English | عربی | Kurdî دواهەواڵ
ڕاستەوخۆ  
 
حەشد بە یەک کورسی ڕازی دەبێ
2018-04-28 [01:48 AM]

نووسین: ئاسۆ حاجی



ئەمەریکا گرەو لە سەر عەبادی دەکا و هێز و پێگەی خۆی لە عێڕاق بەسەرکەوتنی ئەو گرێداوە، ڕەنگە سیستەمی نوێی دەنگدان کە کۆنتڕۆلەکەی لە دەست ئەمەرکایە(وەک باسدەکرێ) عەبادی بکاتە لیستی براوە کە چەند کورسیێک لەوانەی دیکە زۆرتر بباتەوە،بەڵام ئایا ئەو بردنەوەیە دەبێتە مایەی بردنەوەی پۆستی سەرۆک وەزیران؟کە ئەوە ئامانجی ئەمەریکایە.
لە بەرامبەر ئەمەریکا ئەجێندای ئێرانی هەیە کە لە دوای ڕوخانی سەدام هیچ کەسێک نەبۆتە سەرۆکوەزیرانی عێڕاق بەبێ ڕەزامەندی ئێران،ئەوجارەش بەدوای هەمان ڕۆڵ دەگەڕێ.
ئەمەریکا ئەگەر تەنها کارتی عەبادی بەدەستەوەیە،ئێران زیاتر لە کارتێکی هەیە،هەموو هێزە شیعەکان و بەشێک لە سوننە و هێزی کوردستانی لە بن سێبەری ئەو دەجولێن کە هەموو کات دەتوانن بە ئاماژەیەکی ئێران پشتی عەبادی بە زەویدابدەن.
لە ناو ماڵی شیعیدا کە عەبادی ناوێرێ لێی دوورکەوێتەوە هەموو شتێک لە نێو ئەو ماڵەدا بە پێوانەی دڵسۆزی بۆ منداڵەکانی پێغەمبەر و پێگیریان بە نوێنەری ئیمام زەمان کە خۆی لە وەلی فەقیه و مەرجەعیەتی مەزنی شیعە دەبینێتەوە،کە ئەوجارەیان مەرجەعیەت تەنها بە لێدوان و پاڵپشتی بەشداری هەڵبژازدن نابێت بەڵکو هێزێکی مەزهەبی عەقائیدی دەستکردی خۆی بەشدارە لە هەڵبژاردن و چاوی لە کورسی سەرۆک وەزیرانە، بۆیەشە ئێستا لە نەجەف و کەربلا دەنگ بۆ ئەوە بەرز دەبێتەوە کە پێویستە پیاوانی ئاینی بەشێک بن لە بڕیاری دیاریکردنی ئەو کەسەی دەبێتە سەرۆک وەزیر، کە ئەوەش لایەنی عەقائیدیی و پابەندبوون بە مەرجەعیەتەوە دەکاتە پێوەری هەڵبژاردن و پاڵپشتیکردن.
لە عێڕاق ئێستا جگە لە مەزار و ناوی ئیمامەکانی شیعە دوو ناوی دیکە سیفاتی پیرۆزیان دەدرێتە پاڵ ئەوانیش مەرجەعیەت و حەشدی شەعبین.
پێدانی سیفەتی پیرۆزی بە حەشدی شەعبی و زۆر جاریش ناوهێنانی حەشد بە سوپای پیرۆزی مەرجەعیەت و سوپای پیرۆزی ئیمام زەمان، جگە لە زەمینەسازی و ئامادەکاری بۆ گواستنەوەی دەسەڵات لە سەرکردە سیاسیە شیعە نەریتیەکان بۆ کەسانێک کە پاسەوانی بە وەفا و تاقیکراوەی ئێرانن هیچی دیکە نیە،کەسانێک کە لە ئێران و لە ناو ئەدەبیات و ڕاهێنان و عەقیدە و دونیابینی سوپای پاسداران گەورە بوون و ئێستاش وەک موجاهیدێکی وەلی فەقیه خۆیان دەناسێنن و ئەوەشیان پێ بەرزترین پلەیە.
وەرگرتنی دەسەڵات لەلایەن حەشدی شەعبیەوە،ئەو هەڵبژادنەی پەڕلەمانی دەکاتە وەچەرخانێکی مێژووی لە عێڕاق کە لەمەودوا چیتر هەڵبژاردن لە نێوان پێکهاتە و لیستی جیای نەتەوەیی و ئاینی و مەزهەبی نابێ بەڵکو لیستەکان تەنها ناویان جیادەبێ بەڵام ناوەڕۆک دەبێ ڕەزامەندی حەشد و مەرجەعیەتی پێوەبێت،حەشد وەک بەرپرسانی ئێرانی چەندین جار ڕایانگەیاندەوە کۆپیەکی سوپای پاسدارانە ئەوە بە دڵنیایەوە حوکمڕانیەکەشی حوکمڕانی سوپای پاسداران دەبێت.
ئەمەریکا ئەوە باش دەزانێ بۆیە کار لە سەر ڕازیکردنی کورد و سوننە دەکات تا پاڵپشتی عەبادی بکەن، کە لەوە ناچێ تێیدا سەرکەوتوبێت،چونکە ئێران دەمێکە ناوماڵی کوردی پەرت و بڵاوکردووە و هێزگەلێک کە دەستیان خستە نێو دەستی حەشد لەوە ناچێ بتوانن دستیان بەربدەن.
دۆخی سوننە ڕەنگە لە یەک خاڵ لە کورد باشتربێ،سعودیە و ئوردن،تورکیاش تا ڕادەیەک پاڵپشتیان دەکەن و هەوڵی کۆکردنەوەیان دەدەن،بەڵام بەو دۆخە شەپڕێوەیان لە موسڵ و تکریت و ئەنباڕ زەحمەتە توانای ڕوبەڕوبوونەوەی شیعەیان هەبێت.
بۆیە ئەمەریکا زەحمەتە لەو کارەیدا ئەوەندە سەرکەوتوبێ بتوانێ عەبادی بکاتەوە سەرۆک وەزیران،چونکە هەر هاوپەیمانەتیێک کە عەبادی لە دەرەوەی ماڵی شیعه دروستی بکات ئەوە دروستکردنی تابوتێکە بۆ ئایندەی سیاسی خۆی،ئێران ئەوەی بە کردەوە پێ ڕاگەیاندوە کاتێک بۆ چەند کاتژمێرێک بەهێزترین و گەورەترین هاوپەیمانێتی بۆ دروست کرد و پاشانیش بە چەند سعاتێکی دیکە لەبەریەکی هەڵوەشاندەوە و عەبادی بە تەنیا هێشتەوە،ئەو دەرسدانەی عەبادی جەنەڕال قاسم سولەیمانی فەرماندەی سوپای قودسی سوپای پاسداران لە بەغداوە سەرپەرشتی دەکرد بۆ ئەوەی عەبادی تێبگات کە هێز و بوونی بە هێز و بوونی ئەوانەوە بەندە،لە دەرەوەی بازنەی ئەوان بە تەنیا دەمێنێتەوە،بۆیە تەنانەت عەبادیش بۆ ئەمەریکا گرێنتی نیە، ئەگەری ئەوە هەیە دوای بردنەوەی بچێتەوە ناو بازنەی پیرۆز و لە بن سێبەری مەرجەعیەت بکرێتەوە سەرۆک وەزیران،وەک چۆن نوری مالیکی دەرسێکی وەهای دایە ئەمەریکیەکان و بە لێدانی ڕکابەرەکی موقتەدا سەدر خۆی وەک هاوپەیمانێکی ئەمەریکا خۆشەویست کرد و دواتریش لە سەربازێکی بەوەفای فەیلەقی قودس زیاتری لێدەرنەچوو.
 ئەمەریکا لە ئەزموونی پازدە ساڵی ڕابردووی لە عێڕاقدا هەڵە و دووبارەکردنەوەی هەڵەکانی بوونە هۆکاری بەهێزبوونی ئێران بە شێوەیێک گرنگترنیان خاڵە ستڕاتیژیەکانی لە یەمەنەوە بگرە تا دەگاتەوە لوبنان،ئەگەر ئەمەریکا حیساباتی هەڵبژادنیشی تەنها هەڵەیەکی دیکە بی لە عێڕاق وەک چۆن لە کەرکوک حەشدی شەعبی کردە پاڵەوان و دەستی پەڕلەمان و حکومەتی عێڕاقی کردەوە بە تەرخانکردنی گەورەترین بودجە بۆ ئەو هێزە مەزهەبیەی کە بە فتوایەکی مەرجەعیەتی شیعە دروست بووە و بەو فتوایەش بە بڕیاری پەرلەمان  کرایە هێزێکی یاسایی و دواین دیاریش لە عەبادیەوە بوو کە موچە و ئیمتیازاتیان هاوتای موچە و ئیمتیازاتی سەربازانی سوپای عێڕاق بکرێ.
حەشدی شەعبی کە حاکمی سەربازی بێ ڕکابەرن لە عێڕاق، بە بردنەوەیان لە هەڵبژاردن ئەوە هێزی سیاسی و شەرعیەتی دەسەڵاتیشیان دەکەوێتە دەست، ئەوکات بەناوی پیرۆزی و خزمەتکردنی ئەهلی بەیت و تۆڵەکردنەوەی خوێنی حوسێنی بە ناهەق شەهید کراو حوکم دەکەن تا ئامادەکاری بکەن بۆ گەڕانەوەی ئیمام زەمان و کۆتایی دونیا.





ئەم هەواڵە 6238جار خوێندراوەتەوە
 
 
ڤیدیۆ گەلەری
فرۆکەوانێک بەم شێوەیە رێز لە مامۆستاکەی دەگرێت
کچێک بە موعجیزە رزگاری دەبێت
لە عێراق بەم شێوەیە ئاوی باران لادەدەن ، بە دڵنیایی دوو جار سەیری دەکەیەوە
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad