English | عربی | Kurdî دواهەواڵ
ڕاستەوخۆ  
 
ئەنجیلینا جولی پشتگیرییه‌كانی حکوومەتی ھەرێم لە پەنابەرانی سوریا به‌رز ده‌نرخێنێت
2018-06-17 [06:04 AM]

ZNA-هەولێر


خاتوو ئەنجیلینا جولی، نێردەی تایبەتیی کۆمسیۆنی باڵای پەنابەرانی سه‌ر به‌ نەتەوە یەکگرتووەکان و شاندێكی یاوه‌ری، سەردانی ھەولێری کرد و لەلایەن بەڕێز سەفین دزەیی ووتەبێژێ فەرمیی حکوومەتی ھەرێمی کوردستان و بەرپرسی نووسینگەی تایبەتیی بەڕێز سەرۆک وه‌زیرانی هه‌رێمی كوردستانه‌وه‌ پێشوازی لێکرا.

سەرەتا بەڕێز دزەیی بەناوی بەڕێز نێچیرڤان بارزانی سەرۆک وه‌زیران و حکوومەتی ھەرێمی کوردستانه‌وه‌ به‌خێرهاتنی شاندی میوانی كرد و سوپاسی خاتوو ئەنجیلینا جولی کرد بۆ گرنگیدانی بەردەوامیان بە نەھامەتییەکانی ئاوارە و پەنابەران لە ھەرێمێ کوردستان، هه‌روه‌ها ڕایگەیاند کە حکوومەتی ھەرێمی کوردستان سەردانە بەردەوامەکانیان بۆ کوردستان به‌مه‌به‌ستی لە نزیکەوە ئاگاداربوون لە رەوشی ئاواره‌ و په‌نابه‌ران، بەرز دەنرخێنێت.

بەڕێزیان پوختەیەکیشی دەربارەی ڕەوشی ئێستای هه‌رێمی کوردستان، قەیرانه‌كانی مرۆییی ئاوارە و پەنابەران و دارایی و ئابووری و لێکەوتەکانیان، كاریگه‌رییه‌كانی شەڕی داعش له‌سه‌ر چین و توێژه‌ جیاوازه‌كان، ڕۆلی بەرچاوی پێشمەرگە لە شەری دژی داعش لە چوار ساڵی ڕابردوودا، سیاسەتی مرۆییی حکوومەتی ھەرێمی کوردستان، گرنگیی ھەماھەنگی و ھاوکاریی زیاتری نێوان حکوومەتی ھەرێم و ئاژانسەکانی سه‌ر به‌ نەتەوە یەکگرتووەکان و کۆمەلگه‌ی نێودەوڵەتی بۆ پشتگیریکردن و پێشکەشکردنی خزمەتگوزارییە مەدەنیەکان بە خەلکێ لێقەوماو، خسته‌ڕوو.

لای خۆیەوە خاتوو جولی سوپاسی حکوومەتی ھەرێم و گەلی کوردستانی کرد بۆ میوانداریکردنی ئەو ژمارە زۆرەی ئاوارە و پەنابەران و هاوكاریكردنیان و ئه‌و ڕۆڵه‌ی ھەرێمی کوردستان به‌رز نرخاند، دڵنیاییشی دایه‌ حکومەتی ھەرێمێ کوردستان کە لە گەیاندنی پەیامی نەھامەتیەکانی ئاواره‌ و په‌نابه‌ران بە کۆمەڵگای نێودەولەتی به‌مه‌به‌ستی گه‌یاندنی هاوكاری و پشتگیریكردن له‌ حكوومه‌تی هه‌رێم، به‌رده‌وام ده‌بن.

له‌ به‌شێكی دیكه‌ی دیداره‌كه‌دا بیروڕا ده‌رباره‌ی چۆنیەتیی بەھێزکردنی ھاوکاری و ھەماھەنگیی نێوان حکوومەتی ھەرێمی کوردستان و کۆمسیۆنێ باڵای پەنابەران و رێکخراوەکانی تری مرۆیی بۆ باشتر بونیادنانەوەی ژیانی ئاوارەکان پێش بونیادنانەوەی خانوو و تەلارەکان، ئاڵوگۆڕ كران. ھەردوولا لەسەر بەردەوامیی گفتوۆکان بۆ دۆزینەوەی دەستپێشخەریی پێشکەوتوو لەسەرووی پێشکەش کردنی پشتگیریی ماددی و ھاوکاریی مرۆیی بە ئاوارە و پەنابەران كۆك بوون تا دۆخی ناوچەکانیان ئاسایی دەبێتەوە بە سەر بەرزی و ئارەزوومەندانە دەگەرێنەوە سەر زێدی خۆیان.

لە ئێستادا ھەرێمی کوردستان داڵده‌ی ١.٤ ملیۆن ئاوارەی ناوخۆی عێراق و پەنابەرانی سوریا ده‌دات کە ٩٧٪ی پەنابەرانی سوریا لە ھەرێمی کوردستانن و ٣٧٪ یان لە نۆ کەمپ و ئەوانی دیكه‌ لە ناو شار و شارۆچکەکانن، ھاوکات ٤٠٪ ئاوارەی ناوخۆێ عێراق لە کوردستانن کە ٨١٪یان لە ناو شارەکان و ئەوانی دیكه‌ لە ٣٠ کەمپدا نیشتەجێکراون.





ئەم هەواڵە 4243جار خوێندراوەتەوە
 
 
ڤیدیۆ گەلەری
ھەڵۆیەک ھەوڵی رفاندنی منداڵێک دەدات
چەند دیمەنێکی سامناکی زریان و گەردەلوولەکەی ئەمریکا
یەکەم گۆڵی رۆنالدۆ لەگەڵ یانەی یۆڤانتس
منداڵێک بەشێوەیەکی سەرسوڕھێنەر لە رووداوێکی ھاتووچۆ رزگاری دەبێت
پێشبڕکێیەکی ئەسپ سواری کارەساتی لێدەکەوێتەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad