English | عربی | Kurdî دواهەواڵ
ڕاستەوخۆ  
 
رۆژ ئاڤای کوردستانێ و گوھدارینەکرنا ھەرێما کوردستانێ
2018-11-08 [01:37 AM]

نڤیسینا : غیاس خالد زێباری


بزاڤا سیاسی و نەتەوی یا کوردستانی ، ل سەرەتایا سەدێ بیستێ ل باشوور و لسەر دەستێ ماڵباتا بارزان و پاشان دامەزراندنا پارتی دیموکراتی کوردستان لسەر دەستێ نەمر مه‌لا مستەفا بارزانی سەرھەلدایە و شۆرەش و سەرھەلدان لسەر دەستێ وان بەرپا بوونە ، دڤان سالێن دوور و درێژ قۆناغێن جودا جودا بڕینە و فێری زۆر ئەزمۆنا بوونە ، تاکۆ پارتی و مالا بارزانی ب دیدەڤانیا سیاسی و رەوشەنبیر و چاڤدێرێن بیانی بوویە قوتابخانا پێکەھاندنا کەسانێن سەرکردە و کاریزما و ھەرێما کوردستانێ لسەر دەستێ وان بوویە پێشەنگ و لێڤەگەرا کوردایەتیێ بۆ ھەمی پارچێن کوردستانێ ، چونکی پارتی دیموکراتی کوردستان ، پارتیەکا کوردستانی یە و ھەردەم پشتەڤان و پەناگەە بوویە بۆ بزاڤ و پارتیێن پشکێن دیتر یێن کوردستانی بێ کو مایتێکرنێ دکار و بارێن واندا بکەن .
پشتی شۆرەشا گەلێ سووریا لسالا ٢٠١١ ، پشکەکا بەرفرەهیا رۆژئاڤایا یێ کوردستانێ ھاتە رزگارکرن ، لێ بالێ پەکەکێ بناڤێ پەیەدێ نەشیان خۆ دگەل رەوشێ بگونجینن و ب ھێزا چەکی خۆ لسەر دەڤەرێ و دەسھەلاتێ زاڵکر و دژی ھەر رێکخستنەکا کوردستانی یا نە دگەل ئایدولۆژیا وان راوەستان ، تا ژ ئەنجام دا رۆژ ئاڤایێ کوردستانێ نەشیا مفای لڤێ رەوشا وەلاتێ سووریا و دەڤەرێ ببینیت و ببیتە دەڤەرەکا ئازاد بۆ ھەر کوردەکێ رۆژ ئاڤا و خزمەتا بزاڤا سیاسی و نەتەوایەتیا کوردستانی بکەت . 
لێ بۆ دەڤەرەک بۆ زاڵبوون کرنا ئایدیولۆژیا تاکڕەویا پەکەکێ و چەندین بالێن رێکخستی و لەشکری دامەزراندن و دژی دیموکراسیەتێ و ئازادیێ راوەستان ، تا گەھشتە ئاستێ رێگریکرنێ ل ڤەگەراندنا خەلکێ رۆژ ئاڤا ئەوێن ل باشوور و پێشمەرگەھێن وان بۆ بەرەڤانیکرنێ ل رۆژ ئاڤا .
رەفتار و سەرەدەریێن پەکەکێ مەزنترین رێگری بوون لھەمبەر گەشەکرنا بزاڤا سیاسی و نەتەوی و جڤاکی و ئابووری و ئێمناھی لرۆژ ئاڤایێ کوردستانێ ، ئەگەر ئەو نەبان دبیت ئەو بەشێ کوردستانێ ژی مینا باشوورێ کوردستانێ لسالێن نەوەتا ببا ھەرێمەکا ئازاد دبن پارێزەریا نیڤ دەولەتی و دەستووری و دانپێدانکری ، لێ پەکەکێ ھەمی کڤاشتنێن خۆ بۆ سەپاندنا بەرژەوەند و ئایدلۆژیا پارتیا خۆ بکار ئینان و بەرژەوەندێن گشتی کرنە قوربانی وان ، ھەرچەندە ھەرێما کوردستانێ چ وەک سەرۆکێ ھەرێمێ یان سەرۆکێ حکومەتێ لسەر ڤان رەفتار و سەرەدەریا ئەو ھایدار کرن و ھەولێن جدی بۆ رێکەفتنەکا سیاسی دناڤەرا ئالیێن سیاسی یێن رۆژ ئاڤایێ کوردستانێ ، دووماھی ھەولا ھەرێمێ و سەرۆک بارزانی رێکەفتنا دھوک ل ٢٢ تۆکتۆبەرا سالا ٢٠١٤ ، لێ پەکەکی و ئەوێن بن پەرێن وان پیگیرێ پێ نەکر ، دیسان پشتگیریا ھەولێن جدی یێن سەرۆک بارزانی و حکومەتا ھەرێمێ نەکر بۆ گرێدانا کۆنگرێ نەتەوی و داخازا پرانیا ئەنداما کر ، برەنگەکێ گشتی ھەردەمێ مەترسی لسەر درۆست دبیت ھەوارا خۆ دئینە لای پارتی و سەرۆک بارزانی و حکومەتا ھەرێمێ و پاشان ڤەدگەرێنەڤە بۆ سەر رەقی و خۆ سەپاندنا جاران و گوھداریا ئامۆژگاریێن ھەرێما کوردستانێ ناکەن ، سەرەرای ھایدارکرنا بەردەوام لسەر مەترسیێن لسەر درۆست دبن ، نەخاسمە ژلایێ تورکیا ، ھەر وەکی ل ٢٢ / ٧ / ٢٠١٣ ێ سەرۆک بارزانی دگەل ( ٣٩ ) پارتیێن ھەرچار پارچێن کوردستانێ کۆمبووی بۆ بەستنا کونگرێ نەتەوی ، ھەر وەسا رێزدار نێچیرڤان بارزانی بەری سێ سالا د پانێلەکا زانکۆیا ئەمریکی ل دھۆک ، راگەھاند بوو ، ئەگەر دەسھەلاتا رۆژ ئاڤایێ کوردستانێ خۆ ل سیاسەت و ئایدیلۆژیا پەکەکێ قورتال نەکەت ، تورکیا دێ ڤێ یەکێ کەتە بەھانە بۆ ھێرشکرنە سەر ، لێ پەیەدێ و حزبێن دیتر یێن بن پەرێن پەکەکێ دژی ڤێ کۆتنا نێچیرڤان بارزانی راوەستان ، تا ژبەر ڤێ سیاسەتا وان یا بێ بنەما و نە دبەرژەوەندا نەتەوی و نشتیمانی دا ، رەوشا رۆژ ئاڤایێ کوردستانێ ئێخستە د مەترسیان دا ، ھەر وەکی عەفرین لدەستدای و دوور نینە دەڤەرێن دیتر ژی ژلایێ تورکیا بھێنە داگیرکرن و ئەزمۆن و ئازادیا رۆژئاڤایێ کوردستانێ ژناڤ بچن . 
نھوژی ئەگەر ھەمان پێشنیارا رێزدار نێچیرڤان بارزانی جێ بجێ بکەن دەلیڤا ھەی ئەڤ مەترسیە لسەر رۆژ ئاڤایێ کوردستانێ نەمینن ، چونکی دەرکەفتنا رۆژئاڤایێ کوردستانێ لبن پەڕێن پەکەکێ و دانانا دەسھەلاتەکا دیموکراسی و دابینکرنا ئازادیان ، پشتەڤانیا ھەرێما کوردستانێ زێدەتر دێ بۆ ھێتە کرن و دێ شێت پشتەڤانیا نیڤ دەولەتی ژی بۆ دابین بکەت و تورکیا ژی وەک تیرۆرست سەرەدەریێ دگەل ناکەن و د ئاڤاکرنا سووریا یەکا نوو و دانانا دەستوورەکێ  دی ، دێ رۆل ھەبیت و شێن دەسکەفتێن نەتەوی و نشتیمانی بدەستڤە بینن ، چونکی ئەڤرۆ سەرۆکێ حکومەتا ھەرێما کوردستانێ کەسایەتیەکێ نیڤ دەولەتی یە و سەنگەکا تایبەت ھەیە و دشێت ب دبلۆماسی و ئاشتیانە قەیران و کێشێن مەزن و دژوان چارە بکەت ، ھەر وەکی لسالا بووری ھەرێما کوردستانێ ل مەزنترین قەیرانا سیاسی و ئابووری قورتال کری ، لەوما پێتڤی یە ئالیێن سیاسی یێن رۆژ ئاڤایێ کوردستانێ وەک برا گەورە رێنمایی یا لێ وەربگرن .





ئەم هەواڵە 6325جار خوێندراوەتەوە
 
 
ڤیدیۆ گەلەری
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
بە ڤیدیۆ.. كاره‌ سه‌خت و نایابه‌كانى چه‌ند كرێكارێك
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad