English | عربی | Kurdî دواهەواڵ
ڕاستەوخۆ  
 
شه‌رفه‌دین میره‌ ل دیوانێ
2019-08-15 [06:42 AM]

نڤیسینا : كارزان فه‌قى


وه‌لاتێن پرى پێكهاته‌ و بیر و باوه‌رێن جودا، وى ده‌مى دبنه‌ وه‌لاته‌كێ دیموكراسى و دوور ژ توندره‌وى و هزرێن به‌رته‌نگ، ده‌ما دگه‌هنه‌ وێ باوه‌ریێ كو ده‌ستهه‌لات و حكومه‌ت، سه‌ر ب هیچ ژ وان هزر و پێكهاته‌ و بیروباروه‌ران نینه‌، واته‌ ده‌ما ئه‌م پێشكه‌فتنا وه‌لاتێن رۆژئاڤا دبینین، دزانین، كو ده‌ستهه‌لاتا وان ل سه‌ر بنه‌مایێ هزرى و مه‌زهه‌بى نه‌هاتیه‌ هه‌لبژارتن، بۆ نموونه‌ پێشكه‌فتنا وه‌لاته‌كێ وه‌كو فه‌ره‌نسا ژلایێ ئازادیێ ڤه‌ ژ وێ یه‌كێ په‌یدا بوویه‌ كه‌سه‌كێ جوهى ل فه‌ره‌نسا، هه‌ست ناكه‌ت ئه‌وى چ سه‌ركرده‌ و سه‌رۆك نینن چونكى سه‌رۆكێ وى وه‌لاتى كریستیانه‌، به‌لكو هه‌موو پێكهاته‌یێن ناڤا فه‌ره‌نسا تنێ كه‌سه‌كێ ب سه‌رۆكێ خوه‌ ددانن، ژ به‌ركو سه‌رۆك وه‌كى ئێك سه‌ره‌رده‌ریێ ل گه‌ل هه‌موو مرۆڤێن ناڤا سنورێ وه‌لاتێ خوه‌ دا دكه‌ت. بۆ هه‌رێما كوردستانێ ژى ئه‌ڤ گۆتنه‌ راسته‌، چونكى نێچیرڤان بارزانى سه‌رۆكێ هه‌رێما كوردستانێ ل بیره‌وه‌رى و رێوره‌سمێن هه‌موو ئۆل و پێكهاته‌یێن كوردستانێ پشكدار دبیت و د گوتارا وى دا مرۆڤ هه‌ست دكه‌ت كو په‌یره‌وكه‌رێ وى ئۆلى یه‌ كو مه‌راسیم و بیره‌وه‌ریا وانه‌، چونكى ئه‌گه‌ر سه‌رنجێ بده‌ینه‌ سه‌ر گوتارێن نێچیرڤان بارزانى د دوو بیره‌وه‌ریێن بۆرى یێن كوردێن ئێزدى دا، دێ ڤێ راستیێ بینین، یا ئێكێ ده‌ما ته‌رمێ میرێ وه‌غه‌ركرى یێن ئێزدیان میر ته‌حسین به‌گ گه‌هشتیه‌ فرۆكخانا هه‌ولێرێ یا ناڤده‌وله‌تى، نێچیرڤان بارزانى كو وى ده‌مێ سه‌رۆك وه‌زیر بوو، چه‌ندین قه‌ول و به‌یتێن ئێزدیان د ناڤ گوتارا خوه‌ دا گۆتن، ئێك ژ وان: (بنى ئاده‌مۆ هه‌زار سالى ته‌مام كه‌ى، حوكمى ژ شه‌رقێ هه‌تا شام كه‌ى، هه‌ر دێ رۆژه‌كێ ژ كاسا مرنێ تام كه‌ى). ئه‌ڤه‌ بخوه‌ وه‌دكه‌ت كو تاكێ ئێزدى هه‌م هه‌ست بكه‌ت كو سه‌رۆك و ده‌ستهه‌لاتدارێن وان، هه‌رچه‌نده‌ كو نه‌ ژ ئۆلا وانن، لێ ئاگه‌هى ل سه‌ر هه‌یه‌ و دزانن د میتۆلۆژیا ئێزدیخانێ ده‌رباره‌ى روودان و دیارده‌یان چ هاتیه‌. هه‌روه‌سا تاكێ ئێزدى دێ هه‌ست ب ئازادیا و ئۆلى و په‌یره‌وكرنا بیروباوه‌رێن خوه‌ كه‌ت ب ئازادانه‌. ب هه‌مان شێوه‌ د رێوره‌سما پێنچ سالیا كاره‌ساتا شنگالێ كو ل دهۆكێ هاتیه‌ ساخكرن، سه‌رۆكێ هه‌رێما كوردستانێ د ناڤا گوتارێن خوه‌ دوو قه‌ول و سه‌به‌قێن ئۆلا ئێزدیان گۆتن كو ده‌ربرین بوو ژ ئۆلا وان و پێكڤه‌ گرێدانا وان ب كوردستانێ ڤه‌، كو دبێژیت: (ئه‌م ئێزدینه‌، سه‌رناڤێ سولتان ئێزینه‌، ب ئۆل و ئه‌ركێ خوه د‌ رازینه‌، جه‌وابێ بده‌نه‌ كوردستانێ، بلا قایمكه‌ن ئیمانێ، شه‌رفه‌دین میره‌ ل دیوانێ). سه‌ره‌راى وان هه‌موو پشته‌ڤانى و خه‌م خۆریێن نێچیرڤان كو ب كردار و ب گوتار بۆ ئێزدیان دیاركریه‌، ئێك ژ خالێن ب هێز ل ده‌ڤ وى؛ گوتارێن وى پاشخانه‌كا هزرى و ره‌وشه‌نبیرى و ئۆلیا پرى رێزگرتنه‌ بۆ كه‌سێن كو د رێوره‌سمێ دا به‌رهه‌ڤ دبن، چونكى ئاماژه‌كرن ب قه‌ول و سه‌به‌قه‌كا ئۆلا ئێزدیان كو هه‌ردوو په‌یڤێن (ئیمان و كوردستان) دناڤ دابیت، بخوه‌ ده‌رخه‌رێ وێ راستیێ یه‌ كو كوردێن ئێزدى، سه‌ره‌راى 74 فه‌رمانان، به‌رهه‌ڤنه‌بووینه‌ ده‌ست ژ ئۆلا خوه‌ به‌رده‌ن، هه‌م ژى پارێزه‌رێ ره‌سه‌ناتیا گه‌لێ كورد و كوردستانێنه‌ و هیچ ده‌مه‌كى ژ به‌ر ئۆل و ئایینێ وان ژ ئالیێ حكومه‌تا هه‌رێما كوردستانێ سته‌م ل وان نه‌هاتیه‌ كرن و نه‌هاتینه‌ پشتگوهخستن، به‌لكو ئۆل و نه‌ته‌وه‌ و ره‌سه‌ناتیا وان بوویه‌ جهێ پتر رێزگرتنێ ل ده‌ڤ ده‌ستهه‌لاتدارێن هه‌رێما كوردستانێ، لێ ئه‌ڤ هاوكێشه‌ د دیرۆكێ دا به‌روڤاژییه‌ و وه‌كو ئێزدى بخوه‌ ژى ئاما ژى پێ دكه‌ن، ئه‌و دوو جاران دبنه‌ قوربانى، جاره‌كێ ژ به‌ركو ئۆلا وان ئێزدیه‌، جاره‌ك ژى ژبه‌ركو ئه‌و كوردن. 74 فه‌رمانێن خوه‌ ژى هه‌ر بۆ ڤان هه‌ردوو هۆكاران ڤه‌دگه‌رینن، له‌ورا ژى قه‌وله‌كا وان گه‌له‌ك ب رووهنى ئاشتى و ئازادیخوازیا وان و هیڤیا وان بۆ ژیانه‌كا پرى ئارامى دیاردكه‌ت كو دبێژیت: یا سوارێ رۆژهه‌لات و رۆرژئاڤاى، تو بده‌یه‌ خاترا دۆتێ و دادێ، تو مه‌ خلاسكه‌ى ژ قه‌دایا، ژ به‌لایێ، ژ غه‌لایێ.
 ژلایه‌كێ دیڤه‌ ره‌نگه‌ ئه‌و تائیفه‌گه‌ریا ل پارێزگه‌هێن ئیراقێ دناڤبه‌را سوونه‌ و شیعه‌یان هه‌ى، ل ڤێ داویێ چریسكێن وێ گه‌هشتبیته‌ ده‌ڤه‌رێن ئێزدیان ژى، چونكى هه‌بوونا هژماره‌كا زۆر یا هێزان و دانپێنه‌دانا وان ب هه‌ڤدوو، وه‌كریه‌ پشتى ده‌مه‌كێ درێژ ژ رزگاركرنا شنگالێ ژ لایێ پێشمه‌رگه‌یڤه‌، ئه‌و ده‌ڤه‌ر هه‌ر كاڤل و وێران بیت و هیچ ئاڤه‌دانیه‌ك‌ دناڤدا نه‌هێته‌ دیتن، سه‌ره‌راى كو هه‌بوونا گروپێن چه‌كدارى یێن نه‌شه‌رعى بخوه‌ جهێ گومان و دوو دلیێ یه‌ و ئه‌و باوه‌رى ل ده‌ڤ كوردێن ئێزدى دروست ناكه‌ت كو ڤه‌گه‌رنه‌ڤه‌ ده‌ڤه‌رێن خوه‌.





ئەم هەواڵە 2167جار خوێندراوەتەوە
 
 
ڤیدیۆ گەلەری
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
بە ڤیدیۆ.. كاره‌ سه‌خت و نایابه‌كانى چه‌ند كرێكارێك
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad