English | عربی | Kurdî دواهەواڵ
ڕاستەوخۆ  
 
یاریدەدەری سکرتێری گشتیی نەتەوه یەکگرتووەکان بۆ کاروباری سیاسی سەردانی بەغدا و موسڵی کرد
2018-01-23 [04:44 AM]

ZNA- بەغدا


 

لە ئێستادا میرۆسلاڤ جێنکا، یاریدەدەری سکرتێری گشتیی بۆ کاروباری سیاسی، بە سەردانێکی ٣ رۆژە لە عیراقە و دوێنێش(٢٢ کانونی دووەم) لەگەڵ "حەیدەر عەبادی" سەرۆک وەزیرانی عیراق و "ئوسامە نوجەیفی" جێگری سەرۆک کۆمار و "سەلیم جبوری" سەرۆکی پەرلەمان و دەستەی تازەھەڵبژێردراوی کۆمیساران کۆبووەوە. ئەوان لە کۆبوونەوەکانیاندا باسیان لەوە کرد کە چۆن نەتەوە یەکگرتووەکان بتوانێت بە باشترین شێوە ھاوکاری عیراق بکات بە تایبەتیش لە ھەڵبژاردنەکانی پەرلەمان و ئەنجومەنی پارێزگاکان لە ١٢ی مانگی ئایاری داھاتوودا لەگەڵ تاوتوێکردنی پەیوەندییەکانی ھەولێر و بەغدا و ئاودانکردنەوە و سەقامگیرکردنی عیراق و کۆبوونەوەی نێودەوڵەتیی کوێت بۆ ئاوەدانکردنەوەی عیراق و پرۆسەی ئاشتەوایی لە عیراقدا. 

 

ھەر ئەمرۆش، جێنکا سەردانی موسڵی کرد و بەچاوی خۆشی بووژانەوە و ھەستانەوەی خەڵکی ئەو شارەی بینی لە مکوڕییان بۆ سەرلەنوێ بنیاتنانەوەی ژیانیان دوای ٣ ساڵ لە کۆژان لەژێر دەسەڵاتی داعش (دەوڵەتی ئیسلامی عیراق و شام )دا. ئەو ھەروەھا سەردانی گەڕەکە وێرانبووەکانی ئەو شارەشی کرد کە تێیدا سەردەمێک داعش ئەوەی کە پێی دەوترێت "خەلافەت"ی راگەیاندبوو.

 

ئەو لەمبارەوە وتی: "سەرلەنوێ کرانەوەی بازاڕ و قوتابخانە و نەخۆشخانە و جموجوڵی ئازادانەی ھاوڵاتیان لەسەر شەقامەکان و ئۆتۆمبێلی پڕ لە کەلوپەلم بینی کە لە چادرگەکانی ئاوارەکانەوە بەرەوە ناو شار دەھاتنەوە. ئێمە پێویستە ھەموومان بەیەکەوە کار بکەین بۆ ئاوەدانکردنەوەی زیاتر و رێگەش نەدەین کە جارێکی تر تیرۆر بتوانێت شوێنپێی خۆی لەم ناوچە دێرین و گرنگەدا ھەبێت. نەتەوە یەکگرتووەکان چی لەدەستی بێت دەیکات بۆ یارمەتیدانی خەڵک بۆ سەرلەنوێ ھەستانەوەیان و دروستکردنەوەی شارەکەیان لە ئاشتی و خۆشگوزەرانیدا".

 

جێنکا چاوی بە چەند بەرپرسێکی ناوخۆیی کەوت لە موسڵ بە پارێزگاریشەوە بۆ دەربڕینی وەستانی نەتەوە یەکگرتووەکان شانبەشانی خەڵکی عیراق بەتایبەتیش ھاوڵاتیانی نەینەوا لە کریستان و ئێزیدی و شەبەک و کەمینە نەتەوەیی و ئاینەکانی تر کە زەبری ھەرە کوشندەیان لەلایەن داعشەوە بەرکەوتووە.

 

وتی: "ئەمڕۆ لێرەم بۆ ئەوەی پیرۆزبایی لە خەڵکی نەینەوا و ھەموو عیراقییەکان بکەم بۆ سەرکەوتنە مێژۆوییەکەیان بەسەر داعشدا کە ھەرگیز بێ یەکڕیزی خەڵکی عیراق نەدەھاتە دی. لەلایەکی ترەوە، یەکڕیزی پێشمەرجی ئاشتەوایی و پێکەوەژیانیشە لەسەر ھەموو ئاستەکاندا و ھەروەک چۆن بەردی بناغەی دەستەبەرکردنی ئاشتیشە".  

 

جێنکا ھەروەھا سەردانی نەخۆشخانەی گەورەشی کرد لە ناوچە ئازادکراوەکاندا کە ھەم دوا بارەگای داعش بوو و ھەمیش تاقیگەیەک  بوو  بۆ دروستکردنی بۆمب و تەقینەوە. پاککردنەوە و نۆژەنکردنەوەی ئەم بینایە گرنگە و یەکێکە لەو چەندان پرۆژەیەی کە ئاژانسی نەتەوە یەکگرتووەکان بۆ کاروباری مین و رێکخراوی نەتەوە یەکگرتووەکان بۆ گەشەپێدان(یۆ ئین دی پی) ھاوبەشانە کاری لەسەر دەکرێت بۆ ئەوەی خەڵک بتوانن بگەڕێنەوە سەر ژیانی رۆژانەیان و لە خزمەتە تەندروستییە بنەڕەتییەکانیش سوودمەند بن.

 

زیاتر وتی: "لەراستیدا راچڵەکام بەوەی کە ئەمڕۆ لە موسڵ بینیم و ھەروەھا بەو چیرۆکانەش کە بیستم کە باسیان لە دژواریی و سەختیی ژیان دەکرد لەسەردەمی داعشدا. بەڵام من لەھەمان کاتیشدا دڵخۆش بووم بەو ھیوا و شێلگیرییەی کە لە خەڵکم بیست کە دەیانەوێت لە کەشێکی ئاشتی و شکۆداری بێ ترس و توقاندندا ژیان بەسەر بەرن".

 

ئەو بەیانی چاوی بە "نوری مالیکی" جێگری سەرۆک کۆمار و "ئیراھیم جەعفەری" وەزیری کاروباری دەرەوە  و "عەمار حەکیم" پیاوی ئاینی و سەرۆکی ‌حیزب و ژنان و سەرکردەی کەمینەکان دەکەوێت.





ئەم هەواڵە 913جار خوێندراوەتەوە
 
 
ڤیدیۆ گەلەری
سەمایەکی کیکی بەکارەسات کۆتایی پێدێت
ببینە ھاندەرانی بەرازیل چۆن بەرد بارانی ھەڵبژاردەکەیان دەکەن
وانەی وەرزش لە ژاپۆن
به‌ ڤيديۆ.. جيهانى ئه‌مڕۆمان چى به‌سه‌ردا هاتووه‌
سەیرترین رووداوەکانى ھاتووچۆ
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad