English | عربی | Kurdî دواهەواڵ
ڕاستەوخۆ  
 
سندۆقا ڤه‌ژاندنا شنگالێ‌
2019-08-14 [06:08 AM]

نڤیسینا : شێرزاد نایف


ل كوردستان سۆز و په‌یمان و په‌یڤ، مه‌رجێن سه‌رەكی یێن تاكه‌كینمه‌ هه‌كه‌ بھنه‌ گۆتن، ژ لایێ‌ هه‌ر تاكه‌كێ‌ نۆرمال ڤه‌، نه‌مازه‌ هه‌كه‌ ژ لایێ‌ كه‌سه‌كێ‌ به‌رپرسیار ڤه‌، پتر باوه‌ری و دوپاتی ل په‌یڤێن وی دهێنه‌ كرن، سه‌رۆكێ‌ هه‌رێما كوردستانێ‌ نێچیرڤان بارزانی، د سالڤه‌گه‌ڕا پێنجێ‌ یا جینۆسایدكرنا ئێزدیان دا، كو ل ناڤه‌ندا باژێرێ‌ دهۆكێ‌ هاتبوو برێڤه‌برن، راگه‌هاند حوكمه‌تا هه‌رێما كوردستانێ‌ و حوكمه‌تا فیدرالا عیراقێ‌ دڤێت ل سه‌ر ڤێ‌ مژارێ‌ هه‌ماهه‌نگ و هاریكار بن و چاره‌یه‌كێ‌ بۆ ڕه‌وشا شنگالێ‌ ببینن. داخواز دكه‌م كو سندۆقه‌كا ئاڤه‌دانكرنێ‌ بۆ شنگالێ‌ و سنوورێ‌ وێ‌ ده‌ڤه‌رێ‌ بهێته‌ ته‌رخانكرن و UN و جڤاكێ‌ ناڤنه‌ته‌ویی، عیراق و هه‌رێما كوردستان ژی پشكداریێ‌ تێدا بكه‌ن. هه‌روه‌سا حوكمه‌تا عیراقێ‌ ب تایبه‌تی د بۆدجا ساڵا بهێت دا دڤێت گرنگیه‌كا تایبه‌ت ب ئاڤه‌دانكرنا شنگالێ‌ و ده‌وروبه‌رێن وێ‌ بده‌ت.
ب گرنگیه‌كا جودا نێچیرڤان بارزانی ئه‌ڤ مژاره‌ ب ستویێ‌ خوه‌ گرتیه‌ و ئه‌و به‌رێ‌ بنیاتێ‌ وێ‌ په‌یڤینێ‌ هه‌ر هینگی دیار دبیت، ل رێوره‌وسمێن خاكسپاردنا میر ته‌حسین به‌گ دا. و ئه‌ڤرۆ ژی ئه‌و گرنگی و رێزا جه‌نابێ‌ وی ل هه‌موو ئێزدیان دگریت یا دیاره‌، ل هه‌مان په‌یڤا خوه‌ دا ل به‌رامبه‌ر كه‌سوكارێن جانگوری و قوربانیێن ئێزدیان دبێژیت (ئه‌م ب ڕێز و پێزانین ئه‌ڤڕۆ لبه‌ر ئیراده‌ و گیانێ‌ به‌ڕه‌ڤانی و خۆپاراستنا ئێزدیا ڕادوه‌ستین و به‌ژنا خوه‌ دچه‌مینین). جهێ‌ وێ‌ باوه‌ریێ‌ یه‌ كو ژ دل ل سه‌ر جینۆسایدا شنگالێ‌ و ئێزدیان دراوه‌ستیت و هه‌ر ل ده‌سپێكا گۆتار خوه‌ ژی كه‌رمكریه‌، كو ئه‌و د خه‌م و كۆڤان و ژانێن ئێزدیان تێدگه‌هین، هه‌روه‌سا دۆپاتكر، ئێزدیاتی و لالش  و شنگال و شه‌رفه‌دین، ل كوردستانێ‌ ناهێنه‌ جوداكرن.
ته‌رخانكرنا سندۆقه‌كا ب ڤی ره‌نگی و ل گه‌ل ناسناندنا جینۆسایدێ‌ ل گه‌ل چه‌نده‌كا خه‌مخۆریێ‌ ژ لایێ‌ حوكمه‌تێ‌ ڤه‌ و حوكمه‌تا فیدرال و جڤاكێ‌ جیهانێ‌ دێ‌ بیته‌ ده‌رگه‌هه‌كێ‌ باش بۆ بجهئانینا ده‌سپێشخه‌ریا نێچیرڤان بارزانی یا كه‌سێ‌ به‌ری وی پێكێش نه‌كری، كو شنگال ببیته‌ پارێزگه‌هه‌ك، هه‌روه‌كو به‌ری هینگی ژی یا پارێزگه‌هكرنا هه‌لەبجه‌.
ئه‌ڤ ده‌رگه‌هه‌ دێ‌ ده‌رگه‌هه‌كێ‌ ڤه‌كری بیت، چونكو هه‌ر ده‌رگه‌هێ‌ بهێته‌ قوتاندن بۆ ڤێ‌ مژارێ‌ باوه‌رناكه‌م كه‌س لێ‌ ڤه‌نه‌كه‌ت، چونكو میناكا جینۆساید و قوربانبوویا تیرۆرا جیهانی یه‌ یا ده‌ستێ‌ داعش.
هه‌روه‌سا ژی ئه‌ڤ بایه‌خێ‌ مه‌زن یێ‌ جه‌نابێ‌ وی دده‌ته‌ مژارا هه‌نێ‌ دیاردبیت د نه‌مایشكرنا سه‌رژمێریاریان دا كو ئه‌وی ب كه‌سێ‌ خوه‌ ب تێر و ته‌سه‌لی دیاركرین كو د ڤێ‌ جینۆسایدێ‌ دا یا داعشێ‌ ب سه‌رێ‌ ئێزدیا ئینای، د دیرۆكێ‌ دا تشته‌كێ‌ كێم وێنه‌یه‌. ڕۆژێن ئێكێ‌ یێن هێرشێ‌، (1293) ژن و مێر و زارۆك جانگۆری بوون و هه‌موو د گۆڕێن بكۆم دا هاتنه‌ ڤه‌شارتن. هه‌تا نوكه‌ (80) گۆڕێت بكۆم و ب ده‌هان گۆڕێت یه‌ككه‌سی هاتنه‌ دیتن. 
(2745) زارۆك ئێتیم و سێوی مان (3548) ژن و كچ، (2869) زه‌لام و كوڕ هاتنه‌ ڕه‌ڤاندن. دۆرێن (360) هزار ئێزدیا ئاواره‌ بوون. (68) مه‌زار هاتنه‌ په‌قاندن. پتری (100) هزار ئێزدیا كۆچبه‌ری دونیایێ‌ بوون.
ل دووماهیێ‌ ژی گرۆڤه‌یا سه‌رخستن و ڤه‌ژاندن و ئاڤه‌دانكرنا شنگالێ‌ ب فه‌رمان و راسپارده‌كرنا سه‌رۆكێ‌ هه‌رێمێ‌ ب خوه‌ دیار دبیت د میناكا ئاڤاكرنا هه‌ولێرا پایته‌خت ب خوه‌ دا، كو ژ كاڤله‌كی كریه‌ به‌هه‌شته‌ك ل نیڤا عیراقه‌كا كاڤل دا، ل ڤێره‌ برایێن ئێزدی ب خوه‌ جهێ‌ باوه‌ریێنه‌ و هه‌روه‌كو ئه‌وێ‌ قه‌ولا وان یان نێچیرڤان بارزانی بخوه‌ د گۆتارا خوه‌ دا  ئینا یا دبێژیت: ئه‌م ئێزدینه‌ .. سه‌رناڤێ‌ سولتان ئێزینه‌.. ب ئۆل و ئه‌ركانێت خۆ دڕازینه‌.. جابێ‌ بده‌نه‌ كوردستانێ‌.. بلا قایم كه‌ن ئیمانێ‌.. شه‌رفه‌دین میره‌ ل دیوانێ‌.. ئه‌ڤه‌ میرێ‌ ئێزدیان و سه‌رۆكێ‌ هه‌رێمێ‌ ل دیوانا وی یا ئاڤه‌دان ئه‌ڤه‌ هه‌می باوه‌ری و ئیمانه‌ و میناكێن مه‌ ئیناین  هه‌موو ئه‌ڤه‌ ئاماژه‌ك نینه‌ كو شنگال ژی بهێته‌ ئاڤه‌دانكرن و خه‌ملاندن و تشتێ‌ هه‌ژی بۆ لێقه‌ومیان بهێته‌ كرن؟!





ئەم هەواڵە 742جار خوێندراوەتەوە
 
 
ڤیدیۆ گەلەری
چەند بیرۆکەیەک بۆ ڕزگاربوون لە گەرمای ھاوین
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad