English | عربی | Kurdî دواهەواڵ
ڕاستەوخۆ  
 
ناوەڕۆکی ئه‌و رێککەوتنەکەی کیم جۆنگ ئون و دۆناڵد ترەمپ واژۆیان كرد
2018-06-12 [06:45 AM]

ZNA-هه‌لێر


کاتژمێر ١:٤٥ خولەکی دوای نیوەڕۆی رۆژی سێشەممە ١٢/٦/٢٠١٨ بە کاتی سەنگافورە (کاتژمێر ٨:٤٥ خولەکی سەرلەبەیانیی رۆژی سێشەممە بە کاتی ھەولێر)، کیم جۆنگ ئونی سەرۆکی کۆریای باکوور و دۆناڵد ترەمپی سەرۆکی ئەمریکا، رێککەوتنەکەیان واژۆ کرد.

ئاژانسی ھەواڵیی فەرەنسی (فرانس پرێس)، ناوەڕۆکی ئەو بەڵگەنامەیەی بڵاو کردووەتەوە، کە دۆناڵد ترەمپ و کیم جۆنگ ئون واژۆیان لەسەر کرد.

 
ناوەڕۆکی رێککەوتنەکە:

 
- پەیوەندییەکانی ئەمریکا و کۆریای باکوور بەرەو پێش دەبرێن.

- کیم جۆنگ ئون بەڵێنی داماڵینی چەکە ناوکییەکانی وڵاتەکەی دەدات.

- ئەمریکا بەڵێنی پاراستن و گەرەنتیکردنی ئاسایشی کۆریای باکوور دەدات.

- ئەمریکا و کۆریای باکوور ھەماھەنگیی دەکەن بۆ چارەسەرکردنی کێشەکانی نیمچە دوورگەی کۆریا.

- ھەردوو سەرۆک چاودێریی کۆبوونەوەکانی داھاتووی وەزیرانی دەرەوەی وڵاتەکانیان دەکەن.

رێککەوتننامەکە لەلایەن چاودێرانی سیاسیی نیودەوڵەتی بە مێژوویی ناودەبرێت، چونکە جیھان و کۆمەڵگەی نێودەوڵەتی لە شەڕێکی گەورەی جیھانی، دوور خستەوە.

دۆناڵد ترەمپ دوای واژۆکردنی رێککەوتنەکە، کیم جۆنگ ئونی بانگھێشتی کۆشکی سپی (کۆشکی سەرۆکایەتیی ئەمریکا) کرد و بە رۆژنامەنووسانی راگەیاند، گفتوگۆی زۆر باش لەنێوانیان بەڕێوە چوو.

سەرلەبەیانیی رۆژی یەکشەممە ١٠/٦/٢٠١٨، کیم جۆنگ ئون بە فڕۆکە تایبەتەکەی لە فڕۆکەخانەی پیۆنگ یانگی پایتەختی وڵاتەکەی گەیشتە فڕۆکەخانەی چانگی لە سەنگافوورە و شەوی یەکشەممەش دۆناڵد ترەمپ گەیشتە سەنگافوورە.

بە دانوستاندن و رێککەوتنی کیم جۆنگ ئون و دۆناڵد ترەمپ، مەترسییەکی گەورە لەسەر ئاسایشی جیھانی لادەچێت، لەکاتێکدا پێش چەند مانگێک، ھەردوو سەرۆک ھەڕەشەی بەکارھێنانی چەکی ناوکیان لە دژی یەکتر، دەکرد.

لە سەردەمی جەنگی جیھانیی دووەمدا (١٩٣٩-١٩٤٥)، سوپای یابان دەستی بەسەر باشووری نیمچە دوورگەی کۆریادا گرت و سوپای رووسیاش دەستی بەسەر باکووری نیمچە دوورگەکەدا گرت. دوای کۆتایی ھاتنی جەنگەکەش، ھەر یەکە لەو دوو بەشە، بوونە وڵاتێکی سەربەخۆ، بەشە باکوورییەکە چووە ناو بەرەی یەکێتیی سۆڤیەت (رووسیای ئێستا) و بەشە باشوورییەکەش چووە ناو بەرەی یابان و ئەمریکا.

رژێمی کۆریای باکوور، کە ئێستا کیم جۆنگ ئون سەرۆکایەتیی دەکات، گوێڕایەلی ھیچ یاسا و رێککەوتنێکی نێودەوڵەتی نابێ و بەردەوامە لە پەرەپێدانی چەکە ناوەکی و مووشەکە دوور ھاوێژەکانی، بەھۆی ئەو بەردەوامبوونەشی، دەیان گەمارۆی سیاسی، ئابووریی و دیپلۆماسی لەلایەن ئەنجومەنی ئاسایشی نێودەوڵەتی و ئەمریکاوە خراوەتە سەر.





ئەم هەواڵە 8458جار خوێندراوەتەوە
 
 
ڤیدیۆ گەلەری
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
ڤیدیۆیی .. ساتی کوشتنی تارا فارس
ھەڵۆیەک ھەوڵی رفاندنی منداڵێک دەدات
چەند دیمەنێکی سامناکی زریان و گەردەلوولەکەی ئەمریکا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad