English | عربی | Kurdî دواهەواڵ
ڕاستەوخۆ  
 
فەرهەنگی میراتی
2018-04-10 [12:25 PM]

نووسینی: ئاریان فەرەج


ئەوەی عێراقی توشی نەهامەتی و جۆرەها کارەسات کرد، ئەوەی ناوچەکەی توشی زنجیرەیەک شەڕی ماڵوێانکەری خوێناوی کرد، ئەوەی تۆوی شۆڤێنیزم و کەراهییەتی نەتەوەیی و مەزهەبی چاند و ئەوەی هەموو سەروەت و سامانی بەشەری و ماددی عێراقی لەشەڕە عەبەسی و بێ هودە و بێ جەدواکاندا بەخەسار دا، ئەوەی هەموو ئەو تاوان و جینایەتانەی بەرپا کرد سەران و کەسایەتییە سەرکردەکانی بەعس نەبوون، بەڵکو هۆکار و پاڵنەری کۆی ئەو جینایەتانە فەرهەنگ و کولتورێک بوو کە سەرانی بەعس و بەعسییەکانی لەسەر پەروەردە ببوون. باوەڕ و موعتەقەدێکی رەش و رەگەزپەرستانەی تاکڕەوی پاکتاوکاری فاشی بوو کە بووە پێخۆر و رێنیشاندەری بەعسییەکان بەرەو ئەو رێگای تاوانە. 
روخاندنی رژێمی بەعس گەر تەنیا لەوەدا کورت بکرێتەوە کە دەستەیەک پیاوکوژ و خوێنڕێژ دەبوا لە دەسەڵات نەمێنن، بچوککردنەوەی ئەو تەجروبە تاڵەیە کە بەسەر عێراقدا هات، ئەو تاونبارانە تەنیا ئامێری جێبەجێکردنی دنیابینی و فەرهەنگێک بوون کە ئەگەر خودی فەرهەنگەکە مەحکوم و تەحریم و تەجریم نەکرێ، لە هەر ئان و زەمانێکدا دەکرێ رۆبۆت وئامرازی بەشەریی بۆ دوبارە ژیاندنەوە و هەراشبونەوەی بۆ بڕەخسێ . 
پاش تێپەڕینی پازدە سال بەسەر روخانی دەسەڵاتی بەعسییەکاندا. پاش ئەوەی عێراق بە پازدە ساڵ رەنگ و رویەکی تازەی لێ نەنیشت، کێشەی نەتەوەکانی نەک چارەسەر نەکران بەڵکو دوبارە گەیشتەوە ئینکاری ماف و رقی قەومەچییانە و پێکادان و هەوڵی زۆرینەی نەتەوەیی بۆ خۆسەپاندن، سیستمی دەسەڵات لە سەر فدرالیزم و شەراکەت و دیموکراتی تەوافوقی و دەوڵەتی مەدەنی لەنگەری نەگرت و بە پێچەوانەوە مەیلی حوکمی مەرکەزی و دەوڵەتی تائیفی و پشتکردنە دیموکراسی پەرەی سەندەوە، لە هەل و مەرجێکی لەم جۆرە و دوای پازدە ساڵ حەقمانە بپرسین: ئەرێ ئەوەی روخێندرا سیستم و فکری بەعس بوو یان تەنیا سەدام و مەجلیسێکی دە پازدە کەسی؟ ئەرێ ئەوەی دادگایی کرا و ئیعدام کرا فکری شۆڤێنیی بەعس بوو یان تەنیا سەرانی بەعس؟ ئایا دیکتاتۆریەت تەجریم کرا یان تەنیا دیکتاتۆرێک کە نەیتوانی دیکتاتۆرێکی باش بێت؟ ئایا بەعسیزم بە مانای نکۆڵیکردن لە مافی گەلان و بە مانای تاکڕەوی و خۆسەپاندی زۆرینە و بە مانای سیستمی مەرکەزیەتی دەسەڵات دادگایی کرا تا هەرگیزا و هەرگیز فەرهەنگی لەو جۆرە لە عێراق شین نەبتەوە، یاخود ئەوەی دادگایی کرا تەنیا کەسانێک بوون و دەنا فەرهەنگ و کولتورەکە مایەوەو بێ تاوان دەرچوو؟ 
عێراق گیرۆدەی سەدام نەبوو تا بە لەسێدارەدانی ببێتە شامی شەریف، عێراق گیرۆدەی سەدامیزم و فکری توندرۆی قەومەچێتی و توندڕۆیی تائیفی بوو، گیرۆدەی فەرهەنگە نەک ئەم شەخس و ئەو شەخس، تا ئەو فەرهەنگەش مەحف نەبێتەوە، بینینی ئەو شامی شەریفە مەحاڵە، دەبێ ئەو میراتە کوێربێتەوە دەنا تا ئەو میراتە بمێنێ میراتگری هەر دەبن.





ئەم هەواڵە 4876جار خوێندراوەتەوە
 
 
ڤیدیۆ گەلەری
فرۆکەوانێک بەم شێوەیە رێز لە مامۆستاکەی دەگرێت
کچێک بە موعجیزە رزگاری دەبێت
لە عێراق بەم شێوەیە ئاوی باران لادەدەن ، بە دڵنیایی دوو جار سەیری دەکەیەوە
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad