English | عربی | Kurdî دواهەواڵ
ڕاستەوخۆ  
 
 سەرۆک بارزانی : گەلی کوردستان ھەمیشە لایەنگری ڕێکاری ئاشتیانە و دیالۆگ بووە
2018-12-31 [10:45 AM]

ZNA – ھەولێر 



سەرۆک مەسعود بارزانی بەبۆنەی ساڵی تازەی زایینیەوە پەیامێکی راگەیاند و لە بەشێکی پەیامەکەی دەڵێت، ھیوادارم ساڵی تازە دەستپێکی قۆناغێکی نوێ بێت بۆ باشتربوونی ژیان و گوزەرانی خەڵک و بەدیھاتنی سەقامگیری و پێشکەوتنی زیاتر بۆ گەلەکەمان. 


ئەمەش دەقی پەیامەکەی سەرۆک بارزانییە 


 بەناوی خودای بەخشندە و میھرەبان

 بەبۆنەی سەری ساڵی نوێ پیرۆزبایی لە خەڵکی کوردستان و خانەوادەی سەربەرزی شەھیدان و پێشمەرگە قارەمانەکان دەکەم. ھیوادارم ساڵی تازە دەستپێکی قۆناغێکی نوێ بێت بۆ باشتربوونی ژیان و گوزەرانی خەڵک و بەدیھاتنی سەقامگیری و پێشکەوتنی زیاتر بۆ گەلەکەمان. 

بە پێویستی دەزانم سوپاسی خۆم ئاراستەی ھێزی پێشمەرگە و ھەموو خەڵکی کوردستان بکەم کە لە ساڵانی ڕابردوودا بە قوربانیدان و خۆڕاگری، لەبەرانبەر ھەڕەشەکان و تیرۆر و ئابڵۆقەدا وەستانەوە و دەنگی ڕەوا و ئاشتیخوازانەی خۆیان بە ھەموو جیھانیان گەیاند و، بەسەر پیلان و حەزی نەیارانیشدا سەرکەوتن. 
ئێستا گەلەکەمان لە قۆناغێکی تازەدایە و پێویستی بە پاراستنی دەستکەوتەکان و بەھێزبوون و بووژانەوەیە، ئەویش بۆ گەییشتن بە ئامانجە بەرزەکان و ئەو بەھا باڵایانەی کە گەلەکەمان دەیان ساڵە لەپێناویدا خەباتی کردووە و قوربانی داوە. 

لە مانگی ئەیلوولی ڕابردوویشدا گەلی کوردستان لە مومارەسەیەکی دیموکراتیانەدا ویستی خۆی بۆ گۆڕانکاری و کوردستانێکی بەھێز دووپاتکردەوە و پێویستە ئەو ویست و متمانەیەی گەل لە چوارچێوەی حکوومەتێکی کارا و بەھێزدا جێبەجێ بکرێت. 
بە درێژایی خەباتی خۆی گەلی کوردستان ھەمیشە لایەنگری ڕێکاری ئاشتیانە و دیالۆگ بووە و ئێستایش ئەوە دووپات دەکەینەوە کە بۆ چارەسەرکردنی کێشە و گرفتەکانمان لەگەڵ بەغدا بژاردەی دیالۆگ و لێکتێگەییشتن دەگرینە بەر. 

لێرەدا بە دەرفەتی دەزانم کە لەبارەی چارەنووسی گەلی کورد لە سووریا نیگەرانیی خۆم ڕابگەیێنم، ھیوادارم پێشھاتەکانی سووریا و ئەو گۆڕانکاریانەی لەوێ لە ئارادان نەبنە ھۆی ئازار و ئاوارەبوون و نەھامەتیی زیاتر بۆ گەلی کورد لە سووریا. 

بە دڵنیاییەوە بوونی توندوتیژی و ئینکارکردن کێشەکان زۆر لەوەی ئێستا ھەیە قووڵتر دەکاتەوە. پێویستە ھەموو لایەک بە باشی لەوە بگات کە ناوچەکەمان چیتر بەرگەی ئەو ھەموو کێشە و توندوتیژی و تیرۆر و توندڕۆیی و ناسەقامگیری و کەڵەگایی ناگرێت و ئەرکی کۆمەڵگەی نێودەوڵەتیشە بۆ پاراستنی ئاشتی و دادپەروەری و ئاساییش سنوورێک بۆ ئەو ناسەقامگیرییخوازییە دابنێت و چیتر لەمە زیاتر گەلانی ناوچەکە و خەڵکی بێتاوان تووشی نەھامەتی و وێرانکاری نەبن و ئازار نەدرێن. 

لەساڵی تازەدا بەھیوای ئەوەی ئاشتی و پێکەوەژیان باڵ بەسەر ناوچەکەماندا بکێشێت و، ئومێدی خێر و خۆشی بۆ گەلی کوردستان دەخوازم.


 مسعود بارزانی

 ٣١ـی ١٢ـی ٢٠١٨
 





ئەم هەواڵە 3880جار خوێندراوەتەوە
 
 
ڤیدیۆ گەلەری
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
ڤیدیۆیی .... بە ئاگر و شمشێر قژی ئافرەتان رێکدەخات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad