English | عربی | Kurdî دواهەواڵ
ڕاستەوخۆ  
 
پەیامی سەرۆك بارزانی بەبۆنەی نەورۆز
2019-03-20 [11:53 AM]

ZNA-هەولێر


سه‌رۆك بارزانی له‌ په‌یامێكیدا به‌بۆنه‌ی نه‌ورۆز رایده‌گه‌ێنێ، ئێستا قۆناغێكی تره‌ له‌ ژیانی گه‌لی كوردستاندا و پێویستییه‌كانی ئه‌و قۆناغه‌ وا ده‌خوازێ كه‌ به‌ره‌و بنیاتنانی كوردستانێكی به‌هێز و گه‌شه‌سه‌ندوو هه‌نگاو بنێین كه‌ له‌ ڕاستیدا هه‌ر ئه‌وه‌یش ویستی ڕاسته‌قینه‌ی هه‌موو هاووڵاتیانی كوردستانه‌ و پێویسته‌ ڕێز له‌و ئیراده‌یه‌ بگیرێت.

ئه‌مه‌ش ده‌قی په‌یامه‌كه‌ی سه‌رۆك بارزانی-یه‌

بەناوی خودای بەخشندە و میهرەبان

بەبۆنەی جەژنی نەتەوەیی نەورۆز و هاتنی بەهار و نوێبوونەوەی سرووشت گەرمترین پیرۆزبایی خۆم ئاراستەی هاووڵاتیانی خۆشەویستی كوردستان و خانەوادەی سەربەرزی شەهیدان و پێشمەرگە قارەمانەكان و هەموو تێكۆشەر و نیشتیمانپەروەرانی كوردستان دەكەم.

نەورۆز بۆ گەلی كوردستان هەمیشە موژدەی دەستپێكێكی نوێ و ئومێدی تازە و سەركەوتن بەسەر ستەمكاران و سەختییەكاندا بووە. خەڵكی كوردستان لە ساڵانی ڕابردوودا لە شەڕی دژی تیرۆریستان و لەبەرانبەر زوڵمی ناحەزان و كێشە و قەیران و گوزەرانی خەراپ خۆڕاگر بوونە و ئەو خۆڕاگرییەیان مایەی پێزانینە. جێگەی خۆیەتی لەوبۆنە نەتەوەییەدا داوا لە هەموو لایەك بكەم وەك وەفایەك بۆ خوێنی شەهیدان و قارەمانێتیی پێشمەرگە و خۆڕاگریی گەلی كوردستان، پێشكەوتنو پاراستنی كوردستان بكەنە ئەولەویەتی كارەكانیان. ئێستا قۆناغێكی ترە لە ژیانی گەلی كوردستاندا و پێویستییەكانی ئەو قۆناغە وا دەخوازێ كە بەرەو بنیاتنانی كوردستانێكی بەهێز و گەشەسەندوو هەنگاو بنێین كە لە ڕاستیدا هەر ئەوەیش ویستی ڕاستەقینەی هەموو هاووڵاتیانی كوردستانە و پێویستە ڕێز لەو ئیرادەیە بگیرێت. چونكە ئەو ئازادی و دەستكەوتانەی ئێستا هەن بەرهەمی خوێنی شەهیدان و خۆڕاگریی خەڵكی كوردستانە.

لەوبۆنەیەدا جەخت لەسەر پاراستنی فەرهەنگی پێكەوەژیان و برایەتی و تەبایی نێوان پێكهاتەكانی كوردستان دەكەینەوە و ئومێدی قووڵتربوونی ئەو فەرهەنگە بەهادارەی گەلی كوردستان دەخوازین. وێڕای سوپاسگوزاریم بۆ زەحمەت و شەونخونیی هێزەكانی پۆلیس و ئاساییش لە خزمەتكردنی خەڵك و دابینكردنی ئاساییش لە جەژن و بۆنەكاندا داوا لە هەموو هاووڵاتیانی خۆشەویست دەكەم پاراستنی ژینگە و جوانیی وڵاتەكەمان بە ئەركی سەرەكیی خۆیان بزانن.

هیوادارم نەورۆزی ئەمساڵ ببێتە دەستپێكێك بۆ ئاسوودەییهەموو خەڵكی كوردستان و ئومێد دەكەم ئەو نەورۆزە و هەموو جەژنەكان بە كامەرانی و بەختەوەری بەڕی بكەن.

نەورۆزتان پیرۆز و بمێنن بەخێر وخۆشی

مسعود بارزانی

20ـی 3ـی 2019





ئەم هەواڵە 2980جار خوێندراوەتەوە
 
 
ڤیدیۆ گەلەری
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
ڤیدیۆیی .... بە ئاگر و شمشێر قژی ئافرەتان رێکدەخات
فرۆکەوانێک بەم شێوەیە رێز لە مامۆستاکەی دەگرێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad