English | عربی | Kurdî دواهەواڵ
ڕاستەوخۆ  
 
پۆمپیۆ : حكومه‌تی ئێران مافیاییه‌
2018-07-23 [06:34 AM]

ZNA- هه‌ولێر


دوێنێ وەزیری دەرەوەی ئەمریکا لە ویلایەتی کالیفۆرنیا وتارێکی پێشکەش کرد و بە توندی هێرشی کردە سەر دەسەڵاتدارانی ئێران و سیستەمی ئەو وڵاتەی بە مافیایی و گەندەڵ تاوانبار کرد.

 

مایک پۆمپیۆ لە وتارەکەیدا بەرپرسانی باڵای حکوومەتی ئێرانی بە کۆمەڵێک مافیا ناو برد و وتی: "ئەو ئایەتوڵایانەی ئێستا لە ئێران حوکمڕانی دەکەن، پارەیان لە ئایین و مەزهەب لەلا گرنگترە و ئەوان کەسانێکی دووڕوون و هەموو ڕێگاکانی فێڵ لەپێناو زیاتر دەوڵەمەندبوونی خۆیان بەکار دەهێنن، لە کاتێکدا گەلەکەیان هەژارە، ئاستی دەوڵەمەندیی بەرپرسانی ئێران بەڵگەیە لەسەر ئەوەی ئەو حکوومەتە مافیایە، نەک سیستەمی حوکمڕانی".

 

ئاماژەی بەوەش کرد: "لەڕووی سیساسەتی دەرەوەش ئەوە چەند دەیەیە ئەوان بەردەوامن هەتا شۆڕشەکەی خۆیان هەناردە بکەن و مەبەستیشیان تێکدانی دۆخی ئاسایشی ناوچەکەیە، ئەوان پاڵپشتیی بەشار ئەسەد و حزبوڵا و میلیشیا عێراقییەکان و شیعە توندڕەو و حووسییەکان دەکەن، کەچی گەلی ئێران خەریک لەبرسان دەمرن".

 

پۆمپیۆ لە گوتارەکەیدا زۆر بە چڕی تیشکی خستە سەر مافەکانی مرۆڤ لە ئێران بێ ئەوەی بە یەک وشەش باس لە پێکهاتە جیاوازە ئایینی و نەتەوەییەکانی ئەو وڵاتە بکات، پرسێک کە جارێکی دیکە مەسەلەی ئۆپۆزسیۆنی ئێرانی خستە ژێر پرسیارەوە.

 

وەزیری دەرەوەی گوتیشی: "حکوومەتی ئێران توندوتیژی دژ بە ناڕازیی خەڵک و کۆبوونەوەی ئاشتیخوازانە بەکار دەهێنێ، مانگی ڕابردوو نزیکەی پێنج هەزار کەسی دیکە دەستگیر کران تەنیا لەبەر ئەوەی ناڕەزاییان دەربڕیبوو، هەتا ئێستا بە هەزاران کەس لە گرتووخانەکانن و هەندێ کەسیش کوژراون، بەختەوەران چی دیکە خەڵکی ئێران و سەرۆک ترەمپ لە بەرانبەر بەردەوامیی چل ساڵ لە ستەمی بەرپرسانی کۆماری ئیسلامی بێدەنگ نابن".

 

جیا لەو گوتارەی پۆمپیۆ دۆناڵد ترەمپ، سەرۆکی ئەمریکا لە هەژماری تایبەتیی خۆی لە تۆڕی کۆمەڵایەتیی (تویتەر) پەیامێکی بۆ حەسەن رۆحانی سەرکۆماری ئێران ناردووە.

 

دۆناڵد ترەمپ حەسەن رۆحانی ئاگادار کردووەتەوە، کە ئەگەر جارێکی دیکە هەڕەشە لە ئەمریکا بکات، ئەوا رووبەڕووی سزایەکی قورس دەبێتەوە، کە پێشتر نموونەی نەبووە.

 

سەرۆکی ئەمریکا بە حەسەن رۆحانی گوتووە "ئاگادار بە"، چیتر ئەمریکا نەرمی بەرامبەر هەڕەشە و توندوتیژییەکانی ئێران نانوێنێت.

 

 رۆژی یەکشەممە 22/7/2018، حەسەر رۆحانی هۆشداریی دابووە ترەمپ، کە لە ئەگەری دروستبوونی شەڕی ئەمریکا و ئێران، ئەوا شەڕەکە هێندە گەورە دەبێت، ”دەبێتە دایکی شەڕەکانی پێشووی جیهان".





ئەم هەواڵە 4441جار خوێندراوەتەوە
 
 
ڤیدیۆ گەلەری
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
ڤیدیۆیی .. ساتی کوشتنی تارا فارس
ھەڵۆیەک ھەوڵی رفاندنی منداڵێک دەدات
چەند دیمەنێکی سامناکی زریان و گەردەلوولەکەی ئەمریکا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad