English | عربی | Kurdî دواهەواڵ
ڕاستەوخۆ  
 
سەرۆك بارزانی: هەڵوەشاندنەوەی دەنگی پێشمەرگە بە هیچ شێوەیەك قابیلی قبوڵ نییە
2018-06-11 [02:44 AM]

ZNA - هه‌ولێر


 

ئه‌مڕۆ دووشەممە لە سەلاحەددین سەرۆك مەسعود بارزانی پێشوازی لە دۆگڵاس سڵیمان باڵیۆزی ئەمەریكا لە عێراق و شاندێكی یاوەری كر، له‌م دیداره‌ سه‌رۆك بارزانی رایگه‌یاند، كاركردن بۆ هەڵوەشاندنەوەی دەنگی پێشمەرگە ئاماژەیەكی مەترسیدارە و كاركردنە بۆ هەڵوەشاندنەوەی ئایندە و چارەنووسی كوردستان بۆیە بە هەموو شێوەیەك لەبەرانبەر ئەو بڕیارە زاڵمانەیە دەوەستینەوە.

 

لە دیدارەكەدا باڵیۆزی ئەمەریكا لە عێراق پیرۆزبایی سەركەوتنی لیستی پارتی دیموكراتی كوردستانی لە سەرۆك بارزانی كرد و جەختیشی لە ڕۆڵی سەرۆك بارزانی و هەرێمی كوردستان كردەوە لە پڕۆسەی سیاسیی و قۆناغی دوای هەڵبژاردن و ئەوەیشی دووپاتكردەوە كە وڵاتەكەی خوازیاری ئەوەیە كە هەرێمی كوردستان بەهێز بێت و ڕۆڵی كاریگەری لە پڕۆسەی سیاسیی عێراقدا هەبێت.

 

هەر لەو كۆبوونەوەیەدا هەردوولا بیروڕایان لەبارەی دوایین پێشهاتە سیاسییەكان و دەركەوتنی هاوكێشەی تازە لە عێراق و قۆناغی دوای هەڵبژاردن و هەوڵەكان بۆ پێكهێنانی حكوومەت ئاڵۆگوڕ كرد و سەرۆك بارزانی جەختی لەوە كردەوە كە ئەوەی بۆ هەرێمی كوردستان ئەولەویەتە و پێویستە لایەنەكان ڕەچاوی بكەن پابەندبوونە بە سێ پڕەنسیپی هاوبەشی و تەوافوق و هاوسەنگییە لە بوارە جۆراوجۆرەكانی حوكمڕانی و لەژێر سایەی ئەو سێ پڕەنسیپە پێویستە زۆر بە ڕوونی ڕێككەوتن لەسەر بابەت و كێشەكان و پێكهێنانی حكوومەتی تازە بكرێت.

 

سەبارەت بە پڕۆسەی هەڵبژاردن و ئەنجامەكان سەرۆك بارزانی ئەوەی بە شاندی میوان ڕاگەیاند كە تێبینیی زۆریان لەسەر ئەدای كۆمیسیۆن و بەڕێوەبردنی پڕۆسەی هەڵبژاردن و دەستكاری ئەنجامەكان و ساختەكاری هەیە.

 

ئەوەیشی خستەڕوو كە پارتی هیچ نوێنەرێكی لە كۆمیسیۆنی هەڵبژاردنی عێراقدا نییە و بە عەمد  ژمارەیەكی زۆری دەنگی پارتیان سووتاند بە تایبەتی دەنگی كەمپەكان و دەنگی خوشك و برا ئێزیدییەكان و ئامانجیش لە سووتاندنی ئەو دەنگانە ئەوە بووە كە ڕێگری بكرێت لەوەی پارتی دیموكراتی كوردستان لە پارێزگای نەینەوا دەنگی یەكەم بێت كە لە ڕاستیدا دەنگی یەكەمە.

 

لە درێژەی وتەكانیدا سەرۆك بارزانی ئەوەی دووپاتكردەوە كە بۆ نەهێشتنی گومانەكان و خاوێنیی پڕۆسەكە پارتی بە هەموو ڕێكارێك ڕازی بووە جا چ ژماردنەوەی دەنگەكان بێت یان بەدواداچوون بۆ سكاڵاكان لە هەر ناوچەیەك تەنانەت دووبارەكردنەوەی هەڵبژاردنەكانیش. بەڵام هەوڵدان بۆ یاریكردن بە ئەنجامەكان و هەڵوەشاندنەوەی دەنگی پێشمەرگە بە هیچ شێوەیەك قابیلی قبوڵ نییە. ئەوە زوڵمێكە لە پێشمەرگە دەكرێ و پێشمەرگە مافی خۆیەتی و پارێزگاری لە وڵاتەكەی كردووە و حەقی لەسەر هەموو لایەك هەیە و بۆچی دەبێ دەنگی پێشمەرگە بە بێ هۆكار و لەپێناو مەرامی سیاسیی هەڵوەشێندرێتەوە؟

 

سەرۆك بارزانی ئاماژەیشی بەوەدا كە كاركردن بۆ هەڵوەشاندنەوەی دەنگی پێشمەرگە ئاماژەیەكی مەترسیدارە و كاركردنە بۆ هەڵوەشاندنەوەی ئایندە و چارەنووسی كوردستان بۆیە بە هەموو شێوەیەك لەبەرانبەر ئەو بڕیارە زاڵمانەیە دەوەستینەوە.





ئەم هەواڵە 10786جار خوێندراوەتەوە
 
 
ڤیدیۆ گەلەری
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
ڤیدیۆیی .. ساتی کوشتنی تارا فارس
ھەڵۆیەک ھەوڵی رفاندنی منداڵێک دەدات
چەند دیمەنێکی سامناکی زریان و گەردەلوولەکەی ئەمریکا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad