English | عربی | Kurdî دواهەواڵ
ڕاستەوخۆ  
 
هەڵەبجەی بئ ئەنجومەن و سلێمانی بئ پارێزگا
2017-01-26 [08:42 AM]

نووسینی: دانا مەنمی


 

هەڵەبجە بەبئ ئەنجومەن پاریزگای هەیە ، سلێمانیش بە بئ پارێزگا ئەنجومەنی هەیە !!
شەرعییەت ئەنجومەن ئەیدات بە پارێزگا ، تێناگەم پارێزگای هەڵەبجە لەکام دیوەخانی حزبیەوە شەرعییەتی وەرگرتووە ، قسەی جدیش لەسەر ئەوەیە ئایا هەڵەبجە پارێزگایە ؟!

لەدیوەخانەکانی بزوتنەوەی گۆڕان و لەماڵەگەورەکەی یەکێتییەوە بەبئ لەبەر چاوگرتنی ڕۆڵ و دەنگ و ڕەنگی لایەنەکانی تر ئاڵوگۆڕ لەپۆستەکانی پارێزگاو ئەنجومەنی پارێزگاو قایمقام لە سلێمانی و هەڵەبجەدا دەکەن ، یەکێتی و گۆڕان هێندە دیموکراتخوازن ، نە پارتی و لایەنەکانی تریان قبوڵە بۆ بەشداری لەحوکمڕانیەتی زۆنی سەوز ، نەبۆخۆیشیان هێندە جوامێرن کە ڕێکبکەون و یەکتریان قبوڵ بێت !! 

ڕێکەوتنی هاوبەش لەنێوان  یەکێتی و گۆڕان لە ۱۷ی مایس ۲۰۱٦  واژۆ کرا ، بەئێستاشەوە کە هەشت مانگ و هەشت ڕۆژ بەسەر واژۆی ڕێکەوتنامەکەدا تێدەپەڕێت ، نەک یەکخاڵی لئ جێبەجێ نەکراوە ، بگرە یەکێتی و گۆڕان یەکتریشیان قبوڵ نییە لەسەر پۆستە ئیدارییەکانی هەڵەبجەو سلێمانی . 

یەکێتی زمانی ڕاگەیاندنی جیاوازەو یەکناگرێتەوە لەگەڵ هەڵسوکەوتی سیاسیدا ، یەکێتی لەژێرەوە خۆی بە برابەش و شەریکی ڕاستەقینەی پارتی دیموکراتی کوردستان دەزانێت و داوای بەش دەکات ، ڕێکەوتنامەی ستراتیژی الف و بای گوتاری دیوی ناوەوەی یەکێتییەکانە بۆ بەشە گیرفان ، بەڵام زمانی ڕاگەیاندنیان ئۆپۆزسێونێکی بئ خەوشە و لوت لە شەفافیەت و ئازادی و خولقاندنی قەیرانی سیاسی و ئابوری ئەسون ، حکومەتیش شکستخواردووەو ئۆباڵی هەموو بەرپرسیارەتیەکان لەئەستۆی پارتیدایە !! 

لەکاتێکدا نەحکومەت و نەخەڵک ، نەپارتی و نەلایەنەکانی تر جگە لەیەکێتی و گۆڕان کەس ئاگاداری داهات گومرگەکان و باج و ڕسوماتی یەکە ئیدارییەکانی زۆنی سەوز نییە ، بەڵام هەمووان بە حکومەت و حزب و خەڵکەوە ئاگادارن کە ئەو داهاتە یەکێتی و گۆڕان دیناربەدینارو فلس بەفلسی لەنێوان خۆیاندا دابەش دەکەن . 

دەربارەی چەمکی ئازادی بۆ هاونیشتیمانیان ، تا ئەو جێگەیە ڕێگەپێدراوە کە هەم ڕەخنەگرو هەمیش بوختانچی و جنێوفرۆش بیت بەپارتی و هێزە نەیارەکانی دژبەیەکێتی و گۆڕان ، خۆئەگەر نا میرغەزەبەکانی زۆنی سەوز بەدەردی کاوە گەرمیانی -یت دەبەن ، کەواتە بەهاو سنوروچوارچێوەی ئازادی لەدەست حوکمی قەرەقووشدایە ، خودی ئازادیش بووەتە کەرەستە بۆ لێدان لەبەهای مرۆڤبوون . 

حکومەتی هەرێم ئەگەر بەتەنها ڕەنگ و سیمای پارتی پێوە دیارە ، ئەی ڕۆڵی لایەنە سیاسییەکانی تر جگە لەگۆڕان کە دیپۆرتکراوە  چییە ؟ یەکێتی خورماو خورمژیشی دەوێت ، دەست و قاچێکی ئاڵاندووە لە پارتی دیموکراتی کوردستان و متمانەی بەبزوتنەوەی گۆڕان نییە ، ناحوازێت بەرژەوەندییەکانی لەگەڵ پارتیدا بکەوێتە مەترسییەوە ، دەست و قاچەکەی تری یەکێتی وابەدامێنی بزوتنەوەی گۆڕان و لە ناجۆری گۆڕان وەکو حزب ئەترسێت ، ئاخر گۆڕان ناموراڵ و بەبئ لەبەرچاوگرتنی هیچ عورفێک هەرزەکارانە دۆو دۆشاو تێکەڵ دەکات . 

بەڵام  دوا جارسەری گا هەردۆڵە گۆڕان دەگەڕێتەوە نێو باوەشی یەکێتی و یەکێتی یش بەبئ پارتی دیموکرات کە بەدیلی یەکێتی پارتییەو بەدیلی پارتیش یەکێتی یە ، لەیەک دۆڵ و بۆ بەرژەوەندی هاوبەش و ڕێکەوتن لەسەر گیرفانەکان دەست دەخەنەوە ناودەست و یەکتر لەئامێز دەگرن .





ئەم هەواڵە 3727جار خوێندراوەتەوە
 
 
ڤیدیۆ گەلەری
خەونی ھەمو ئافرەتێک , کەسێکی ئاوای ھەبێت
ھەڵوێستێکی جوانی محەمەد سەڵاح
خاڵ بەدەستھێنان ئاوا دەبێت
زۆر خراپ دەکەوێتە خوارەوە
لە قافا گیرا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad