English | عربی | Kurdî دواهەواڵ
ڕاستەوخۆ  
 
ئومێدهەڵچنین لەسەر سەدر کوشندەیە!
2018-05-22 [02:33 AM]

نووسینی: شاخەوان برایم عەبدوڵڵا


 


پێویست بە قسەکردن لەسەر ئاستی مەزهەبچێتیی شیعەگەرای سەدر ناکات، وەک هەموو دەزانن ئەو پیاوە شیعەگەرایی خۆی نەشاردووەتەوە و بە هیچ جۆرێکیش ئومێدی ئەوە لەو پیاوە ناکرێت، نەختێک عێراق بەرەو مەدەنییەت ببات، بەپێچەوانەوە رەگی مەزهەبی و ئاینداری لە وڵاتدا زیاتر دەکات. دەکرێ لەوەدا نەختێک لە مالیکی و عەبادی جیاوازتر بێت، لەوەی خۆی ئاشکرا کردووە تەواو مەزهەبییە و باسی دەوڵەتی دیموکراسی و مەدەنیش ناکات، لەوەشدا لەوان جیاوازە کە حەز ناکات بەو جلە مەزهەبییەوە لەسەر تەختی سەرۆکوەزیرانێتی عێراق دابنیشێت، واتە دەیانجاریش بتوانێت، ئەو خۆی لەوە بە گەورەتر دەبینێت، لە جێگەکەی عەبادی ببێت بە سەرۆکوەزیران، بەڵکوو هێزی خۆی لە مەرجەعێتی و مەزهەبچێتیدا دەبینێتەوە، نەک کورسیی سەرۆکایەتی، ئەو پێیوایە فەرمانبەرێک بکاتە سەرۆکوەزیران، نەک خۆی ببێتە ئەو فەرمانبەرە، ئەو پیاوەی بە فلتەری سەدریشدا دەڕوات بۆ سەر ئەو تەختە، نابێ بە موو لە روئیای سەدر لابدات، ئەگینا بە یەک فیکە لەسەر تەختی سەرۆکایەتیی حکوومەتەوە، دەخرێتە سەر تەختی ماڵەوە! 

دوای ئەوەی ئەنجامەکانی هەڵبژاردن، لە بەرژەوەندی سەدر کەوتنەوە، عەبادی و مالیکی جۆرێک سڕبوون، سڕبوون، کوردیش خەریکی هەڵچنینی ئومێدە بە سەدر، تەنیا لەبەر ئەوەی نەیاری عەبادی و مالیکی بووە و پێشتریش ئەو پۆستی سەرۆکایەتیی حکوومەتی لانەبووە، ئەوەی من تێیگەیشتووم، ئومێدهەڵچنینی کورد بە سەدر، تەنیا کاردانەوەیە لە دژی عەبادی و مالیکی، ئەگینا سەدر پڕۆژەیەکی تەندروست و باشی بۆ کورد نەخستووەتەڕوو تا کورد بەمجۆرە دڵخۆشبن بەو پیاوە، رەنگە لە قۆناغی سەرەتای پێکهێنانی کابینە لە لایەن سائیروونەوە، سەدرییەکان نەختێک بۆ کورد باش بن، بەڵام ئەوە لە عەقڵێتی شۆڤێنیزمی عەرەبی عێراقی دژ بە کورد ناگۆڕێت، مەگەر گرووپەکەی سەدر بەشدار نەبوون لە هێرشکردنە سەر کورد لە ئۆکتۆبەردا؟ مەبەستم سەرایا سەلامی ناو حەشدە و هاوشێوەی هەموو گرووپەکانی دیکە، ئەوانیش هێرشیانکردە سەر کورد و پێشمەرگەیان شەهیدکرد، بەداخەوە ئەمە راستییە و نابێ بیرمان بچێتەوە. 

سەرباری هەموو ئەو شتانە، هێشتا دەکرێ بڵێین قۆناغێکی دیکە لە عێراقدا سەریهەڵداوە، بەڵام ئەو باشەش نییە بۆ کورد تا بەمجۆرە دڵخۆشبین بە سەرکەوتنی سەدرییەکان، ئەوەی گرنگە کورد کارتەکانی خۆی، ئەگەرچی لاوازیشن، بە ئاسانی نەسووتێنێت، ئەویش رەنگە سەدر پێویستی بە کورد هەبێت بۆ دروستکردنی کابینە، بەڵام مەرجی زۆری کورد و عینادی لەگەڵ سەدر، پێموایە هیچ سوودی نابێت، چونکە سەرئەنجام ئەو پیاوە بەبێ کوردیش هەر دەتوانێت کابینە دروستبکات، کەوایە پێویستە کورد ئەو کارتە لە دەست نەدات بۆ دروستکردنی کابینە لەگەڵ هاوپەیمانی سائیروون کە سەدر سەرۆکایەتی دەکات، ئەگینا سەرئەنجام ئەو هەر دروستی دەکات و رەنگە ببێتە دژی کوردیش، وەکچۆن کاتی خۆی هەدەپە دەیتوانی کابینە لەگەڵ ئەردۆغاندا دروستبکات، بەڵام عینادی کرد و سەرئەنجام هەڵبژاردن ئەنجامدرایەوە و ئەردۆغانیش زیاتر لە کورد بە رقداچوو، مەبەست لەوەیە، ئەگەرچی سەدر ئەو فریشتە و فریادڕەسە نییە کە ئێستا هەندێک کەس باسی لێوە دەکەن، بەڵام کورد دەبێ لە ئێستاوە خۆی لەگەڵیدا بگونجێتێت، مادام چار نییە و ئێمە دەچینەوە بەغدا، لە قۆناغی ئێستادا خۆگونجاندن باشترە تا کێشە، بەدەستهێنانی مافیش، دەکرێ ئێستا لە رێگەی دیالۆگەوە بێت، نەک ناکۆکی، چونکە واقیعیی ئێستای عێراق، تەواو ئاڵۆزە و هێزەکان لەبری دیالۆگ، پەنا بۆ رەتکردنەوە دەبەن، ئەمەش کارەساتی ئێستای عێراقییەکانە.
 
سەرباری هەموو ئەوانەش، ئومێدهەڵچنین بەو پیاوە، واتە سەدر، رەنگە تەندروست نەبێت و سەرئەنجام خەڵکی دووچاری نائومێدی ببنەوە، بەوپێیەی ئەو پیاوەش، وەک ئەوانی دیکە ماددەی سەدوچل و کێشەی مووچە و بودجەی پێشمەرگە و کەرکووک و هەموو پرسەکانی دیکە لەگەڵ کورد چارەسەر ناکات، بەڵام دەکرێ سیاسەتی خۆگونجاندنی لەگەڵدا پەیڕەوبکرێت، بەو مەرجەی کورد یەکگرتووبێت لە بەغدا، رەنگە هەندێک شت بەدەست بهێنێت، هەر هیچ نەبێت لەڕووی ئابوورییەوە ژیانی خەڵک باشتر ببێت، ئەمەش بۆ ئێستای خەڵکیی کوردستان زۆر پێویستە، بەڵام ناکرێت وێنای سەدر وەک فریشتە و فریادڕەس نیشانی خەڵک بدرێت! ئەسڵەن دەبێ کورد بە تەواوی خۆی بۆ قۆناغی سەدر ئامادە بکات، ئەویش بە کۆمەڵێک پڕۆژەی سیاسی و یاسایی و ئابووری، کە ئەوەش بە یەکگرتوویی هێزە کوردییەکان دێتەدی، بەداخەوە ئەو یەکگرتووییەش زەحمەتە دروستبێت.





ئەم هەواڵە 1909جار خوێندراوەتەوە
 
 
ڤیدیۆ گەلەری
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
ڤیدیۆیی .. ساتی کوشتنی تارا فارس
ھەڵۆیەک ھەوڵی رفاندنی منداڵێک دەدات
چەند دیمەنێکی سامناکی زریان و گەردەلوولەکەی ئەمریکا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad