English | عربی | Kurdî دواهەواڵ
ڕاستەوخۆ  
 
نێچیرڤان بارزانی و عه‌لی لاریجانی فراوانكردنی گفتوگۆكانی هه‌ولێر ــ به‌غدا دووپات ده‌كه‌نه‌وه‌
2018-01-21 [09:10 AM]

ZNA-هەولێر


هه‌ر له‌ چوار‌چێوه‌ی سه‌ردانه‌كه‌یدا بۆ تاران، ئێواره‌ی ئه‌مڕۆ یه‌كشه‌ممه‌ 21/1/2018 شاندی باڵای هه‌رێمی كوردستان به‌ سه‌رۆكایه‌تیی به‌رێز نێچیرڤان بارزانی سه‌رۆك وه‌زیرانی هه‌رێمی كوردستان، له‌لایه‌ن به‌ڕێز عه‌لی لاریجانی سه‌رۆكی په‌رله‌مانی كۆماری ئیسلامیی ئێرانه‌وه‌ پێشوازی كرا.

له‌ دیدارێكدا به‌ڕێز لاریجانی دۆستایه‌تی و په‌یوه‌ندییه‌ دێرینه‌كانی نێوان هه‌ردوو گه‌لی كوردستان و ئێرانی دووپات كرده‌وه‌ و نیگه‌رانیی خۆی به‌رامبه‌ر ئه‌و ڕووداو و بارگرژیانه‌ ده‌ربڕی كه‌ له‌م دواییانه‌دا له‌نێوان هه‌ولێر و به‌غدا هاتنه‌ ئاراوه‌، هه‌روه‌ها هیوای خواست ته‌واوی كێشه‌ هه‌ڵواسراوه‌كانی نێوان هه‌رێمی كوردستان و حكوومه‌تی فیدراڵ به‌ ڕێگه‌ی گفتوگۆ و دیالۆگه‌وه‌ و له‌سه‌ر بنه‌مای ده‌ستوور چاره‌سه‌ر بكرێن و مافه‌ ده‌ستوورییه‌كانی خه‌ڵكی هه‌رێمی كوردستان و ته‌واوی پێكهاته‌كانی عێراق دابین بكرێن، پشتگیریی وڵاته‌كه‌یشی بۆ ئه‌و گفتوگۆیانه‌‌ ده‌ربڕی كه‌ به‌م دواییانه‌ له‌نێوان هه‌ولێر و به‌غدا بۆ چاره‌سه‌ركردنی كێشه‌كان ده‌ستی پێكردووه‌.

له‌ به‌شێكی دیكه‌ی قسه‌كانیدا ئاماژه‌ی به‌ بارودۆخی ئه‌منیی ناوچه‌كه‌ كرد و سه‌قامگیریی ناوچه‌كه‌ی دووپات كرده‌وه‌، هه‌روه‌ها هیوای خواست په‌یوه‌ندییه‌كانی نێوان هه‌رێمی كوردستان و كۆماری ئیسلامیی ئێران له‌ هه‌موو بواره‌كاندا به‌تایبه‌تی له‌ بواری ئابووریدا پێشوه‌چوونی زیاتر به‌خۆیانه‌وه‌ ببینن.

لای خۆیه‌وه‌ به‌ڕێز سه‌رۆك وه‌زیرانی هه‌رێمی كوردستان وێڕای داكۆكی‌ له‌سه‌ر په‌یوه‌ندییه‌ دووقۆڵی و مێژووییه‌كانی نێوان هه‌رێمی كوردستان و كۆماری ئیسلامیی ئێران و دۆستایه‌تیی نێوانیان، دووپاتی كرده‌وه‌ كه‌ هه‌رێمی كوردستان هه‌میشه‌ فاكته‌ری سه‌قامگیری بووه‌ له‌ ناوچه‌كه‌دا و ئه‌مه‌ش سیاسه‌تی حكوومه‌تی هه‌رێمی كوردستانه‌ و هه‌ر واش ده‌مێنێته‌وه‌.

ده‌رباره‌ی په‌یوه‌ندییه‌كانی نێوان هه‌ولێر و به‌غداش، به‌ڕێزیان ئاماژه‌ی به‌ هه‌وڵه‌ به‌رده‌وام و جددییه‌كان بۆ ده‌ستپێكردنی گفتوگۆی نێوان هه‌ردوولا كرد به‌مه‌به‌ستی چاره‌سه‌ركردنی كێشه‌كان و له‌مباره‌یه‌وه‌ ڕۆڵی كۆماری ئیسلامیی ئێرانی له‌ فراوانكردن و سه‌رخستنی گفتوگۆكان به‌پێویست زانی.





ئەم هەواڵە 1435جار خوێندراوەتەوە
 
 
ڤیدیۆ گەلەری
ھەڵوێستێکی جوانی محەمەد سەڵاح
خاڵ بەدەستھێنان ئاوا دەبێت
زۆر خراپ دەکەوێتە خوارەوە
لە قافا گیرا
سامسۆنگ گاڵتە بە ئەپڵ دەکات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad