English | عربی | Kurdî دواهەواڵ
ڕاستەوخۆ  
 
پەرلەمانی کوردستان لەشكركێشى و هێرشەكانی بۆ سەر خەڵكی عەفرین ئیدانه كرد
2018-01-30 [07:48 AM]

ZNA- هەولێر


 

پەرلەمانی كوردستان چەند ڕاسپاردەیەك لەسەر دۆخی عەفرین دەردەكات و سەرۆكی فراكسیۆن و كوتلەكانی نێو پەرلەمانی كوردستان، پەیامی خۆیان لەسەر دۆخی عەفرین خستەڕوو، كە سەرجەمییان ئیدانەی لەشكركێشى و هێرشەكانیان بۆ سەر خەڵكی عەفرین كرد و داواى ڕێگەچارەی ئاشتییانە و بەهاناوەچوونی لێقەوماوان و پاراستنی یەكڕیزیی نێوماڵی كوردییان كرد و، پڕۆژەیاسای ڕێكخستن و چاندن و گواستنەوەی ئەندامەكانى جەستەی مرۆڤیش پەسند كرا.

 

سەعات ١١ی پێشنیوەڕۆی ئەمڕۆ ٢٠١٨/١/٣٠، پەرلەمانى كوردستان بە سەرۆكایەتیی د. جەعفەر ئیبراهیم ئێمینكی، جێگرى سەرۆكی پەرلەمانى كوردستان و بێگەرد دڵشاد تاڵەبانی، سكرتێری پەرلەمان، دانیشتنی ژمارە (٥)ى ئاساییی خولی پاییزە، ساڵی پێنجەم، لە خولی پێنجەمى هەڵبژاردنی ئەنجام دا.

 

سەرەتا جێگرى سەرۆكی پەرلەمان، بەرنامەى كارى دانیشتنەكەى خوێندەوە، كە لە شەش خاڵ پێك هاتبوو؛ خاڵی یەكەم بریتی بوو لە گفتوگۆكردنی پڕۆژەیاسای ڕێكخستن و چاندن و گواستنەوەی ئەندامەكانى جەستەی مرۆڤ، بە پێی ماددەكانی (٧٥،٧٤،٧٢)، لە پەیڕەوی ناوخۆی پەرلەمانی كوردستان ژمارە (١)ی ساڵی ١٩٩٢ى هەمواركراو، خاڵی دووەمیش بریتی بوو لە گفتوگۆكردنی پڕۆژەیاسای هەموارى یاسای هاتوچۆى ژمارە (٨٦)ى ساڵی ٢٠٠٤ لە هەرێمى كوردستان-عێراق، بە پێی ماددەكانی (٧٥،٧٤،٧٢) لە پەیڕەوی ناوخۆی پەرلەمانی كوردستان ژمارە (١)ی ساڵی ١٩٩٢ى هەمواركراو، خاڵی سێیەمیش بریتی بوو لە خوێندنەوەى یەكەمی پڕۆژەیاسای پاراستنی تۆڕ و دامەزراوەكانی ئاو و ئاوەڕۆ لە هەرێمی كوردستان-عێراق، كە لە لایەن ئەنجومەنی وەزیرانەوە پێشكەش كراوە، بە پێی ماددەی (٧١) لە پەیڕەوی ناوخۆی پەرلەمانى كوردستان، ژمارە (١)ی ساڵی ١٩٩٢ى هەمواركراو، خاڵی چوارەمی بەرنامەى كاریش بریتی بوو لە دانانى ئەو ئەندامە بەڕێزانەى پەرلەمان لە لیژنە هەمیشەییەكانی پەرلەمانی كوردستان، بە پێی ماددەى (٤٤) لە پەیڕەوی ناوخۆی پەرلەمانی كوردستان ژمارە (١)ی ساڵی ١٩٩٢ى هەمواركراو: زیادكردنی ئەندامی پەرلەمان بەڕێز ئەیوب عەبدوڵڵا ڕەسووڵ، بۆ سەر لیژنەی كاروبارى پەرلەمان، هەروەها زیادكردنی ئەندامى پەرلەمان، بەڕێز عەبدولڕەحمان فارس عەبدولڕەحمان (ئەبووكاروان)، بۆ سەر لیژنەی كاروبارى كۆمەڵگەی مەدەنی، خاڵی پێنجەمی بەرنامەى كاریش بریتی بوو لە خوێندنەوەی پەیامی فراكسیۆنەكان سەبارەت بە بارودۆخی ئێستای عەفرین، خاڵی شەشەم و كۆتاییی بەرنامەی كاریش بریتی بوو لە گفتوگۆكردنی پڕۆژەى پەیڕەوی ناوخۆی پەرلەمانی كوردستان، كە لە لایەن لیژنەی كاتى بۆ پێداچوونەوەى پەیڕەوی ناوخۆ ئامادە كرابوو، بە پێی بڕیاری ژمارە (٢٦)ى ساڵی ٢٠١٤ و بڕگەی (٨) لە ماددەى (پەنجاو شەشەم)ى یاسای هەڵبژاردنی پەرلەمانی كوردستان ژمارە (١)ى ساڵی ١٩٩٢ى هەمواركراو و پاڵپشت بە ماددەى (٩٤)ى پەیڕەوی ناوخۆی  پەرلەمانی كوردستان، ژمارە (١)ى ساڵی ١٩٩٢ى هەمواركراو.

 

لە دەستپێكی دانیشتنەكەدا سەرۆكایەتیی پەرلەمان سوپاسی ئامادەبووانی نوێنەری خەڵكی كانتۆنی كۆبانێی ڕۆژئاڤای كوردستان و ڕێكخراوی سی دی ئۆی كرد لە دانیشتنەكەدا و دواتر بۆ ڕێزلێنان لە قوربانیانی عەفرین، پەرلەمانتاران و ئامادەبووان دەقیقەیەك بە بێدەنگی وەستان.

 

لە كاتی خستنەڕووی بەرنامەی كاریش، پێشنیاز كرا خاڵی پێنجەمی بەرنامەی كار كە تایبەت بوو بە خوێندنەوەی پەیامی فراكسیۆنەكان سەبارەت بە بارودۆخی ئێستای عەفرین، بكرێتە خاڵی یەكەمی بەرنامەی كاری دانیشتنەكە و پێشنیازەكەش بە زۆرینەی دەنگ پەسند كرا، لەوبارەشەوە، لە لایەن چەند پەرلەمانتارێكەوە داوا كرا، دانیشتنێكی تایبەت و نائاسایی لەوبارەیەوە بەڕێوە بچێت، لەبەرامبەردا سەرۆكایەتیی پەرلەمان ئەوەی خستەڕوو، كە سەرجەم فراكسیۆن و پێكهاتەكانی ناو پەرلەمانی كوردستان دەتوانن لە چوارچێوەی بەرنامەی كاری دانیشتنی ئەمڕۆ پێشنیاز و هەڵوێستەكانیان بخەنەڕوو. هەرچەندە زۆرینەی دەنگی پەرلەمانتاران دەنگیان دا بەوەى كە بڕگەی عەفرین بێتە پێشەوەی ڕیزبەندی و وەك خۆی بڕوات، بەڵام فراكسیۆنی گۆڕان سوور بوون لەسەر پێشنیازی گرێدانی دانیشتنێكی نائاسایی و بەو هۆیەوە بایكۆتی دانیشتنەكەیان كرد.

 

پاشان د. جەعفەر ئیبراهیم ئێمینكی، جێگرى سەرۆكی پەرلەمانى كوردستان لەبارەی دۆخی عەفرینەوە ڕایگەیاند: "پەیامی گەلی كوردستان و پەرلەمانی كوردستان، پەیامی ئاشتیخوازانەیە، سەرباری زوڵم و زۆردارییەكان، هەمیشە گەلی كورد دەستپێشخەر بووە بۆ ئاشتەوایی." ئێمینكی، ڕاشیگەیاند: "عەفرین پەناگەی لێقەوماوان و ئاوارە غەیرە كوردەكان بووە و سیمبولی خۆڕاگری و ئاشتەواییە و لانكەی پێكەوە ژیانە." جێگری سەرۆكی پەرلەمان ڕاشیگەیاند: "هەرێمی كوردستان بەردەوام لە پەیوەندیی باشدا بووە لەگەڵ ڕۆژئاڤا و پەرلەمانی كوردستانیش چەندین سەردانی مەیدانیی بۆ كانتۆنەكانی ئەو پارچەیە ئەنجام داوە، لە دوایین سەردانیشدا شاندی فەرمیی پەرلەمانی كوردستان لەسەر داخوازیی كۆمیسیۆنی هەڵبژاردن بەشدار بوو لە پرۆسەی چاودێریی هەڵبژاردنەكانی ئەو كانتۆنانەدا، هەروەها هەرێمی كوردستان سەروەرییەكی مێژوویی تۆمار كرد، كاتێك هێزی پێشمەرگە بە هاریكاریی وڵاتانی دراوسێ چوون بۆ ڕزگاركردنی كۆبانێ".

 

هەر لە چوارچێوەی گفتوگۆكردنی دۆخی عەفرین، بێگەرد دڵشاد تاڵەبانی، سكرتێری پەرلەمان ڕایگەیاند: "سەرجەم فراكسیۆنەكانی پەرلەمانی كوردستان بەبێ جیاوازی یاداشتییان لەبارەی دۆخی عەفرین ئاراستەی سەرۆكایەتیی پەرلەمان كردووە، بۆیە لە ژێر ڕۆشناییی ئەو بارودۆخە ناهەموارەدا کە ئێستا گەلی كوردستان ڕووبەڕووی بووەتەوە، پێویستە سەرجەم لایەنە كوردییەكان بە یەكدەنگی و یەكهەڵوێستییەوە ڕووبەڕووی تەحدییەكان ببینەوە و ڕەچاوی بارودۆخی هەنووكەی هەرێمیش بكەین و هەر شتێكیش بووبێت لە سۆنگەی پەرۆشییەوەیە، نەك پەراوێزخستن، بۆیە دەبێت دۆخی عەفرین زیاتر یەكمان بخات و دوورمان بخاتەوە لە هەر پەرچەكردارێكی نێگەتیڤییانە و هەرێم و پەرلەمانی كوردستانیش سەرجەم پەیوەندی و كەناڵەكانی خۆی دەخاتەگەڕ، بۆ پشتیوانیكردنی عەفرین و ڕێگەگرتن لەو زوڵمەی كە لە گەلەكەی دەكرێت".

 

پاشان سەرۆكی سەرجەم فراكسیۆن و كوتلەكانی ناو پەرلەمانی كوردستان، پەیامی خۆیان لەسەر دۆخی عەفرین خستەڕوو، كە سەرجەمییان ئیدانەی لەشكركێشى و هێرشەكانیان بۆ سەر خەڵكی عەفرین كرد و داواى ڕێگەچارەی ئاشتییانە و بەهاناوەچوونی لێقەوماوان و پاراستنی یەكڕیزیی نێوماڵی كوردییان كرد.

 

دوای تەواوبوونی پەیامی سەرجەم فراكسیۆن و كوتلەكانی ناو پەرلەمانی كوردستان، سەرۆكایەتیی پەرلەمان لیژنەیەكی لە نوێنەرایەتیی فراكسیۆنەكان ڕاسپارد بۆ جێكردنەو ەو پوختكردنەوەی پێشنیاز و هەڵوێستەكان لە چوارچێوەی ڕاسپاردەیەكدا.

 

پاشان خاڵی دووەمی بەرنامەی كاری دانیشتنەكە خرایەڕوو، كە د. ڕێكەوت حەمە ڕەشید، وەزیری تەندروستیی حكوومەتی هەرێمی كوردستان ئامادەى دانیشتنەكە بوو، كە بریتی بوو لە گفتوگۆكردنی پڕۆژەیاسای ڕێكخستن و چاندن و گواستنەوەی ئەندامەكانى جەستەی مرۆڤ، كە لە خولی گرێدانی دانیشتنەكانی ساڵی ٢٠١٥ خوێندنەوەی یەكەم و دووەمی بۆ ئەنجام درابوو، ڕاپۆرتی هاوبەشی لیژنە پەیوەندیدارەكان بووە بنەمای گفتوگۆكان و  ماددەی حەڤدەیەم خرایەڕوو، كە بە پێی ڕاپۆرتی هاوبەش داوای لابردنی ماددەكە كرابوو، ئەم پێشنیازەش بە كۆی دەنگ پەسند كرا. ماددەی هەژدەیەم تا بیست و چوارەمی پڕۆژەیاساكەش تایبەت بوو بە حوكمە سزاییەكان و دوای پێداچوونەوە و داڕشتنەوەی ماددە و بڕگەكان بە پێی تێبینی و سەرنجی لیژنە و پەرلەمانتاران و وەزیری تەندروستی، بەجیا خرانە دەنگدانەوە و ماددەكانی (١٩-٢١-٢٣) بە كۆی دەنگ و ماددەكانی دیكەش بە زۆرینەی دەنگ پەسند كران.

 

ماددەكانی بیست و چوار تا سی و دووى پڕۆژەكەش تایبەت بوون بە حوكمە كۆتاییەكان و لەگەڵ هۆكارەكانی دەرچوون بەجیا خرانە دەنگدانەوە و بە كۆی دەنگ پەسند كران.

 

دواتر سەرۆكایەتیی پەرلەمان كۆی پڕۆژەیاسای ڕێكخستن و چاندن و گواستنەوەی ئەندامەكانى جەستەی مرۆڤی خستە دەنگدانەوە و بە كۆی دەنگ پەسند كراپاشان سەرۆكایەتیی پەرلەمان چەند دەنگۆیەكی ناڕاستی ڕەت كردەوە لەبارەی ئەوەی گوایە سەرۆكایەتیی پەرلەمان ڕێگر بووە لە ناردنی چەكی قورس بۆ ڕۆرژئاڤا و لەو بارەیەوە ڕایگەیاند: "لێرەولەوێ چەند پرۆپاگەندەیەكی نادروست سەری هەڵداوە، لێرەوە بە شایەدیی سەرجەم فراكسیۆنە بەشداربووەكانی ئەم دانیشتنە ڕوونی دەكەینەوە، كە سەرباری ئەوەی ڕێگە درا سەرجەم فراكسیۆن و پێكهاتەكانی ناو پەرلەمانی كوردستان بە ئازادانە هەڵوێستی خۆیان لەسەر دۆخی عەفرین و بە ئامادەبوونی نوێنەری خەڵكی كانتۆنی عەفرین دەرببڕن، لیژنەیەك لە ئەندامییەتیی سەرجەم فراكسیۆنەكانیش ڕاسپێردران بۆ پوختكردنەوە و جێكردنەوەی سەرجەم هەڵوێست و پێشنیازەكان دەستی بەكار كرد و ڕەشنووسێكی چەند خاڵیی ئامادە كردووە و دواتریش بە ناوی پەرلەمانی كوردستان بڵاو دەكرێتەوە".

 

سەرۆكایەتیی پەرلەمان جگە لەوەی دووبارە سەرجەم ئەو پرۆپاگەندە و تۆمەتە ناراستانەی ڕەت كردەوە، هیوایان خواست كە هەڵوێستی هاوشێوە دووبارە نەبنەوە.

 

دواتر لە لایەن پەرلەمانتار، سالار مەحموود، بە نوێنەرایەتیی سەرجەم فراكسیۆن و پێكهاتەكانی ناو پەرلەمانی كوردستان، ڕەشنووسی ڕاسپاردەكان خوێندرایەوە، كە لە دوو بەش پێك هاتبوو و چەند خاڵێك لەخۆ دەگرێت.

 

پاشان جێگری سەرۆكی پەرلەمان، سوپاسی نوێنەرانی خەڵكی عەفرینى كرد بۆ ئامادەبوونیان، هەروەها لە چوارچێوەی پێشنیازەكان، پێشنیازی ئەوە كرا كە ١١١ نەمامی زەیتون وەك پشتگیرییەك لە خەڵكی عەفرین و ڕێزگرتن لە قوربانیانی و نیشاندانی ڕۆحی ئاشتییانەی كورد، لە باخچەی پەرلەمان بچێندرێت.

 

هەروەها جێگری سەرۆكی پەرلەمان ڕاشیگەیاند: "دوای ئەوەی ڕاسپاردەكان ڕێكارە پێویستییەكانیان تەواو دەكرێن، بەفەرمی بڵاو دەكرێنەوە".

 

دواتر بڕیار درا، خاڵەكانی دیكەی بەرنامەی كار لە دانیشتنی سەعات ١٠ی سەرلەبەیانیی سبەی چوارشەممە ٢٠١٨/١/٣١دا تەواو بكرێن.





ئەم هەواڵە 748جار خوێندراوەتەوە
 
 
ڤیدیۆ گەلەری
سەگێک کچێک لە خنکان رزگار دەکات
سەمایەکی کیکی بەکارەسات کۆتایی پێدێت
ببینە ھاندەرانی بەرازیل چۆن بەرد بارانی ھەڵبژاردەکەیان دەکەن
وانەی وەرزش لە ژاپۆن
به‌ ڤيديۆ.. جيهانى ئه‌مڕۆمان چى به‌سه‌ردا هاتووه‌
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad