English | عربی | Kurdî دواهەواڵ
ڕاستەوخۆ  
 
مەبەستێن لپشت خۆنیشاندانێ!
2017-12-20 [09:53 AM]

نڤیسینا: کـــاوار نـــێروەیــی


سەرەرایی وێ چەندێ، کو خۆنیشاندان ئێک ژ مافێن ھەرەسەرەکی و رەوایێن ھەڤوەڵاتیانە ژبۆ داخوازکرنا مافێن خۆ ب شێوەیەکێ مەدەنی و سەردەمانە، لێ گەلەک جاران تەوقیت و پراکتیزەکرنا ڤێ رێکارێ، ئارمانجێن ڤەشارتی یێن لپشت خۆنیشاندانێ ددەن دیارکرن. پرانیا خونیشاندانێن ھەڤوەڵاتیێن ھەرێما کوردستانێ و بتایبەتی یێن دەڤەرا کەسک و نیلی، د تەوقیت و دەمەک نەگونجایی دا دھاتنە ئەنجام دان و ب شێوەیەکێ مەدەنیانە ب دووماھی نەدھاتن بەلکو ھەردەم ترس ژ دەرئەنجامێن وێ ھەبووینە کو زەرەر و زیان پتر بووینە ژ ئارمانجا حەقیقیا خۆنیشاندانێ، بەردەوام ملک و مالێ گشتی و حزبی کرینە ئارمانجێن خۆپێشاندانێن خۆ. وەکو دیار ئەڤجارە ژی بارەگایێن حزبی ژێ بێ بەھر نەبوون، ئەڤە ژی ھەم عەقلیەتا رێکخەر و خۆنیشاندەران، ھەم ئارمانجێن ل پشترا ددەت دیارکرن. خۆیایە، ئارمانجێن سەرەکیێن پیلانێن دوژمنێن ھەرێمی یێن ل دژی ھەرێما کوردستانێ ھەتا نھا وەکو خواستەکا وان نەھاتینە بجھئینان، وە بەردەوامن لسەر پیلانێن خۆ یێن ئێک لدویف ئێک ژبۆ نەھێلان یان پتر لاوازکرنا کیانێ سیاسیێ ھەرێما کوردستانێ، بتایبەتی پشتی دوھی رێکەفتی ١٧-١٢-٢٠١٧حکومەتا ھەرێما کوردستانێ پێشنیارا ھەڵبژاردنا پێشوەخت کری، چونکی ئاگەھداری وێ چەندێ بوو، چەندین کەس ل ژێر ناڤێ گوھرانکاری و پێکئینانا حکومەتا رزگاریا نیشتمانی، نیاز ھەنە دامەزراو  وحکومەتا فەرمیا ھەرێما کوردستانێ ژناڤ ببەن و کونترولا بارۆدوخێ ھەرێمێ بکەن. ھەروەسان، ئەڤان چەندین پێشوازیێن وەڵاتێن ئەورۆپی لسەر ئاستێ بلندێ دیبلوماسیێ ل شاندێ بلندێ حکومەتا ھەرێما کوردستانێ دھێنەکرن و پەیامێن پشتەڤانیا ھەرێمەکا بھێز دناڤا ئیراقا ئێکپارچەیی دا ددەنە حکومەتا ناڤەندی، بێگومان ئەڤە جھێ نەرازیبوون و دلگرانیێ یە ھەم بۆ حکومەتا ئیراقێ ھەم بۆ وەڵاتێن ئەقلیمی ب تایبەت ئیرانێ. لەوما حکومەتا ئیراقێ ب ئیعازا وەڵاتێ ئیرانێ بەردەوام ھەول و بزاڤێن لاوازکرنا وێ پشتەڤانیا نیڤدەولەتێ بۆ ھەرێما کوردستانێ ددەتن، ب چەندین رێیێن جودا جودا ژ وانا، دروستکرنا ئاژاوە و نەسەقامگێریێ دناڤا ھەرێما کوردستانێ، بۆ وێ چەندێ داکو ئەو وەڵات نەشێت بەردەوامبن یان پاشگەز ببن لسەر پشتەڤانیکرنا خۆ بو ھەرێمێ، بێگومان ئەڤ پیلانە ژی بێی پشتەڤانی و دەستگرتنا دەستێن ناڤخۆیی ناھێتە بجھئینان. لەوما ئەو خونیشاندانێن ئەڤرو ل سنورێ پارێزگەھا سلێمانیێ ھاتینە ئەنجام دان، چەندین مەبەستێن خرابێن ناڤخۆیی و دەرڤەیی ژێ دھێنە چاڤەرێکرن، وەکو مەدیتی ئێکسەر پشتی خونیشاندانان ئەسکەندەر ووتون، ئەندام پەرلەمانێ شیعە ل پەرلەمان ئیراقێ گوت” داخاز ژ بەرێز حەیدەر عبادی دکەم، ھێزەکا ئیراقی ژبۆ کونترۆلکرن و پاراستنا خونیشاندەران فرێکەتە سلێمانیێ” ئەڤەژی چەندین ئاماژێن مەترسیدار لێ دھێنە ڤەخواندن: * مەبەستێن ناڤخۆیی: ١- پاشخستنا ماوەیێ ھەلبژاردنێن ھەرێما کوردستانێ، ب تایبەتی پشتی نامەیا دەستنیشانکرنا ماوێ ھەلبژارتنان ژ ژلایێ سەرۆک وەزیران ڤە بۆ پەرلەمانێ کوردستانێ ھاتیە ھنارتن، یا خۆیایە ھەتا ڤێ لەحزێ ژی چەندین پارتێن پشتەڤانێن خۆنیشاندانان نە دگەل ھەلبژارتنێن پێشوەختن، ئەڤە ب خۆ ب خۆ ژی ژ کارخستنا  پروسەیا چارەسەرکرنا کریزا سیاسی و ئابووریا ھەرێما کوردسانێ یە و رێخکوشکرنە بۆ  بجھـ ھاتنا پیلانێن ئیراقی و ئەقلیمی. ٢- بجھئینانا ئارمانجێن مێژینەیێن چەندین تاقم و گرۆپان ژبۆ دژایەتیکرنا حکومەتا ھەرێمێ ژلایێ چەندین کەس و گرۆپێن دیارکری یێن ل سنورێ پارێزگەھا سلێمانیێ. ٣- ملسیاربونا ھەمان تاقم و گرۆپێن دژی حکومەتا ھەرێمێ، ل سەر داڤ و داخوازیێن رەوایێن ھاوڵاتیێن ھەرێما کوردستانێ، ژبۆ ڤەشارتنا روویێ غیانەتکاریا خۆ یا ١٦ی ئوکتوبەرێ ژبۆ ژبیربرنا ھەوڵاتیان. *مەبەستێن دەرڤەیی: ١- نیازێن بەردەوامێن حکومەتا ئیراقێ ب رێیێن جودا جودا ژبۆ کونترۆلکرنا تمامیا ھەرێما کوردستانێ، بەردەوامیدانا ڤان خۆنیشاندانان، رێکخوشکەرە ژبۆ پێنگاڤ ھاڤێتنا لەشکەری یا ئیراقێ بۆ دەڤەرا سلێمانیێ. ٢- بجھئینانا خالا ئیکێ ژ ئارمانجا خۆ، رێکخوشکرن و پەنابرنە بەر رێکارێن یاسایی ژبۆ شیعەکرنا ئیراقێ بگشتی، ھەتا نھا فیدرالیەتا ھەرێمێ مەزنترین بەربەرستە لبەر سینگێ پیلانا ئیرانێ د ئیراقێ دا ژ روویێ یاسایی ڤە. ٣- ھەروەسان، لاوازکرنا ئیرادەیا تاکێ کورد و ھەمی فوکس و داخوازیا ھاوڵاتیێ کوردستانی بتنێ بدەستڤەئینانا پاریێ رۆژێ و ژبیربرن و ژناڤبرنا داخوازیێن نەتەوەیی. * چ لسەر حکومەتا ھەرێمێ پێتڤی یە: دڤێ قوناغا گەلەک ھەستیار و چارەنڤیساز دا، کو حکومەت و ئەزموونا حکومرانیا کوردستانێ پشتی ٢٠٠٣ ھەتا نھا چ جاران نەگەھشتی یە قوناغەکا ب ڤی شێوەیی ھەم ژ روویێ سیاسی و ھەم ئابووری ڤە، لەوما پێدڤی یە، ب دەمەک لەزگین ڤان رێکاران بگریتە بەر: ١- پێدڤی یە حکومەتا ھەرێما کوردستانێ بەردەوام سەرەدان و کومبوونان دگەل لایەنێن پشکدارێن دحکومەتێ دا بکەت و پێشنیارێن وان ژبۆ چارەکرنا بارودوخێ کوردستانێ ٢- دڤێت ب پرۆژەیەکێ ھەڤبەش دناڤبەرا ھەمی پارت و لایەنێن کوردستانی بھێتە دارشتن، ھەمی لایەن خۆ ب خودان و بەشەک ژ پرۆسەیا چارەسەریێ بزانن داکو پشکدار ببن دمیکانیزم و پرۆسەیا چارەسەرکرنێ دا ٣- گەلەک گرنگە د ڤێ قوناغێ دا، سوزنامەیا شەرەفا نیشتیمانی یا ھەڤبەش دناڤبەرا لایەنێن کوردستانی یێن پشکدار ببن د ھەلبژاردنێن بھێت دا، بھێتە ئیمزاکرن. ژبۆ وێ چەندێ ب ئێک دەنگ و لیست پشکداری ھەلبژارتنێن بەغدا ببن، مینا سالا٢٠٠٥، کو نھا گەلەک ژ وێ سالێ گرنگتر و پێدڤی ترە. ٤- ل سەرحکومەتا ھەرێمێ پێدڤی یە، ب ھەر شێوە و رێکار و میکانیزمەک بیت، بارودوخێ ئابووریێ ھاولاتیێ ھەرێما کوردستانێ بگشتی و فەرمانبەرێ حکومەتێ بتایبەتی چارەسەربکەتن. چونکی ماوەیێ ڤێ قەیرانێ گەلەک درێژبوو. ئەڤ چەندە ژی دێ کارتێکرنەکا نەرێنی یا گشتی یا کوردستانی لدویف خۆ دا ئینیت. ٥- دڤێت حکومەتا ھەرێمێ زۆر بجدی کار ل سەر دوبارە ڤەگەراندنا باوەری و لێک نێزیکبونا ھاوڵاتی و دەسەڵاتێ بکەتن، چونکی ڤێ خالێ ب خالەک گەلەک مەترسی دزانم.

  

 





ئەم هەواڵە 4147جار خوێندراوەتەوە
 
 
ڤیدیۆ گەلەری
سەگێک کچێک لە خنکان رزگار دەکات
سەمایەکی کیکی بەکارەسات کۆتایی پێدێت
ببینە ھاندەرانی بەرازیل چۆن بەرد بارانی ھەڵبژاردەکەیان دەکەن
وانەی وەرزش لە ژاپۆن
به‌ ڤيديۆ.. جيهانى ئه‌مڕۆمان چى به‌سه‌ردا هاتووه‌
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad