English | عربی | Kurdî دواهەواڵ
ڕاستەوخۆ  
 
راگەهاندنا کوردى دناڤبەرا بەرەلایى و وەزیفەتێ
2019-04-08 [05:06 AM]

نڤیسینا : رەمەزان نسرالدین کێڤلى


مەرەم ژ راگەهاندنا کوردى هەمى ئەو دام و دەزگەهن یێن نوکە رادبن ب بەلافکرنا دەنگ و باسان و هەر پێزانیەکێ یان بابەتەکى چ ئەڤ راگەهاندنە دەنگ و رەنگ بیت یان بتنێ دەنگ یانژى روژنامە و گوڤار بن دیسان کاریگەریا (سوشیال مێدیایێ) ژى یا دیارە ل سەر زانیارى و دەنگ و باسان ب شێوەکێ گشتى.
د وەلاتێن دیموکراتى دا راگەهاندن فاکتەرە بو دروست کرنا رایا گشتى و ئاگەهدارکرنا جەماوەرى ل سەر هەمى بویەر و بابەتێن روژەڤێ، هەروەسا کارێ وێ یە رابیت ب رەخنەگرتن و ئاراستەکرنا پێشنیار و پروژان بو لایەنێن پەیوەندیدار دگەل هندێ رولێ چاڤدێریێ ب شێوەیەکێ کارا ببینیت، ئەڤە هەمى دڤێت ب شێوەیەکێ راستگویانە بیت  دویر ژ پەردەپوشکرنا ئەڤان زانیاریان بو خەلکی، گومان تێدا نینە مەرەما مە راگەهاندنا سەربەخو و ئازادە، دەربارەى راگەهاندنا حزبى ئەوێ دوو وەزیفەتێن دى هەنە یا ئێکێ ئەوە گرنگیێ بدەتە کار و چالاکیێن حزبێ، یا دووێ هەمان وەزیفەتا ئەنجام بدەت یێن راگەهاندنا کەرتێ تایبەت ئەنجام ددەت، ل کوردستانێ راگەهاندن بویە ئالاڤەک بو هێرشکرنا لایەنێن بەرامبەر و بن پێکرنا پیروزیێن لایەنێن دى هەتا کو دگەهیتە رادێ نەتەوەیى دیسان رولێ خراب دگێرن بو بەربەلاڤبوونا توند و تیژیا سیاسى دناڤبەرا لایەنگرێن حزبێن خودا و ئازراندنا بابەتێن گوماناوى بوینە ئارمانجا ئەڤێ راگەهاندنێ لەورا ئەڤان کەنالان راستگویی یا خو ژدەست داینە.
راگەهاندنێ هندەک وەزیفەت هەنە د گشتى نە وەکو دروست کرنا کەش و هەوایەکێ ئازاد و ئارام و بەختەوەر ب رێکا (فلم و زنجیرێن درامایى) یانژى (بەرنامێن تایبەت) و گرنگى دان ب خوشى و نەخوشیێن خەلکى و پیروز راگرتنا یاسا و ریسایێن وى وەلاتى و بەرچاڤ وەرگرتنا داب و نەرێتێن نەتەوەیى و ئاینى بو هندێ دەبرینەکا دروست ژ ئەوى چڤاکى بکەت، لەورا ب دیتنا مە راگەهاندنا کوردى نەشیایە وەکو پێویست ئەڤان ئەرکان جێبەجێ بکەت و پتر بو ناکوکیێن سیاسى و جەدەلا سیاسى هاتیە تەرخانکرن، مەرەما مە راگەهاندنا کارا یە دگەل هندێ ژى بەشەکێ دى ژ ئەڤان دەزگایێن راگەهاندنێ کەفتینە سەر رێرەوێ خو یێ تەندروست بو ئەداکرنا وەزیفەتا خو.
لڤێرە رولێ حکومەتا هەرێما کوردستانێ گرنگە چونکە ئەوە رادبیت ب دانا رێدانێن ڤەکرنا ئەڤان کەنالا ل گور یاسایێن هەرێمێ دیسان هەر ئەوە رادبیت ب وەرگرتنا پێرابوونا ژ هەر کەنالەکى ل دەمێ ئەنجامدانا هەر سەرپێچیەکێ نەخاسمە رولێ بەرێز (نێچیرڤان بارزانى) د بابەتێ ئازادیا روژنامەڤانى دا کو زوربەیێ کەنالێن راگەهاندنێ ئەڤرو ب ئازادیانە کار و چالاکیێن خو ئەنجام ددەن و گەلەک جاران ئەو سنورێن بو هاتینە دەست نیشان کرن ژى د بەزینن لەورا راگەهاندن وەکو هەر دەستهەلاتەکێ کاریگەریا خو هەیە.
بو قوناغا داهاتى تاکێ کورد پێویستى ب بەختەوەرى و ئارامى و ئاشتیا کومەلایەتى هەیە لەورا ب دیتنا من پێوسستە راگەهاندنا کوردى گرنگیێ ب ئەڤێ چەندێ بدەت دیسان ئەوان پرسان ب ڤەکولیت یێن گرێدایى زانست و پەروەدە و ئاڤاکرنا جڤاکى، لەورا بو گشت کەنالان پێشنیار دکەم کو رەوشا (جڤاکى و سیاسى و ئابورى و دەرونى) یا خەلکى بەرچاڤ وەربگرن بو هندێ ئەم دەربازى قوناغەکا تازە بین، ل دوماهیکێ مە ئومید هەیە ئەڤ قوناغا بەرەلایى دەرباز بیت و قوناغەکا ئەکادیمى دەست پێ بکەت.





ئەم هەواڵە 4894جار خوێندراوەتەوە
 
 
ڤیدیۆ گەلەری
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
بە ڤیدیۆ.. كاره‌ سه‌خت و نایابه‌كانى چه‌ند كرێكارێك
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad