English | عربی | Kurdî دواهەواڵ
ڕاستەوخۆ
 
ھەرێمی کوردستان و خاچی سووری نێودەوڵەتی جەخت لە ھاریکاریی ھاوبەش دەکەنەوە
2017-01-10 [07:56 AM]

ZNA- هەولێر


 

پاشنیوەڕۆی ئەمڕۆ "نێچیرڤان بارزانی" سەرۆک وەزیرانی ھەرێمی کوردستان، پێشوازی لە "پیتەر مۆریر" سەرۆکی کۆمیتەی خاچی سووری نێودەوڵەتی ICRC و شاندێکی یاوەری کرد.

 

لە دیدارێکدا شاندی میوان خۆشحاڵیی خۆیان بە سەردانی ھەرێمی کوردستان دەربڕی و سوپاسی ئەو ھاوکاری و کارئاسانیانەیان کرد کە حکوومەتی ھەرێمی کوردستان پێشکەش بە ڕێکخراوەکەیان دەکات لە کار و چالاکییەکانیاندا بەتایبەتی لە سەردانی کەمپی ئاوارەکان و گرتووخانەکان. جەختیشیان لەوە کردەوە کە پێویستە کۆمەڵگەی نێودەوڵەتی ڕاستەوخۆ و ناڕاستەوخۆ زیاتر ھاوکاریی ئاوارەکان بکات، چونکە بەھۆی نائارامیی ناوچەکانیانەوە پێشبینی دەکرێت ژمارەیەکی زۆری ئاوارەکان لە کەمپەکاندا بمێننەوە.

 

دووپاتیشیان کردەوە وەک ڕێکخراوی ICRC ھەوڵ دەدەن بە ھاوکاریی دامودەزگاکانی حکوومەتی ھەرێمی کوردستان و ڕێکخراوەکانی دیکە، خولی ھۆشیاری سەبارەت بە خۆپاراستن لە مین و تەقەمەنییەکان بۆ ئاوارەکان بکەنەوە بۆئەوەی لەکاتی گەڕانەوەیان بۆ زێدی خۆیان بتوانن خۆیان لە مین و تەقەمەنی بپارێزن تاکو ناوچەکانیان لە پاشماوەکانی جەنگ پاک دەکرێنەوە.

 

لای خۆیەوە سەرۆک وەزیرانی ھەرێمی کوردستان سوپاسی ئەو سەردانە و کار و چالاکییەکانی ڕێکخراوەکەی کرد و ئامادەییی حکوومەتی ھەرێمی کوردستان و بەتایبەتی وەزارەتی ناوخۆی بۆ پێشکەشکردنی ھەر ھاوکاری و کارئاسانییەک بۆ کار و چالاکییەکانیان، دەربڕی.

 

ھەروەھا ھیوای خواست ڕێکخراوەکە ڕۆڵی ھەبێت لە پێشکەشکردنی بیرۆکەی گونجاو بە وەزارەتەکانی حکوومەتی ھەرێم بۆ باشترکردنی کاروبارەکانیان لە بوارەکانی بەڕێوەبردنی کەمپەکان و پێشکەشکردنی خزمەتگوزاریی زیاتر بە ئاوارەکان و پەیڕەوکردنی باشتری بنەما نێودەوڵەتییەکان لە گرتووخانەکانی ھەرێمی کوردستاندا.

 

تاوتوێکردنی دوا پێشھاتەکانی ئۆپەراسیۆنەکانی ئازادکرنەوەی مووسڵ و ھاتنی ژمارەیەکی زۆرتری ئاوارەکان بۆ ھەرێمی کوردستان و دابینکردنی ئاسایش و خزمەتگوزاریی بۆیان و چەند بابەتێکی دیکەی پەیوەندیدار، لایەنێکی دیکەی دیدارەکە بوو.





ئەم هەواڵە 1435جار خوێندراوەتەوە
 
 
ڤیدیۆ گەلەری
دوای ئه‌و هێرشه‌ چی روویدا
ستونی كاره‌با زۆر به‌ توندی به‌سه‌ر ئۆتۆمبێلێك ده‌كه‌وێت و شوفێره‌كه‌ی رزگاری ده‌بێت
له‌ ئاسمانه‌وه‌ قه‌باره‌ی ئه‌و زیانه‌ی به‌ر موسڵی كۆن كه‌وتووه‌، ببینه‌
له‌ ئاسمانه‌وه‌ وێنه‌ی وێرانه‌ی مزگه‌وتی نوری و مناره‌ی حه‌دبا ببینه‌
مۆبایل سەری لە قوڕێ نا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad