English | عربی | Kurdî دواهەواڵ
ڕاستەوخۆ  
 
به‌هۆی ده‌رمانی ساخته‌وه‌ 16 كه‌س ده‌ستگیركران
2018-08-27 [06:59 AM]

ZNA- هه‌ولێر


بەڕێوەبەری پۆلیسی شارەوانی هەولێر رایگەیاند كە دوای پێكهێنانی لێژنەیەك بۆ بەدواداچوونی دەرمانی قاچاخ و ساختە، 16 كەس كە زۆربەیان بازرگانی دەرمانن، دەستگیركراون.


موقەددەم سۆران مەحموود، بەڕێوەبەری پۆلیسی شارەوانی هەولێر كە نوێنەری قایمقامیەتی قەزای هەولێرە لە لیژنەكە،  گوتی: "لێژنەكە لە ماوەی چوار رۆژدا سەردانی 30 شوێنی كرد، زیاتر لە 20 شوێن بەهۆی مامەڵەكردن و فرۆشتنی دەرمانی قاچاخ و ساختەوە داخراون، 16 كەسیش دەستگیركراون كە بەشێك لەوانە دەرمانی قاچاخیان لەڕێگەی كەركووكەوە هێناوەتە هەولێر، هەندێكیشیان ئەو دەرمانانەیان كڕیوەتەوە و بە هاووڵاتیانیان فرۆشتووەتەوە".

ئەو 16 كەسە تەنیا لە نێو سەنتەری شاری هەولێر دەستگیركراون، موقەددەم سۆران گوتی "كاری لیژنەكە بەردەوام دەبێت و لەم هەفتەیەوە لە هەموو شار و شارۆچكەكانی دیكەش دەستپێدەكەین".

دكتۆر هێژان ئەنوەر، بەرپرسی چاودێریی بازاڕ لە كۆنتڕۆڵی جۆریی دەرمان وردەكاری لەبارەی ئەو كەسانەی دەستگیركراون و گوتی: "لەنێو ئەو 16 كەسەی دەستگیركراون 3 پزیشكی دەرمانساز هەن كە یەكێكیان كاری سەرەكی هێنانی دەرمانی قاچاخ بووە، یەكێكیشیان لەسەر دەرمانی ساختە دەستگیركراوە، جگە لەوانە دوو یاردەدەری پزیشكی دەستگیركراون، یەكێكیان تاقیگەشی داناوە و كاری پزیشك دەكات كە بەهیچ شێوەیەك رێگەپێدراون نین ئەو كارە بكەن، شەش كەسی دیكەش گیراون كە كەسی ئاسایین و هیچ پسپۆڕییەكیان لە دەرماندا نییە، لەنێویاندا هەیە دابەشكەری دەرمانی قاچاخی توركی بووە، لەنێو ماڵەكەی خۆیدا دەست بەسەر دەرمانە قاچاخەكەدا گیراوە، ئەوانەی دیكەش پردی پەیوەندی بوون لەنێوان قاچاخچیی بیانی و كۆمەڵێك قاچاخچی دەرمان لە نێوخۆی هەرێمی كوردستان".

بە گوتەی دكتۆر هێژان، لەو 16 كەسەی دەستگیركراون، 15 كەسیان بازرگانی گەورەی دەرمانن و بە ملیۆنان دۆلار دەرمانی قاچاخیان هاوردەی هەرێمی كوردستان كردووە و ساغیان كردووەتەوە. گوتیشی: "باری 10 ئۆتۆمبێلی جۆری پیكاب دەرمانی قاچاخ و ساختە لەو شوێنانە دەستی بەسەرداگیراوە كە زۆربەی لەنێو ماڵاندا دۆزراونەتەوە".

سەبارەت بە چۆنیەتی هاوردەكردنی ئەو دەرمانە قاچاخانەش دكتۆر هێژان گوتی: "ئەم دەرمانانە بەجیا هاوردەكراون، پاكەتەكەی بەجیا، لێفلێتی ناوی بەجیا و حەبەكەش بەجیا هاوردەی هەرێمی كوردستان كراون، بۆ نموونە دەرمان هەیە لەناو كۆمپانیای دەرمانەكە لە توركیا نرخەكەی هەشت دۆلارە، بەڵام لێرە بە شەش دۆلار دەیفرۆشنەوە و قازانجیشی لێدەكەن".

جگە لە بەدواداچوونی شوێنەكان، لیژنەكە پلانی دیكەشی هەیە، بەرپرسی چاودێریی بازاڕ لە كۆنترۆڵی جۆریی دەرمان دەڵێت: "لیژنەكە پلانی زۆرە و تەنیا كاری دەستگیركردن نابێت، یەكەم كارمان ئەوەیە كە نەخۆش دەرمان دەكڕێت، دەبێت بە سیستەم و داتا بیكڕێت، واتە رێكخستنی دەرمان لە هەرێمی كوردستان كاری لیژنەكە دەبێت، دەبێت دەرمانخانە بە ئاگاداریی ئێمە دەرمان لە كۆگا بكڕێت، واتە دەبێت بكرێتە سێرڤەر و لەژێر دەستی ئێمە بێت".

ئەو نوێنەرەی كۆنتڕۆڵی دەرمان لە لیژنەكە پێیوایە یاساكان بۆ سزادانی ئەو كەسانەی مامەڵە بە دەرمانی قاچاخ و ساختە دەكەن لاوازن، دكتۆر هەژان ئەنوەر دەڵێت: "ئەگەرچی سەرەتا داوامان لە دادوەر كرد كە ئەو كەسانە بە كەفالەتیش ئازاد نەكرێن و توندترین سزا بدرێن، بەڵام یەكێك لە دەستگیركراوەكان كە كەسێكی گەورەی لەپشت بوو، بە كەفالەت ئازادكرا، دواتریش بەپێی زانیارییەكانی ئێمە زۆربەیان بەكەفالەت ئازادكراون". 

گوتیشی: "پێویستە سزاكان توند بكرێن، ناكرێت كەسێك بایی شەش ملیۆن دۆلار دەرمانی قاچاخی هاوردە كردووە و فرۆشتوویەتی، بە چەند ملیۆنێك دینارێك یان شەش مانگ حەپسكردن سزا بدرێت".





ئەم هەواڵە 3247جار خوێندراوەتەوە
 
 
ڤیدیۆ گەلەری
چەند دیمەنێکی سامناکی زریان و گەردەلوولەکەی ئەمریکا
یەکەم گۆڵی رۆنالدۆ لەگەڵ یانەی یۆڤانتس
منداڵێک بەشێوەیەکی سەرسوڕھێنەر لە رووداوێکی ھاتووچۆ رزگاری دەبێت
پێشبڕکێیەکی ئەسپ سواری کارەساتی لێدەکەوێتەوە
گەنجێک ئافرەتێک لە مردن رزگار دەکات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad