English | عربی | Kurdî دواهەواڵ
ڕاستەوخۆ  
 
دوو باڵەخانەی 18 پۆلی لە سلێمانی و هەڵەبجە کرانەوە
2018-10-31 [03:17 AM]

ZNA - هه‌ولێر


 وەزیری پەروەردەی حکومەتی هەرێمی کوردستان لە هەردوو شارى هەڵەبجە و سلێمانی دوو باڵەخانەی 18 پۆلی کردەوە کە لە لایەن خێرخوازێکى زاخۆییەوە دروست کرابوون.

لە هەڵەبجە و بە ئامادەبوونى پارێزگا و قایمقام و بەرپرسانى حکومى هەڵەبجە، وەزیرى پەرەردە گوتى "پێش نزیکەی 10 رۆژ لە شاری خۆشەویستی هەڵەبجە بووین،

ئەمڕۆ بۆ جاری دووەم هاتینەوە ئەم شارە و دواتریش دەچینە سلێمانی بۆ کردنەوەی دوو باڵەخانەی 18 پۆلی، کە لەلایەن خێرخواز کاک خەلیل و براکانی لەسەر ئەرکی خۆیان دروستیان کردووە".

 دکتۆر پشتیوان سادق باسى لەوە کرد "بەناوی حکومەتی هەرێمی کوردستان سوپاس ئەو بەڕێزانە و کاک خەلیل و کۆمپانیای یوبی هۆڵدینگ دەکەم کە لەسەر ئەرکی خۆیان نۆ باڵەخانەیان بۆ وەزارەتی پەروەردە دروست کردووە، بێگومان ئەوان لە گرنگی پەروەردە تێگەیشتوون".

سەبارەت بە پێویستییەکانیان بە باڵەخانەی قوتابخانە، وەزیری پەروەردە باسى لەوە کرد کە "ئەگەر تەنها حیسابی قوتابیانی تازە وەرگیراو لە پۆلی یەکەمی بنەڕەتی بکەین کە ژمارەیان نزیکەی 168 هەزار قوتابی دەبێت، پێویستمان بە 410 باڵەخانەی 18 پۆلی هەیە. لە ساڵی 1992 تەنها 900 باڵەخانەی قوتابخانە هەبووە، ئێستا بە گوند و شارەکانەوە زیاتر لە شەش هەزار باڵەخانەمان هەیە و ملیۆنێک و 750 هەزار قوتابی و خوێندکار تێیاندا دەخوێنن، سوپایەکی گەورە و جێگەی ئومێدی گەورەن بۆ ئاییندەی کوردستان".

 لەبارەی ئەو بودجەیەی حکومەت بۆ تەواوکردنی قوتابخانە ماوەکان دابینی کردووە، وەزیری پەروەردە گوتی "لە مانگی رابردووەوە حکومەت بڕیاری داوە مانگانە زیاتر لە ملیارێک و 500 ملیۆن دینار بۆ تەواوکردنی ئەو پڕۆژانە خەرج بکات کە تەواو نەکراون، ئێمە 300 پڕۆژەمان هەیە لەبەر قەیرانی دارایی تەواو نەکراون، خۆشبەختانە ئێستا بەڕێز سەرۆکوەزیران فەرمانی کردووە مانگانە ئەو بڕە پارەیە خەرج بکرێت بۆ تەواوکردنی ئەو باڵەخانانە".

دکتۆر پشتیوان سادق، وەزیری پەروەردە گوتیشى "لە 4 ساڵی رابردوودا نزیکەی 100 باڵەخانە لەلایەن خێرخوازان و رێکخراوە بیانییەکانەوە یان دروستکراون یان تەواوکراون، بە هاوکاری هەموو لایەکیش نزیکەی دوو هەزار باڵەخانەشمان نۆژەن کردووەتەوە و لەمەولا کارى زیاتر دەکەین."





ئەم هەواڵە 1651جار خوێندراوەتەوە
 
 
ڤیدیۆ گەلەری
چەند دیمەنێک لە لافاوەکە فەرەنسا
ڤیدیۆیی .. شەقامی خۆت و چانسی خۆت
ڤیدیۆیی .. ساتی کوشتنی تارا فارس
ھەڵۆیەک ھەوڵی رفاندنی منداڵێک دەدات
چەند دیمەنێکی سامناکی زریان و گەردەلوولەکەی ئەمریکا
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad