English | عربی | Kurdî دواهەواڵ
ڕاستەوخۆ  
 
نێچیرڤان بارزانى ناسناڤەک بو دوو قوناغێن ژئێک جودا
2019-05-31 [06:18 AM]

نڤیسینا : رمظان نصرالدین کێڤلى


(نێچیرڤان بارزانى) د ئەزمونا حکومرانیا هەرێما کوردستانێ دا بویە ناڤەک و دێ د لاپەرێن مێژوویا کوردى دا هێـتە تومارکرن, چونکە هەر کەسەک یان سەرکردەیەکێ تەحەولەکا (سیاسى - ئابورى - چڤاکى – رەوشەنبیرى) بکەت وى دەمى ئوتوماتیکى مێژوو دێ باس لێ کەت یانژى دێ بیتە ناسناڤەک بو دەهان گوتار و نڤێسین و ریپورتاژ و راپورتێن روژنامەڤانى. 
وەکو دهێتە زانین کو ئیدارێ چەند وەزیفەتێن سەرەکى هەنە پێکهاتینە ژ (رێکخستن - پلان دانان –چاڤدێرى کرن – هەلسەنگاندن)، ئەڤجا (هەلسەنگاندن)ـا کارێ حکومرانیێ ئێکە ژ تایبەتمەندی و وەزیفەتێن ئیدارى، گومان تێدا نینە ئەگەر ئەم ژلایێ (ئەکادیمى) ڤە هەلسەنگاندنا حوکمرانیێ ل هەرێما کوردستانێ بکەین ئەڤ ئەزمونە یا بێ کێماسى نینە بەلکو د هەمى سەکتەرێن جوداجودا کێم و کاسى هەنە و د گەلەک ئاستان دا دشیان دا بویە کارێن باشتر بهێنە کرن دگەل هندێ ئەو داهاتێ ل بەر دەستێ حکومەتێ لدیف دەستپێکێن کارى ب شێوازەکێ دى ب مەزێخن ئانکو بو دارێشتنا سیاساتێن گشتى حکومەتێ پێویستى ب عەقلەکێ ئیدارى یێ ڤەکرى تر هەبویە کو ل سەر هەمى ئاستان خزمەتەکا باشتر بهێتە کرن نەخاسمە دبوارێ پەروەردێ دا بەلێ د هەمى قوناغان دا ژبلى هوکارێن نافخویى هوکارێن دەرەکى ژى هەنە کاریگەریێن راستەخو ل سەر حکومەت و زەلامێن حکومەتێ دکەن. 
ل نافخویا هەرێما کوردستانێ ژبلى هندێ کو حزبێن سیاسى ئەوێن بەشدارى حکومەتێ بوین نەشیاینە هەمى وەکو ئێک تیم کار بکەن و زوربەیى جاران د روانگەیێ بەرژەوەندێن حزبى و رکابەریەکا توند یا سیاسى دا کاریگەریا خو ل سەر پروژە و یاسا و رەوشا روژانە یا هاولاتیان هەبوینە، دگەل هندێ جڤاک بخو ژى یێ هاریکار نەبویە بو هندێ دەستێ خو بداننە سەر ئەوان شاشى و کێماسیان و چارەسەر بکەن، گەلەک جاران جڤاک ب شاشى و شاش تێگەهاندنا راگەهاندنا سیاسى دهاتە سەردابرن بێى کو هزر یان پرسیار ل سەر ئەوێ شاش تێگەهاندنێ بهێت کرن. 
ژلایەکێ دی ڤە ل سەر ئاستێ ژدەرڤە بو نمونە فشارێن زور یێن حکومەتا عێراقێ و تێکەل بوونا بەرژەوەندێن وەلاتێن هەرێمى یانژى سیاسەتێن نیڤ دەولەتى ئەوێن ل دەڤەرێ دهێنە پەیرەوکرن حکومەتا هەرێمێ نەچار کر بەلانسەکێ بێخیتە دکار و پەیوەندى و بازرگانیا خو دا بو هندێ کو دناڤ ئەڤان هەمى کێش و ڤەکێشێن هەرێمى و نیڤ دەولەتى و نافخو دا یا سەرکەفتى بیت، گومان تێدا نینە ئەڤێ رەوشێ ئەگەر سیاسیێن بیرتیژ و خودان دیتن بو پاشەروژێ نەبن یا ئاسان نینە پروسا حکومرانیێ سەرساخ ژ ئەڤان هەمى ناکوکیان سەربێخن بەلکو ل سەر گەلەک ئاستان دێ توشى مەزنترین پرسگرێک بیت. 
ژلایێ خزمەتگوزارى ڤە گورانکاریێن زور مەزن ل هەرێما کوردستانێ روی داینە ب تایبەت ژلایێ ژێرخانا ئابورى ڤە ئەم دشێین بێژین بەرێ بنیاتى بو ئاڤکرنا دەولەتا داهاتى هاتیە دارێشتن وەکو رێک و بالەخانە و قوتابخانە و زانکو و نەخوشخانە و چەندین خزمەتێن دى، بەلێ ژلایێ گرنگى دان ب بەرهەمێن نافخویى ڤە لاوازیەکا بەر چاڤ هەبویە سەرەدارى هندێ کو وەزارەتا پلان دانانێ بەرنامەکێ گونجایى هەیە و نوکە بەردەوام گرنگى ب بەرهەمێ نافخو دهێتە دان بەلێ هێشتا نەگەهشتیه وێ قوناغێ کو (اعتمادێ) ل سەر خو بکەن و هەمى پیتە دانا مە لسەر مە بخو بیت، ئەڤە ددەمەکى دا ل چەند سالێن بوورى کەرتێ گەشت و گوزارى بەرەف پێشڤە چویە بویە جهێ خوشحالیا کەسانێن تایبەتمەند. 
دیسان ئێک ژ خالێن دى یێن کاریگەرى ل سەر کاروانێ ئاڤاکرنێ و گەشەیا ئابورى و سیاسى کرى بابەتێ تیرورێ بویە، تیرور ب هەمى رامانێن خوڤە مەزنترین ئاستەنگ و مەترسى بویە ل سەر گشت جیهانێ نەخاسمە بو هەرێما کوردستانێ ب شیانێت خو یێن متەوازع ڤە شیایە روى ب روى تیرورا جیهانێ بیت و ژلایێ ئاسایشى ڤە مەزنترین شانازیە بو حکومەتا هەرێما کوردستانێ کو ل دەڤەرەکا وەکو عێراقێ بشێت ئەزمون و پێگەهێ خو ب پارێزیت، وەکو دهێتە زانین ب چەند دەمژمێرەکان زوربەیى ئاخا عێراقێ و چەند وەلاتێن دى کەفتە دەستێ تیروستان بەلێ سایا سیاسەتا حەکیمانە یا حکومەت و پێشمەرگە و دەزگەهێن ئاسایشێ ئەزمونا کوردستانێ و سەر و مالێ هاولاتیان هاتیە پاراستن ب تایبەت رولێ پێشمەرگەیێ قارەمان کێم وێنە بویە ب وان شیانێن زور لاواز یێن بەردەست ژ چەک و پلانێن دەستپێکى شیان مەزنترین داستان توماربکەن دگەل هندێ ژى ل نافخویا هەرێما کوردستانێ رێک نەهاتیە دان هزرێن توند رەو سەر هلدەن و هەر زوى ئەڤ بابەتێ گرنگ ژى هاتیە کونترول کرن. 
دگەل کاروانێ ئاڤاکرنێ سەروکاتیا هەرێما کوردستانێ کو دەزگایەکێ شەرعی یێ گەلێ کورد بویە بەرنامێ سیاسى و دبلوماسى ل سەر گەلەک ئاستان دارێشتیە کو پەرەسەندنێ ب پەیوەندیێن هەرێما کوردستانێ بدەت، دیسان ئێک ژ کارێن ئەڤى دەزگایێ مەزن پاراستنا ئێک رێزیا نافمالا کوردى و دروست کرنا سەقامگێریا سیاسى بویە دگەل هەمى لایەنێن سیاسى، هەروەسا بو دەرڤە ژى نوینەراتیا بەرژەوەندێن بالا یێن هەرێما کوردستانێ دهاتە کرن و رول و پێگەهێ سەروک بارزانى د ئەڤى دەزگایى دا کێم وێنە بویە لەورا ژى بو قوناغا داهاتى وەکو لێڤەگەرێ کورد هاتیە ناسناڤ کرن، بو بەردەوامى دانا ئەڤى رولى و ئەڤێ سیاسەتێ گومان تێدا نینە کاریزما کاک (نێچیرڤان بارزانى) دێ شێت وێ ڤالاتیێ پر کەت ئەوا کو جەنابێ سەروکى بو قوناغا داهاتى پاش خو هێلایى ئەڤە ددەمەکى دا کو دڤێت ل بیرا مە بیت ئەزمونا کاک (نێچیرڤان بارزانى) یا حکومرانیێ چ سیاسى و دبلوماسى بیت یانژى ئابورى و خزمەتگوازى هەمى دەمەکى ل بن ئاموژگارى و راسپارێن لێڤەگەرێ کوردان بویە کو زوربەیى بەرپرسێن کوردان ب راسپاردێن جەنابێ وى هاتینە ئاراستە کرن بو خزمەتا ئەزمونا هەرێما کوردستانێ. 
لەورا قوناغا بهێت جودایە ژ قوناغا بەرى نوکە وەرگرتنا پوستێ سەروکێ هەرێمێ دێ ناسناڤەکێ دى و بەرنامە و میکانزمێن دى ل سەر وەزیفەتێن سەروکێ هەریمێ زێدە کەت چونکە کەسانەکێ خودان سەربورە د بیاڤێ حکومرانیێ دا هەروەسا دێ بیتە پرەکا دبلوماسى و گەشێ ب پەیوەندیێن هەرێمێ دگەل دونیایا دەرڤە دەت چونکە ل نەخوشترین دەمێن سیاسى دا ئەو دەرگەهێن گرتى لسەر هەرێما کوردستانێ هاتینە ڤەکرن و ئەڤان دەرگەهان پێویستى ب زێدەکرنێ هەنە و نابیت هەرێم یا دابراى بیت ژوان گورانکاریێن ل دەڤەرێ دروست دبن، دڤێت بو هەر گورانکاریەکا سیاسى و ئابورى و ئەمنى هەرێما کوردستانێ ئامادەکاریێن خو هەبن و یا ڤەدەر نەبیت ژ سیاسەتێن جڤاکێ نیڤ دەولەتى لەورا چاڤەرێ دهێتە کرن قوناغەکا نوى و تازە بو هەرێما کوردستانێ دەست پێ بکەت و هەمى ئەو گرێیێن سیاسى و دبلوماسى دوبارە بهێنە ڤەکرن و ئایندەکێ باشتر چاڤەرێ مە دکەت. 





ئەم هەواڵە 1837جار خوێندراوەتەوە
 
 
ڤیدیۆ گەلەری
چەند بیرۆکەیەک بۆ ڕزگاربوون لە گەرمای ھاوین
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad