English | عربی | Kurdî دواهەواڵ
ڕاستەوخۆ  
 
کوردێن باکۆر و ھەلبژاردنێن تورکیا
2018-06-30 [10:44 AM]

نڤیسینا : غیاس خالد زێباری


ل رۆژا بیست و چارێ حزیرانا ٢٠١٨ گەڕەکا دی یا ھەلبژاردنێن سەرۆکاتیێ و پەرلەمانی ل وەلاتێ تورکیا برێڤە چوون ، بریار بوو ئەڤ ھەلبژاردنە ل (٣) چریا دوویێ یا سالا ٢٠١٩ بھێنە ئەنجامدان ، لێ سەرۆک کۆمارێ تورکیا ل ١٨ نیسانا ئەڤ سالە بریارا دا ھەلبژاردنێن بەروەخت بھێنە ئەنجامدان بوون و پشتی ڤان ھەلبژاردنان سیستەمێ وەلاتی ل پەرلەمانی بۆ سەرۆکایەتێ دێ ھێتە گۆڕین کورد ژی پشکەکا بەرفرەه و کاریگەرن د جڤاکێ تورکیادا و ب تەخمینی ٢٠% جڤاکێ تورکیا پێک دئینن و لسەر (٢١ ) پارێزگەھان ھاتینە دابەشکرن و ژمارا وان دەوروبەرێ بیست ملیون کەسایە و باکۆرێ کوردستانێ ٣٢% ل عەردێ تورکیا . 

لدیڤ ڤان ئامارا پێتڤی یە کوردێن باکۆر ژلایێ سیاسی روولەکێ بەرچاڤتر و کاریگەرتر دناڤ دەولەتا تورکیادا ھەبیت ، لێ ئەنجامێن ڤان ھەلبژاردنان دیار دکەن ، روولێ کوردان لدیڤ حەز و ئاست و رێژا وان نیە ، چونکی پارتیا گەلێن دیموکراتخواز ( H.D.P) ھەرچەندە پارتیەکا کوردستانێ نیە لێ سەرکردێن وێ و پرانیا کادرێن وێ کوردن و ب پارتیەکا کوردی دھێتە ھژمارکرن ، دڤان ھەلبژاردنان دا (١١%) یا دەنگان بدەستڤە ئینا و ژمارا کۆرسیێن خۆ ل ( ٥٩ بۆ ٦٦ ) زێدەکرن ، لێ بەرامبەر سەنگا کوردان ھەر کێمە ، ئەڤە جھێ پسیارێ یە ، گەلۆ چما دناڤ بیست ملیون کوردان دا پارتیا کوردی کێمتر ل شەش ملیون دەنگان بینیت ..؟! ، ژلایەکێ دی حزبێن دیتر یێن تورکی مینا ( داد و گەشەپێدان ) کۆ رکەبەرترین حزبا تورکی یە بەرامبەر ھەدەپێ و ب دۆژمن ھژمار دکەن ، ل ھندەک پارێزگەھێن باکۆرێ کوردستانێ پرانیا دەنگان ببەن .

رەنگە کێمبوونا دەنگ و سەنگا کوردی ل دەسھەلاتا تورکیا دا ڤەبگەرێت بۆ نەبوونا حزبێن کوردستانی ل باکۆرێ کوردستانێ کو دگەل جڤاکێ کوردستانێ بگونجیت و نەھەلگرتنا درۆشم و بەرنامێن کوردستانی بۆ خزمەتا نەتەوا کورد و ئازادی و رزگاریا کوردستانێ ، ژلایەکێ دی پاشڤەکێشانا ( پ . ک . ک ) ل درۆشمێن خۆ یێن بریقەدار و ل خۆ مەزنتر دەمێ داخازا ئازادیا کوردستانا مەزن دکر و خەلک پێ سەردا دبر , ئەڤرۆ گۆرەپانا خۆ یا سیاسی و لەشکری ڤالا کریە و بوویە ئاستەنگ و بارگرانی لسەر ھەرچار پارچێن کوردستانێ ، ژلایەکێ دی (ھەدەیە ) دیسان چ بەرنامێن نەتەوی و نشتیمانی نینە بەلکی خۆ ب پارتیەکا تورکی دناسیت و داخازا دیموکراسیەتێ و وەکی ھەڤیێ دکەت ، بڤی رەنگی ژی ل کە و کرکارا بوویە ، نە کوردێن نەتەوی وێ حزبێ ب حزبەکا کوردی دناسن ، نە تورک ب حزبەکا تورکی دناسن ..! . 

پێتڤی یە کوردێن باکۆر ب خەلک و حزبێن سیاسی ڤە ستراتیژیەتەکا نەتەوی و نشتیمانی دابرێژن بۆ قۆناغێن داھاتی و دەستا ل سیاسەتا سەپاندنا ئێک حزب و ئێک ئایدیولۆژی بەردەن و ب رەنگەکێ دیموکراسی و ئاشتیانە ، دوور ل چەکداریێ بچنە دناڤ پرۆسا سیاسی یا تورکیا دا و مفا ل ئەزمۆنا ھەرێما کوردستانێ وەربگرن ب تایبەت پارتی دیموکراتی کوردستان کۆ شیایە کۆ دگەل سەردەمی و قوناغا و خەلکێ خۆ بگۆنجینیت و خزمەتا دۆزا سیاسی یا کوردستانێ بکەت بۆ بدەستڤەئینانا دەسکەفتێن مەزنتر . 

ب خەباتا مەدەنی و دیموکراسی و ئاشتیانە حزبێن باکۆرێ کوردستانێ دێ شێن زێدەتر خزمەتا گەل و وەلاتی بکەن بۆ بدەستڤەئینانا ئارمانجێن نەتەوی و نشتیمانی و رازیکرنا خەلکێ خو .





ئەم هەواڵە 121جار خوێندراوەتەوە
 
 
ڤیدیۆ گەلەری
ببینە ھاندەرانی بەرازیل چۆن بەرد بارانی ھەڵبژاردەکەیان دەکەن
وانەی وەرزش لە ژاپۆن
به‌ ڤيديۆ.. جيهانى ئه‌مڕۆمان چى به‌سه‌ردا هاتووه‌
سەیرترین رووداوەکانى ھاتووچۆ
كوشتنی به‌رێوه‌به‌ری پاسه‌پۆرتی پارێزگای بابل
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad