English | عربی | Kurdî دواهەواڵ
ڕاستەوخۆ  
 
حكومه‌تی هه‌رێم: پێکهێنانی هێزی ئەمنی  هاوبەش باشترین چارەسەرە بۆ شنگال و ده‌وروبه‌ری
2019-01-06 [01:17 AM]

ZNA - هه‌ولێر


گرووپی قەیرانە نێودەوڵەتییەکان رۆژی ١٤ی تشرینی دووەمی ٢٠١٨ بڵاوکراوەیەکیان لەژێر ناوی "هەنگاوەکانی پێشکەوتنی شنگال" بڵاوکردەوە. ئەم بڵاوکراوەیە باس لە دۆخی شنگال و ململانێ سیاسییەکانی ئەو شارە دەکات کە وای کردووە پشتگوێ بخرێت و وەک پێویست کار بۆ دووبارە بونیاتنانەوەی ئەم شارە نەکرێت. لەم بڵاوکراوەیەدا ئاماژە بەوە کراوە کە پێویستە یوئێن و کۆمەڵگای نێودەوڵەتی کاری زیاتر بکەن بۆ گێڕانەوەی ئاشتی و سەقامگیری بۆ شنگال چوونکە وەک پێویست لەم رووەوە رۆڵیان نەگێڕاوە.

د.دیندار زێباری، رێکخەری راسپاردە نێودەوڵەتییەکان لە حکومەتی هەرێم رایگەیاند" پێشوازی لە راپۆرتی گرووپی قەیرانە نێودەوڵەتییەکان دەکەین سەبارەت بە شەنگال و دەوروبەری، بەڵام پێویستە ئاماژە بەوە بکەین تێبینیمان لەسەر ژمارەیە ك لەو پێشنیارانە هەیە کە لەم بڵاوکراوەیەدا ئاراستەی حکومەتی هەرێم کراوە، بۆ نموونە ئەوان داوای گۆڕینی قائیمقامی شەنگال دەکەن، لە کاتێکدا کە بەشێوەیەکی فەرمی (شەرعی) لەلایەن خەڵکی شنگالەوە هەڵبژێردراوە بەپێی دەستوور و بە هەڵبژاردن.

رێکخەری راسپاردە نێودەوڵەتییەکان رایگەیاند "پێش هاتنی داعش بۆ شنگال و دەوروبەری لە ماوەی ساڵانی ٢٠٠٣-٢٠١٤ هێزەکانی پێشمەرگەی کوردستان بە هاوبەشی لەگەڵ هێزە عێراقییەکان کۆنترۆڵی رەوشی ئەمنی ناوچەکەیان کردبوو و ئاسایشی ئەو ناوچەیە بە جۆرێک پارێزراوبوو کە هیچ کردەوەیەکی تیرۆریستی یاخود توندڕەوی لەو ناوچانە رووی نەداوە. کەواتە مێژووی ئەم ناوچەیە ئەوە دەسەلمێنێت کە پێکهێنانی هێزی ئەمنی  هاوبەش باشترین چارەسەرە بۆ پاراستنی رەوشی ئەمنی ناوچەکە. 

لە درێژەی قسەکانیدا د.دیندار زێباری رایگەیاند "بە مافی شەرعی خۆمانی دەزانین کە هێزەکانی پێشمەرگە تەواجودیان هەبێت لە شنگال و دەوروبەری تا ئەو کاتەی کە کێشەی ماددەی ١٤٠ یەکلا دەکرێتەوە. چوونکە زۆرینەی خەڵکی ئەو ناوچانە کوردن و هێزەکانی پێشمەرگەش هەر لە خودی خەڵکەکە خۆیانن کە پارێزگاری لە شاری خۆیان دەکەن. حکومەتی هەرێم پێشتر هێزێکی تەواوی لە پێکهاتە ئێزیدییەکان پێکهێناوە کە ژمارەیان ٤ هەزار کەسە و سەر بە وەزارەتی پێشمەرگەن، لە هەرێمی کوردستان و ئەو ناوچانەی حکومەتی هەرێم کۆنترۆڵی کردوون هەموو هێزەکان لە چوارچێوەی وەزارەتی پێشمەرگەن".  

زێباری راشیگەیاند "ئەوەی لێرەدا پێویستە ئاماژەی پێ بکرێت ئەوەیە کە هێزەکانی پێشمەرگەی کوردستان لەپێناو رزگارکردنی شنگال و کۆنترۆڵکردنەوەی لە دەستی داعش رۆڵی سەرەکیان گێراوە و زیاتر لە ٧٠٠ پێشمەرگە لە ئۆپەراسیۆنی رزگارکردنی شەنگال شەهید بوونە بۆیە تا جێبەجی کردنی ماددەی ١٤٠ و چارەسەر بوونی کێشەی ناوچە جێناکۆکەکان هێزەکانی پێشمەرگە پێویستە تەواجودیان هەبیت لەم ناوچانە".

گرووپی قەیرانە نێودەوڵەتییەکان داوایان کردووە کە رێگای سەرەکی نێوان شنگال و دهۆک بکرێتەوە بۆ ئەوەی خەڵک بتوانن ئازادانە هاتووچۆ بکەن و بگەڕێنەوە سەر ماڵ و حاڵی خۆیان. زێباری رایگەیاند "بەپێی رێککەوتنی نێوان حکومەتی هەرێم و حکومەتی فیدراڵی رۆژی ١٥ی تشرینی دووەمی ٢٠١٨ رێگاکە کراوەتەوە و خەڵک دەتوانن بە ئاسانی هاتووچۆ بکەن، بەڵام هۆکاری نەگەڕانەوەی خەڵک بۆ شەنگال رێگاکە نییە بەڵکو ئەو کاولکارییەیە لە شنگال روویداوە و نەبوونی خزمەتگوزاری و پێداویستیە سەرەتاییەکان لەوێ وای کردووە خەلک نەگەرێتەوە شنگال".

لە کۆتاییدا دیندار زێباری، رێکخەری راسپاردە نێودەوڵەتییەکان رایگەیاند "بە بەردەوامی داوامان لە رێکخراوەکان، ئاژانسەکانی یوئێن و کۆمەڵگای نێودەوڵەتی کردووە کە هاوکاری خەڵکی ئەم شارە بکەن بەڵام ريكخراوه نێودەوڵەتییەکان لەم بوارەوە زۆر کەمتەرخەم بوونە و تەواجودیان لە شنگال و دەوروبەری نەبووە  هەر بۆیە نزیکەی ٨٠%ی ئەو ئێزیدیانەی کە ئاوارەی هەرێمی کوردستان بوونە نەگەڕاونەتەوە سەر ماڵ و حاڵی خۆیان".

 





ئەم هەواڵە 1366جار خوێندراوەتەوە
 
 
ڤیدیۆ گەلەری
منداڵێک لە ناو ئۆتۆمبێلی دایکی دەکەوێتە خوارەوە
ڤیدیۆیی .... بە ئاگر و شمشێر قژی ئافرەتان رێکدەخات
فرۆکەوانێک بەم شێوەیە رێز لە مامۆستاکەی دەگرێت
کچێک بە موعجیزە رزگاری دەبێت
لە عێراق بەم شێوەیە ئاوی باران لادەدەن ، بە دڵنیایی دوو جار سەیری دەکەیەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad