English | عربی | Kurdî دواهەواڵ
ڕاستەوخۆ
 
نێچیرڤان بارزانی: نەورۆز جەژنی بووژانەوەی گیانی نیشتمانپەروەرییە
2017-03-20 [05:30 AM]

ZNA- هەولێر


 

نێچیرڤان بارزانی، سەرۆک وەزیرانی ھەرێمی کوردستان، بەبۆنەی جەژنی نەورۆز و سەری ساڵی تازەی کوردییەوە، لە پەیامێکدا پیرۆزبایی لە بنەماڵەی شەھیدان و گەلی کوردستان دەکات و دەڵێ: نەورۆز جەژنی بووژانەوە و بەھێزبوونی گیانی نیشتمانیی نەتەوەی کورد و ھەموو گەلی کوردستانە.

 

ئەمەش دەقی پەیامەکەیە:

 

بەبۆنەی جەژنی نەورۆز و سەری ساڵی تازەی کوردییەوە، پیرۆزبایی لە یەکە بە یەکەی خێزانی سەربەرزی شەھیدانی کوردستان دەکەم کە بە خوێن و قارەمانێتیی ئەو شەھیدانە، ئێستا کوردستان جەژنی سەرکەوتن و تێکشکاندنی داعش دەگێڕێت. پیرۆزبایی لە پێشمەرگە قارەمانەکان، لە ئاسایش و ھێزەکانی ناوخۆ و خۆبەخشان دەکەم کە سەقامگیریی کوردستانیان پاراستووە. پیرۆزبایی لە فەرمانبەرانی کوردستان دەکەم کە بە خۆڕاگریی خۆیان، ھێزیان دایە گەل و حکوومەتی کوردستان.

 

جەژنی نەورۆز لە نەتەوەی کورد و ھەموو گەلی کوردستان پیرۆز دەکەم، ئەو جەژنەی بە ‌درێژاییی مێژووی کوردستان، ھاوکات لەگەڵ نوێبوونەوەی سروشتدا، ڕۆژی نوێبوونەوەی گیانی نیشتمانپەروەریی کورد بووە، بۆیەش بە ‌ڕاستی نەورۆز بۆ کورد و کوردستان جەژنی نوێبوونەوەیە. پیرۆزبایی لە ھەموو ئەو گەلانەی ناوچەکە دەکەم کە جەژنی نەورۆز دەگێڕن، ھیوادارم جەژنی پێشکەوتن و ئارامیی زیاتر بێت بۆ ھەموومان.

 

لە نەورۆزی ئەمساڵدا ڕاستە ھێشتا زۆر لە خەڵکی خۆشەویستی ناوچەی شنگال لەبەر دەستی داعشدا ماون، تا ئێستاش قورساییی شەڕ و لێکەوتەکانی شەڕی داعش بەسەر گەلی کوردستاندا ماون، ھێشتا قورساییی قەیرانی ئابووری بەسەر کوردستاندا ماوە، بەڵام بە ھەوڵی بێوچان، بەردەوام خوشک و برا ئێزدییەکانمان لە دەستی داعش ڕزگار دەکرێن، سەرکەوتنی پێشمەرگە،‌ گەلی کوردستانی وەک میللەتێکی پارێزەری ئازادی و بەھا مرۆڤایەتییەکان بە ھەموو جیھان ناساندووە، ئیرادەی خەڵکی کوردستان و کارکردنی بەردەوامی حکوومەتی ھەرێمی کوردستان لەپێناو چاکسازی و ڕێکخستنەوەی کاروباری حکوومەت و ھاوبەشیکردن لەگەڵ دەزگا نێودەوڵەتییەکاندا لەوبارەیەوە، ھیوایەکی بەھێزی کۆتاییھێنان بە ھەموو قەیران و کێشەکان دەبەخشن.

 

لە نەورۆزدا، لە پیرۆزترین ڕۆژی کوردستاندا، داوا لە ھەموو لایەنەکانی کوردستان دەکەم لەپێناو پاراستنی ھەموو دەستکەوت و پێشکەوتنەکانی ھەرێمی کوردستان، دەنگیان بکەنە یەک بۆ ئەوەی بتوانین بە شێوەی لێکتێگەیشتن و ئاشتیانە، ھەموو کێشە و ناکۆکییە ناوخۆییەکان، فرەھێزی و گوێنەدانە سەروەریی خاک و حکوومەتی ھەرێمی کوردستان کۆتایی پێبینین.

 

ھیوادارم بە دڵێکی پڕ لە خۆشی و گەشبینییەوە جەژنی نەورۆز لەگەڵ خێزان و ئازیزانتاندا پیرۆز بکەن و بە پاراستنی ژینگە و سروشتی کوردستان، دۆستایەتی و خۆشەویستیی خۆتان لەگەڵ سروشتی جوانی کوردستاندا نیشان بدەن.





ئەم هەواڵە 2530جار خوێندراوەتەوە
 
 
ڤیدیۆ گەلەری
شا سه‌لما به‌ قاوه‌ی عه‌ره‌بی پێشوازی له‌ تره‌مپ ده‌كات
ناسا روونترین وێنه‌ی شه‌وی زه‌وی له‌ بۆشاییه‌وه‌ بڵاو ده‌كاته‌وه‌
به‌یه‌ك موشه‌كی تازه‌ دروستكراو، تانكێك وردوخاش ده‌كات
ته‌قینه‌وه‌ی عه‌مباری چه‌ك و ته‌قه‌مه‌نی
جاڵجالۆکە چۆن تەونی خۆی دروست دەکات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad