English | عربی | Kurdî دواهەواڵ
ڕاستەوخۆ  
 
پەیامی سەرۆك بارزانی لەیادی ئەنفالی بارزانییەكان
2019-07-31 [07:17 AM]

ZNA-هەولێر



بەناوی خودای بەخشندە و دلۆڤان

ئەمڕۆ یادی رۆژێكی تاریكە لە مێژووی گەلەكەماندا. بەر لە سی و شەس ساڵ رژێمی بەعس بەشێوەیەكی دڕندانە هەشت هەزار پیاوی پیر و گەنجی بارزانیی، هەر لە تەمەنی نۆ ساڵی هەتا بەساڵاچووی نەوەد ساڵە، راپێچی بیابانەكانی باشووری عێراق كرد و بەشێوەیەكی نامرۆڤانە كۆمەڵكوژی كردن. 
ئەو تاوانە ئەڵقەیەك بوو لەو زنجیرە كارەسات و قوربانیدانانەی بەسەر رۆڵەكانی گەلی كوردستاندا هاتووە، هەر لە بێسەروشوێنكردنی دوازدەهەزار گەنجی فەیلی و ئەنفالی گەرمیان و كیمیابارانكردنى هەڵەبجە بگرە هەتا تەعریب و راگواستن و پەلاماری تیرۆریستان و تاوان لەدژی خوشك و برا ئێزیدییەكانمان.
ئەگەرچی بەدرێژایی مێژووی خەباتی رزگاریخوازيی گەلەكەمان، تەواوی گەلەكەمان تووشی كارەسات و نەھامەتی بووە، بەڵام دوژمن بەتایبەت رقێكی زۆڕی بەرانبەر بارزان ھەبوو، وەك مەڵبەندی شۆڕش و بەرپەرچدانەوەی داگیركاريی و كانیی رێبازی سەربەخۆییخوازی، لێی ترساون.
دوژمن ھەشت ھەزار بارزانی ئەنفال كرد، بەڵام نەك ھەر نەیتوانی ئەو رێبازە بشكێنێت، بەڵكو تا ئێستاش ئەو رێبازە نوێنەرایەتیی كوردایەتی دەكات.
بەداخەوە، لەكاتێكدا سی و شەش ساڵ بەسەر ئەو تاوانە گەورەیەدا تێدەپەڕێت، ئێستاش ناوە ناوە رەنگداوەی بیری شۆڤینی و ئەنفالچی لە ھەڵسوكەوت و رەفتاری ھەندێ كەس و لایەندا دەبینین، كە ئەوە كێشەی سەرەكیی گەلی ئێمە بووە لەگەڵ حكوومەتە یەك لەدوای یەكەكانی بەغدا.
لەیادی ئەنفالی بارزانییەكاندا، دەمەوێ جەخت بكەمەوە كە یادكردنەوە تەنھا بۆ وەبیرھێنانەوەی ئازارەكان نییە. بۆ ئەوەیە ھەموو تواناكان بۆ ریشەكێشكردنی ئەو ھزرەی ئێمەی ئەنفال كرد بخرێتە گەڕ. بۆ ئەوەیە ویژدانی كۆمەڵی نێودەوڵەتی بەخەبەر بێت و كاتێك تازە وا گۆڕی بەكۆمەڵی ئازیزانمان لە بیابانەكانی عێراق دەدۆزرێنەوە، شەرم لە گەلی ئێمە بكەن و بزانن چ زوڵمێكمان لێ كرا و ئەوان بێدەنگ بوون.

بژی كوردستان
نەمری بۆ شەهیدانی رێگەی ئازادی

مسعود بارزانی
31-7-2019





ئەم هەواڵە 2029جار خوێندراوەتەوە
 
 
ڤیدیۆ گەلەری
چەند بیرۆکەیەک بۆ ڕزگاربوون لە گەرمای ھاوین
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad