌كات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad