English | عربی | Kurdî دواهەواڵ
ڕاستەوخۆ
 
کۆمەڵێک کەلوپەلی ئەنفالکراوەکان بۆ ھەرێمی کوردستان گەڕێندرانەوە
2017-02-16 [06:09 AM]

ZNA- هەولێر


 

کۆمەڵێک لە کەلوپەلی ئەنفالکراوەکان کە لەکاتی ئەنفالکردنی خەڵکی ھەرێمی کوردستان بەجێ‌ماون، گەرێندرانەوە ھەرێمی کوردستان.

 

پڕۆسەی ئەنفال بەرنامەیەکی پێشوەخت و نەخشە بۆ داڕێژراوبوو بۆ سڕینەوەی نەتەوەی کورد و دوای رووخانی رژێمی بەعس، چەندین گۆڕی بە کۆمەڵ دۆزرانەوە و رووفاتەکانییان گواستەوە بۆ زێدی خۆیان و کەلوپەل و پاشماوەکانی ئەنفالیش لە شوێنێکی تایبەت ھەڵگیراون.

 

لە رێورەسمێکدا لە فڕۆکەخانەی نێودەوڵەتی سلێمانی بە ئامادەبوونی وەزیری کاروباری شەھیدان و ئەنفالکراوەکان، مەحموود حاجی ساڵح و سەرۆکی ئەنجومەنی پارێزگای سلێمانی، کۆمەڵێک لە کەلوپەلی ئەنفالکراوەکان لە رێگای فڕۆکەخانەی نێودەوڵەتی سلێمانییەوە گەڕێندرایەوە ھەرێمی کوردستان.

 

وەزیری کاروباری شەھیدان و ئەنفالکراوەکان مەحمود حاجی ساڵح لە کۆنگرەیەکی رۆژنامەوانیدا گوتی: "ئەمرۆ ئامادەبووین لە پێشوازی کەلوپەلی رووفاتی ئەنفالکراوەکانمان کە ٢٩ ساڵ لەمەوپێش لە چەند کردەوەیەکی کۆمەڵکوژی لە باشوور و ناوەڕاستی عێراق زیندە بەچاڵکران".

 

گوتیشی: "روفاتەکان کە ھەتا ئێستا گەیشتوونەتە ھەرێمی کوردستان ژمارەیان ٢ھەزار و ٥٠٠ رووفاتە وبەڵام ئەو کات کەلوپەل و جل و بەرگ و ئەو پێویستیانەی کە لەگەڵیان بووە نەتواندراوە بگوازرێنەوە بۆ ھەرێمی کوردستان، بۆیە بەھەوڵێکی زۆری وەزارەتی کاروباری شەھیدان و ئەنفالکراوەکان و بەتایبەت تیمی گۆڕە بە کۆمەڵەکان، تواندرا دوای چەند کۆبوونەوەیەک ئەو کەلوپەلانە بھێندرێنەوە ھەرێمی کوردستان".

 

مەحمود حاجی ساڵح ئاماژەی بەوەشکرد کە دوای ھێنانەوەی ئەم کەلوپەلانە ئەرکی حکوومەتی ھەرێمی کوردستان و وەزارەتی کاروباری شەھیدان و ئەنفالکراوەکانە کە مۆزەخانەیەکیان بۆ بکاتەوە بەمەبەستی پاراستن و ھەڵگرتنیان.

 

ھەر لە کۆنگرە رۆژنامەنوسیەکەدا بەڕێوەبەری گۆڕە بەکۆمەڵەکان پەری نوری گوتی: "حکوومەتی فیدراڵی لە بەغدا خۆی بە خاوەنی ئەو کەلوپەلانە دەزانی و دەیویست لە بەغدا بمێننەوە و بپارێزرێن، بەو پێیەی تایبەتن بە ھەموو عیراق، بەڵام ئێمە پێداگریمان کرد و سوربووین لەسەر ئەوەی کە بیانھێنینەوە بۆ ھەرێمی کوردستان تا بەشێوەیەکی زانستی و یاسای بپارێزرێن و ھەڵبگیرێن، چونکە تایبەتن بە کورد و قوربانییەکانیش کوردن".

 

رونیشیکردەوە کە کەلوپەلەکان ئەوانەن کە لەگۆڕە بەکۆمەڵەکانی باشوورو ناوەڕاستی عێراق ھەڵگیراونەتەوە و کە بریتین لە گۆڕە بەکۆمەڵەکانی ( مەھاری و حەمرین و نوگرەسەلمان و تۆپزاوا و حەیدەریە )، ئەمەش بەشی یەکەمی ئەو کەلوپەلانە دەبێت و پرۆسەکەش بەردەوام دەبێت.

 

گوتیشی: "دوای پشکنینی پزیشکی و ناسینەوەی کەلوپەلەکان لەشوێنی پارێزراودا ھەڵدەگیرێن".

 

سەرچاوه: AA





ئەم هەواڵە 4156جار خوێندراوەتەوە
 
 
ڤیدیۆ گەلەری
ببینه‌ دیوارێك به‌سه‌ر ژماره‌یه‌ك ئۆتۆمبێل دا ده‌ڕوخێت
یه‌كه‌م بووكه‌ڵه‌ پیاسه‌ له‌ شه‌قامه‌كانی ژاپۆن ده‌كات
چه‌كدارانی داعش له‌ رۆژئاوا بۆ رۆژهه‌ڵاتی سوریا به‌ پاس ده‌گوازرێنه‌وه‌
دوای ئه‌و هێرشه‌ چی روویدا
ستونی كاره‌با زۆر به‌ توندی به‌سه‌ر ئۆتۆمبێلێك ده‌كه‌وێت و شوفێره‌كه‌ی رزگاری ده‌بێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad