English | عربی | Kurdî دواهەواڵ
ڕاستەوخۆ  
 
نێچیرڤان بارزانی: خۆپیشاندانی ئاشتییانە و مەدەنی مافی سرووشتی خەڵکە
2017-12-21 [02:47 AM]

ZNA - هه‌ولێر


 

نێچیرڤان بارزانی رایگەیاند، ئەڵمانیا بە هاوبەشی لەگەڵ فەرەنسا دەیانەوێ یارمەتیدەری هەرێمی کوردستان بن بۆ چارەسەری کێشەکان لە چوارچێوەی دەستووری عێراقدا، وتیشی، خۆپیشاندانی ئاشتییانە و مەدەنی مافی سرووشتی خەڵکە، لە داوای خەڵک تێدەگەین بۆ بژێوی ژیانی، بەڵام دروستکردنی ئاژاوە مانای خۆپیشاندان نییە.

دوای کۆبوونەوەی ئەنجوومەنی وەزیران، نێچیرڤان بارزانی، سەرۆکی وەزیرانی هەرێمی کوردستان لە کۆنگرەیەکی رۆژنامەڤانیدا، رایگه‌یاند، سوپاسی هاوکارییەکانی ئەڵمانیا دەکەین لەڕووی مرۆیی و سەربازییەوە کە هاوکاری زۆر کوردستانی کردووە.

نێچیرڤان بارزانی وتیشی، ئەڵمانیا بە هاوبەشی لەگەڵ فەرەنسا دەیانەوێ یارمەتیدەری هەرێمی کوردستان بن بۆ چارەسەری کێشەکان لە چوارچێوەی دەستووری عێراقدا. ئێمەش پابەندین بە دەستووری عێراق و رێز لە بە بڕیارەکانی دادگای فیدراڵی دەگرین.

لەبارەی خۆپیشاندان و ئاڵۆزییەکانی سنووری سلێمانی و هەڵەبجە، نێچیرڤان بارزانی ئاماژه‌ی به‌وه‌دا، خۆپیشاندانی ئاشتییانە و مەدەنی مافی سرووشتی خەڵکە، لە داوای خەڵک تێدەگەین بۆ بژێوی ژیانی، بەڵام دروستکردنی ئاژاوە مانای خۆپیشاندان نییە، سەرەخۆشی دەکەین لە ماڵباتی ئەو کەسانەی گیانیان لەستداوە و هیوای چاکبوونەوە بۆ برینداران دەخوازین.

سەرۆکوەزیران باسی له‌وه‌ كرد، دەستێکی تێکدەر بۆ بەلاڕێدابردنی خۆپیشاندانی مەدەنی هەیە، ئێمە دەزانین تەحریک هەیە و خەڵک هەیە پاڵپشتی دروستکردنی ئاژاوە دەکات، بەڵام هێزە ئەمنییەکان و گەلی کوردستانیش دژی ئاژاوەن و رێگەنادەن ئاسایشی کوردستان تێکبچێت.

ئه‌وه‌شی خسته‌روو، پێویستمان بە یەکڕیزییە چونکە لەبەردەم هه‌ڕه‌شه‌ی جددین، دەبێ یەکڕیز بین، ئەگەر یەکڕین نەبین ئەوا کەس فریامان ناکەوێ خۆمان نەبێت، پیلانی سەر کوردستان زۆر لەوە گەورەترە کە هەستیپێدەکرێت.

ئه‌وه‌شی روون كرده‌وه‌، داوای خەڵک بۆ بژێوی ژیانی حەقە، بەڵام  دوای رووداوەکانی ئەوم دواییە داهاتی کوردستان بۆ نیوە کەمبووەتەوە، لەگەڵ ئەوەشدا رێگە هەیە بۆ ئەوەی لە ئایندەدا لەم دۆخە ناخۆشە دەربچین.

نێچیرڤان بارزانی وتیشی، لەگەڵ پەرلەمان کۆبووینەتەوە و کۆمیتەیەکی هاوبەشمان لەبارەی پڕۆژەکانی چاکسازی دەبێت. ئێستا چەندین پڕۆژەی چاکسازیمان ئامادەکردووە و لە پەرلەمان گفتوگۆی لەبارەوە دەکرێت.

راشیگەیاند، داوامکردووە رۆژی هەڵبژاردن دیاریبکرێت کە لە سێ مانگ تێپەڕنەبێت، وتیشی، بیانووی هەندێک لایەن لەبارەی لیستی دەنگدەران بیانووە بۆ دواخستنی هەڵبژاردن، ئەگەرنا ئەگەر قسە لەسەر ناوی مردوو بێ، خۆ تەنیا خەڵک لە پارتی نەمردووە.

سەبارەت بە کشانەوەی گۆڕان و کۆمەڵ لە حکومەت، نێچیرڤان بارزانی رایگەیاند، گۆڕان دەمێکە لە حکومەتدا نییە و دەشڵێت، لە حکومەتی خۆجێی ناکشێتەوە، بەڵام لەبارەی کۆمەڵ تێناگەم، لە دەزگا راگەیاندنەکان گوێمان لێبووە کە دەکشێنەوە، دەبوو لە کۆبوونەوەیەکی تایبەتدا باسیان بکردایەوە، رێز لە بڕیارەکەیان دەگرین و بەڵام لەکاتێکدا ئێمە داوای هەڵبژاردن دەکەین بۆ سێ مانگی دیکە، هچ موبەڕیڕ و دەلیلێک نابینین بۆ ئەوە. ئێمە چوار ساڵە پێکەوەین ئەوان نەیاندەزانی کەموکوڕی هەیە کە ئێستا ئەو بڕیارەیان داوە، دەبێ میللەت خۆی بزانێ بڕیارەکەیان بۆ چییە.





ئەم هەواڵە 1270جار خوێندراوەتەوە
 
 
ڤیدیۆ گەلەری
خەونی ھەمو ئافرەتێک , کەسێکی ئاوای ھەبێت
ھەڵوێستێکی جوانی محەمەد سەڵاح
خاڵ بەدەستھێنان ئاوا دەبێت
زۆر خراپ دەکەوێتە خوارەوە
لە قافا گیرا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad