English | عربی | Kurdî دواهەواڵ
ڕاستەوخۆ  
 
شکاندنی تەلیسمی دوو بەرەکی
2018-07-10 [06:33 AM]

نووسینی: نەوڕەس ڕەشید


مرۆڤ حەزدەکات و دەیەوێت ژیانی بەرەو باشتر گۆڕانی بەسەردابێت و پەرەبسێنێ. ئەو گۆڕانە بە بیرکردنەوە و چاکسازیش لە بەرنامە و تەرزی ژیانیدا بەدی دێت. بوونی بیرۆکەی گۆرانکاری لەزەین و عەقڵی مرۆڤدا سەرباری کۆسپ و تەگەرەی هەمە لایەنە، مانای وایە دەیەوێت شتێک بکات، ئەوشتەش چاکسازییە، بەردەوامی ئەو عەقڵیەت و زهنیەتە لەسەر گۆڕانکاری و چاکسازی، دەبێتە هۆی گۆڕان لە رۆشنبیری گشتیدا، بەڵام ئەو گۆڕانە بە ئاسانی و بەزوویی بەدی نایەت، بەڵکو زەمەنی دەوێ، بۆ ئەوەی بیر و دەرون و عەقڵەکان، لەمیراتی کەڵەکەبووی رۆشنبیری باو رزگاریان ببێ. پرۆسەی رۆشنبیری گشتی، ئاماە سازی لە بیرکردنەوە و رەفتار کردندا دەوێ، تا لەگەڵ ئەوراستی و حەقیقەتە نوێانەدادەگۆنجێ. رۆشنبیری ستەمکاری و چەوسانەوە و داگیرکاری، بەسەر تانو پۆی بیرکردنەوە و ئاخاوتنی کورددا زاڵە. هەر بۆیە لەگەڵ یەک توندین، رەقین، گرژین گەر وانەبین خۆمان بەلاواز و ترسنۆک و کەم لە بەرامبەر یەکتریدا دەبینین، ئێمە بە تێروانین و عەقڵیەت و بیری ئەو چیە و من چیم، ئەو کێیە و من کێم، رەفتار دەکەین. کەعەقڵیەتێکی داخراوی لا دروستکردوین، وەک میراتی دەست بەرداری نابین، کەلەناو خۆماندا دابەشیکردوین، بۆیە هەمیشە لە ناکۆکی و ململانێ و شەڕداین. بنچینەی بینای فیکریمان بەژێر دەستەیی و ستەم و توندوتیژی داگیر کراوی بونیادنراوە. بۆیە تێروانینەکانمان بۆ پەیوەندی و بەرژەوەندییەکان، تەنها دوو دیوە، رەشە یان سپیە، کەبوارو دەرفەتی چارەسەرکردن و رێککەوتنمان نەهێشتۆتەوە و خۆمان لەناو کێشە و ناکۆکی گەورەدا دەبینین و دەژین. ئەوتێروانینە دوو لایەنیە، هۆکاری دواکەوتوویی و نەزانینمانە، کەتەنها باوەرمان بە خێر و شەڕە، لەو نێوانەدا هیچی تر نابینین و باوەرمان پێی نیە، وەک نەیار و ناحەز جیاوازی بیر و راکانی نێوانمان لێک ئەدەینەوە. بەو عەقڵیەت و زهنیەتە، بە گرژی و هەڵچوون و پێکدادان، شەڕ لەگەڵ یەکتری دروست دەکەین، بۆ چارەسەر کردنی کێشەوناکۆکیەکانی نێوانمان. وادەزانین دەبێ لایەک سەر کەوێ، کەخێر لای ئەوە، لایەنەکەی کەش ژێرکەوێ و بشکێ کەلایەنی شەڕە، بەو جۆرە کێشە و ناکۆکیەکانمان قووڵتر دەکەینەوە. ئێمە جیاوازین شەڕ لەگەڵ یەکتری دەکەین، یەکتر دەکوژین، بەبێ ئەوەی بگەرێن بەدوای هۆکارەکاندا و چارەسەریان بۆ بدوزینەوە. زۆرقسە ئەکەین هەموومان باسی کورد ئەکەین، خۆخۆرە، یەکگرتوو نیە، پەند لەمێژووی دوو بەرەکی وەر ناگرێ . داوای یەک ریزی دەکەین، هیچ لایەکمان ئامادە نین بەتێروانینی رەش و سپی سەیری شتەکان نەکەین. لە دەروونماندا خوومان گرتوە بە ناکۆکی و دوو بەرەکییەوە. چ دەردێکە پێوەی ئالودە و گرفتار بوین؟ وا راهاتوین کە هەر یەکێکمان خۆی لەوی ترمان بە راست تر ئەزانێ، رەوایەتی و سەرکەوتن لای ئەوە. لە فەرهەنگی رۆشنبیری سیاسی و گشتیدا، زاراوە و چەمکەکانی عەقڵانیەت، فەلسەفە، مۆدێرنە و مەدەنی، بەکاردەهێنین و باسی دەکەین، بەڵام نازانین چی دەگەیەنن، رەنگدانەوەیان چیە لەبیرکردنەوە و، بەرنامە و رەفتارماندا. بەجیاوازی بیر و ڕاو بۆچونمانەوە ئەگەر باوەرمان بەو زاراوە و چەمکانە هەبێ، دەبێ بزانین و لەوە تێبگەین، کەکورد، یەک ئامانجی مرۆیی و نەتەوەیی و نیشتمانی هەیە، ئەویش کەرامەت و سەربەخۆیی و شوناسی کورد بوون و کوردستانیە، بەڵام ئەو زاراوە و چەمکانە تەنها بۆ لاف لێدان و دروشم و خۆدەرخستنە، لە عەقڵ و بیر و زەین و رەفتارماندا باوەرمان پێی نیە، چونکە تەنها دیوی رەش و سپی دەبینیین، کە یەکێکە لە عەیبە گەورەکانی عەقڵی سیاسی و روشنبیریمان، بەخۆمان نازانین، گەلانی تر گاڵتەیان بەو بەکارهێنانەی ئێمە دێ. ئەوانە بۆ خۆدەرخستن نیە، بەڵکو پەیوەند و گرێدراوە بەئامرازەکانی ژیانی کۆمەڵگەوە، بۆ ئەوەی، رزگارمان بێ لە رۆشنبیری ستەمکاری و دوو بەرەکی و بتوانین ئامانجەکانمان بەدی بێنین.‌ 
تێروانیمان، خەبات و تێکۆشانمان بۆ بەدیهێنانی ئامانجەکانمان، بە باوەربوونمان دەبێ بە یەکریزی و یەک وتاری و یەک هەڵوێستی و بەو بەرنامە و رێگە و شێوازەی دەیگرینە بەر‌، هەروەها بەلێک گەشتن و رێککەوتن و پێکەوە کارکردن بۆ چارەسەرکردنی کێشەوگرفتەکان عەقڵ دەمان گەیەنێتە ئەوئاستە. نابێ تەنها لەروانگەی بەرژەوەندی تایبەتیەوە بیربکەینەوە و رەفتار بکەین، بەڵکو بەشداربین لەژیان و بەرژەوەندی گشتیدا، تواناکانمان لەو پێناوەدا بەکار بێنین . 
دەبێ بیر بکەینەوە بۆ ئەوەی، لەسروشت و ناوەرۆکی بابەت و رووداوەکان تێ بگەین و پێش بینی بکەین، بۆ رزگابوون لەکۆت و بەندی عەقڵیەت و رۆشنبیری دوو بەرەکی و خۆ خۆری، پێویستمان بە گۆڕانکاری ریشەیی هەیە، لەبواری پەروەردەی سیاسی وحزبی و گشتیدا. بەر لەهەمووان حزبەکان بەر پرسن کە دەبێ بەخۆیانا بچنەوە، پەروەردەی سیاسیان لەسەر بنەمای یەکریزی و بەرژەوەندی گشتی بێ. پەروەردەی نەوەکان لە خوێندنی بنەرەتیەوە، لەسەر بنەمای خۆشەویستی، لێبوردەیی، یەکتر قبووڵکردن و پاراستنی کەرامەتی گەل و نیشتمان و قوربانیدان بێ، ئەو گۆرانە بە پاکسازی و چاکسازی دەست پێدەکات وەک هەنگاوی سەرەتایی بۆ گەرانەوەی متمانە لە نێوان حزبەکاندا و دواتر لەنێوان ئەوان و جەماوەردا، عەقلانیەت و رۆشنبیری لەکۆت و بەندی دواکەوتوویی و دەمارگیری و دوو بەرەکی دامان ئەماڵێ، شێوازی بیرکردەوەکان، ناکۆکی و جیاوازیەکان دەگۆرێت بۆ لێک گەشتن و چارەسەرکردن و رێککەوتن. دەبێ سەیری بابەت و رووداوەکان بکەین، کە تەواوکەری یەکترن، نەک جیاکردنەوەیان، گۆرانکاری لەوێوە دەست پێ دەکات. کێ و چ لایەنێک ئەو ئەرکە مرۆییە عەقڵانیە مێژووییە ئەبینێ؟ بێ شک پێویستمان بە پاڵەوانێکە، دەست بۆ هەموو کۆسپ و تەگەرە و کۆت و بەندەکان ببات، تەلیسم و ئەفسانەی‌ دوو بەرەکی و خۆخۆری کورد بشکێنێ و کۆدەکانی بکاتەوە و چارەسەری بکات، ئەویش لەرێگەی پاکسازی و چاکسازییەوە. لەم سەردەمەدا جگە لە سەرۆک بارزانی کەسێکی تر لەگۆرەپانەکەدا لەو شایستە تر نیە و هێزی ئەوی نیە کەهەر خۆیشی خاوەنی پرۆژەی چاکسازییە، چاوەروانی ئەو پاڵەوانەین تەلیسمی دوو بەرەکی کورد بشکێنێ .





ئەم هەواڵە 697جار خوێندراوەتەوە
 
 
ڤیدیۆ گەلەری
ببینە ھاندەرانی بەرازیل چۆن بەرد بارانی ھەڵبژاردەکەیان دەکەن
وانەی وەرزش لە ژاپۆن
به‌ ڤيديۆ.. جيهانى ئه‌مڕۆمان چى به‌سه‌ردا هاتووه‌
سەیرترین رووداوەکانى ھاتووچۆ
كوشتنی به‌رێوه‌به‌ری پاسه‌پۆرتی پارێزگای بابل
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad