2018-01-18 [02:32 AM]

ئه‌مینداری گشتیی بانکه‌ عه‌ره‌بییه‌کان ڕایگه‌یاند هه‌وڵ هه‌یه‌ بۆ کردنه‌وه‌ی بانکێکی تایبه‌ت به‌ ئاوه‌دانکردنه‌وه‌ی عێراق و سووریا به‌ هاوکاریی چین که‌ سه‌رمایه‌که‌ی ٥٠٠ ملیۆن دۆلار ده‌بێت.

ویسام فه‌تووح ئه‌مینداری گشتیی بانکه‌ عه‌ره‌بییه‌کان له‌ لێدوانێکدا بۆ ئیقتیساد نیوز رایگه‌یاندووه‌ که‌ گفتوگۆکان به‌رده‌وامن له‌ نێوان بانکه‌که‌یان و چین هه‌روه‌ها به‌ به‌شداریی عێراق و لوبنان و ئوردن و میسر له‌سه‌ر دروستکردنی بانکێکی تایبه‌ت به‌ ئاوه‌دانکردنه‌وه‌ی سووریا و عێراق دوای شه‌ڕی داعش. 

باسی له‌وه‌ش كردوه‌، " سه‌رمایه‌ی بانکه‌که‌ له‌سه‌ره‌تادا ٥٠٠ ملیۆن دۆلار ده‌بێ و ده‌بێ هاوکارییه‌کی به ‌به‌رهه‌م نێوان بانکه‌که‌ و بانکی ناوه‌ندیی عێراق و کۆمه‌ڵه‌ی تایبه‌ت به‌ بانکه‌کان ده‌ست پێ بکات بۆ ڕاهێنان و فێرکردنی فه‌رمانبه‌رانی بانک له‌ عێراق."