English | عربی | Kurdî دواهەواڵ
ڕاستەوخۆ  
 
بەقەدەر شێخ محەمەد باساكی و ڕەووف كانیساردییش غیرەتیان نیە!
2018-10-17 [10:01 AM]

نووسینی: جەمال عەبدوڵا


• ھیچ نەبووە جاچیبووە ؟ ڕۆژی 15 ی ئۆكتۆبەری 2017 و دوای تەواوبوونی كۆبوونەوەكەی نێوان پارتی و یەكێتی لەدوكان، نێچیرڤان بارزانی و مەلابەختیار كۆنفرانسی ڕۆژنامەوانی بكەن و پوختەكەی ئەوەبێت ھەرھەڵوێست و ھەركارێك بكرێت بەیەكەوەدەبێت بەڵام لەپشت سەری پارتی و یەكێتیەوەو بۆ شەوەكەی بچیت حەشدی شەعبی و ھێزەچەكدارەجیاجیاكانی عێراق - كە بەشبەحاڵی خۆم ھەموویان بەداگیركەری كوردستان دەزانم - بھێنیتەوە و سواری سەری كەركووك و خورماتووی بكەیت و بشدەوێت بەرەوھەولێربێن بەڵام پێشمەرگەی كوردستان لەپردێ لووتتان بشكێنن و بەخۆیان و دەبابەی ئەبرامزی ئەمریكیەوە بتانكەن بە پەندی زەمانەو پۆڕی خوراو . 
• ھیچ نەبووە، جا چیبووە ؟ ھەتا چەند ڕۆژێك پێش 16 ی ئۆكتۆبەر پارێزگارێكی كوردی سەربەخۆخوازی نەترس لەداگیركەر پارێزگاری كەركووك بێت بەڵام دوای 16 ی ئۆكتۆبەر پارێزگارێكی عەرەبی شۆڤێنیست بێ پرسی كوردو تەنانەت بێ پرسی پاڵەوانەكانی 16 ی ئۆكتۆبەر لەبەغداوە ئەمری بۆ دەربچێت بۆ ئەوەی ببێت بە پارێزگاری كەركووك وبەئارەزووی خۆی و ھەروەك زەمانی حوكمی سەدام خەریكی تەعریب بێت و ھەتا ئەمڕۆش ھەر ئەو عەرەبە شۆڤێنیستە پارێزگاری بەزۆر سەپێنراوی كەركووك بێت . ئەمەشیان ھیچ نیە جا ئەوەچیە ؟ ئەمە قسەی ئەوانەن كە چەند ڕۆژێك پێش 16 ی ئۆكتۆبەر خۆیان ھەڕاج كرد !
• ھیچ نەبووە جا چی بووە ؟ ھەتا یەك ڕۆژ پێش 16 ی ئۆكتۆبەر كورد لەژێر دەسەڵاتی پێشمەرگەو دەزگاكانی بەڕێوەبردنی خۆیدا ئاساییش و ژیان و كەرامەتی پارێزراوبێت بەڵام لە16 ی ئۆكتۆبەردا ژیان و كەرامەت و ئاساییشی بخرێتە ژێرپێی داگیركەرانی كوردستان . جا ئەمە چیە جا چیبووە ؟ ئەمە قسەی ئەوانەن كە چەند ڕۆژێك پێش 16 ی ئۆكتۆبەر كەرامەتی خۆیان بەتەواوی شكاند ! 
• ھیچ نەبووە، جا چی بووە ؟ پێش 16 ی ئۆكتۆبەر كوردی كەركووك و خورماتوو لەسەر ماڵ و حاڵی خۆیان بوون بەڵام لە 16 ی ئۆكتۆبەرو ڕۆژانی دواتر 170 ھەزار كەسی ئەو دوو شوێنەی كوردستان ئاوارەببن . جا ئەمە چیە جا چیبووە ؟
• ساڵێك بەسەر - نازانم چی بەو ڕووداوەی 16 ی ئۆكتۆبەری 2017 بڵێم چونكە خیانەت بەكەم دەزانم بۆ ئەو ڕووداوە – تێپەڕی و لەو ڕۆژەوە ھەتا ئێستا داگیركەرانی كوردستان لە كەركووك و خورماتوو چیان بوێت لەكوردی دەكەن، لەگرتن لە كوشتن لەفراندن لەدزی، ھتد .. بەڵام جەماعەتە كوردەكەی ئۆكتۆبەر لەكەركووك نەك ھەردەسەڵات بەڵكو غیرەتی ئەوەشیان نیە كە بڵێن ئەوانە كوردن و ھەر ھیچ نەبێت وەك شێخ محەمەد باساكی و ڕەووف كانیساردی لەكاتی زۆر تەنگانەدا غیرەتی كوردبوون و كوردایەتیان بجوڵێت و بەرگریەكیان لێبكەن و لە مەترسی بیانپارێزن . شێخ محەمەد باساكی و ڕەووف كانیساردی كێن و لەكاتی زۆر تەنگانەدا چیانكردووە ؟ 
• لەساڵانی ھەشتاكانی سەتەی ڕابردوودا شێخ محەمەد باساكی لەسلێمانی یەكێك بوو لە موستەشارەكانی بەعس ئەوەی كورد پێیدەڵێت سەرۆك جاش . لەكاتی ئەنفالی ناوچەی قەرەداغدا دوو پێشمەرگەی یەكێتی خۆیان تەسلیمی شێخ محەمەد باساكی دەكەن بەڵام شێخ محەمەد باساكی ئەو دوو پێشمەرگەیەی یەكێتی تەسلیمی سوپای بەعس ناكات و ھەرخێرا لەفەوجەكەی خۆی ناویان وەك جاش دەنووسێت و لەمەرگ ڕزگاریان دەكات . ئەی ڕەووف كانیساردی كێیە ؟ ڕەووف كانیساردییش لەسلێمانی ھەمان كاری شێخ محەمەد باساكیی ھەبوو، بەڵام لەكاتی قەدەغەكردنی ھاتوچۆ ئەوەی پێیدەڵێن مەنعی تەجەول لەسلێمانی و ھەر لەناو ماڵەكەی خۆی و نانەواخانەیەكی سەروو ماڵی خۆی بەدەیان سەربازی ھەڵاتووی كورد دەشارێتەوە و دەرابەی نانەواخانەكەیان لەسەر دادەخات بۆ ئەوەی بەردەستی سوپای بەعس نەكەون چونكە ئەگەر بەردەستبكەوتنایە ڕەمی دەكران و ئەو كاتە بەعس پارەی ئەو فیشەكانەشی لە خانەوادەی ڕەمیكراوەكە دەسەندەوە كەڕەمیەكەیان پێكردووە ! ئینجا لە ئۆكتۆبەری 2017 وە ھەتا ئێستا بەدەیان كوردی كەركووك و خورماتوو بەدەستی حەشدی شەعبی و ھێزەكانی عێراقی داگیركەر، گیراون، ئیھانەكراون، كوژراون، كەچی جەماعەتە كوردەكەی 16 ی ئۆكتۆبەر لە كەركووك كڕ لێیكەوتوون و تەنانەت بەقەدەر شێخ محەمەد باساكی و ڕەووف كانیساردییش غیرەتی كوردبوون و كوردایەتیان نیە ! كە بەم دوانەیان دەوت موستەشار واتە سەرۆك جاش ! تەنانەت من خۆم ھەر لەساڵی 1987 دا قوتابیەكی زانكۆی موسڵ بووم بەڵام نەچووبووم بۆ تەدریبی جەیشی شەعبیی ھاوینە واتە منیش لەڕیزی ھەڵاتووەكاندا حسابم بۆ دەكرا و بەعس بەمانەیان دەوت موتەخەلیف !! بەڵام بەرەبەیانێكی زووی ڕۆژی ئەو مەنعی تەجەولە ئامرسریەیەكی جاش لەگەڵ موستەشارەكەی خۆیدا و ھەر بە ئۆتۆمۆبێلی موستەشارەكە واتە سەرۆك جاشەكە منیان لەناو سلێمانی دەركرد بۆ دەرەوەی شارو كە شەو مەنعی تەجەول لەناوشار تەواوبوو ھێنامیانەوە بۆ ناوشاری سلێمانی.





ئەم هەواڵە 691جار خوێندراوەتەوە
 
 
ڤیدیۆ گەلەری
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
ڤیدیۆیی .. ساتی کوشتنی تارا فارس
ھەڵۆیەک ھەوڵی رفاندنی منداڵێک دەدات
چەند دیمەنێکی سامناکی زریان و گەردەلوولەکەی ئەمریکا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad