English | عربی | Kurdî دواهەواڵ
ڕاستەوخۆ  
 
سێ ئەندامی لیژنەی باڵای تاقیكردنەوەكان دووردەخرێنەوە
2019-08-19 [06:30 AM]

ZNA- هه‌ولێر


بە بڕیاری وەزیری پەروەردە، سێ ئەندامی لیژنەی باڵای تاقیكردنەوەكانی پۆلی 12ی ئامادەیی لادەدرێن. سەرۆكی لیژنەی بەدواداچوون بۆ تاقیكردنەوەكانی پۆلی 12ی ئامادەییش دەڵێت قبوڵی ناكەین جارێكی دیكە ئەم هەڵانە دووبارە ببنەوە.

هەڵز ئەحمەد، ئەندامی پەرلەمانی كوردستان و سەرۆكی لێژنەی بەدواداچوون بۆ گرفتی تاقیكردنەوەكانی پۆلی 12ی ئامادەیی  رایگەیاند: "دوای سكاڵای هەزاران قوتابی لە هەڵەی تاقیكردنەوەكان، پەرلەمانی كوردستان لیژنەیەكی لاوەكی بۆ بەدواداچوونی گرفتی تاقیكردنەوەكانی پۆلی 12ی ئامادەیی پێكهێنا كە كاری لەسەر دوو لایەن كرد، یەكەمیان: هۆكارەكانی هەڵەی تاقیكردنەوەكان چی بوون، دووەمیش بەدواداچوون بۆ ئەو هەڵانەی لە تاقیكردنەوەكان كراون". 

لێژنەكە دوای تەواوبوونی كارەكانیان نۆ پێشنیازیان ئاراستەی وەزارەتی پەروەردە كرد، یەكێكیان ئەوە بوو كە هەڵەی زۆر گەورە لە پرسیارەكاندا كراوە و نابێت ئەو كەمتەرخەمییە بەبێ‌ سزا تێپەڕێ‌.

وەزارەتی پەروەردە لەسەر بنەمای راسپاردەكانی لیژنەی پەروەردە چەندین بڕیاری دەركردووە. هەڵز ئەحمەد دەڵێ: "سێ ئەندامی لیژنەی باڵای تاقیكردنەوەكان كە هەڵە لە پرسیارەكانیاندا هەبوو لادران و لە لیژنەی باڵا دوورخرانەوە، ئەوانیش هی وانەكانی كوردی و عەرەبی و ئینگلیزی بوون".

لەبارەی پێشنیارەكانی دیكەش، ئەو پەرلەمانتارە گوتی: "یەكێكی دیكە لە پێشنیارەكان ئەوە بوو كە تاقیكردنەوەكانی خولی دووەم بەئەلیكترۆنی بكرێت و لینكێك هەبێت كە قوتابی هەموو ئەنجامەكانی خۆی ببینێ، وەزیری پەروەردە ئەو پێشنیازەشی قبوڵ كرد، لەم خولەدا هەر قوتابیەك دوای وەرگرتنەوەی نمرەكانی بەشێوەی ئەلیكترۆنی، دەتوانێ وەڵامی پرسیارەكانی لە دەفتەری تاقیكردنەوە ببینێ بەو كۆدەی نمرەكانی پێ وەردەگرێتەوە، بەم شێوەیەش وەڵامی دروستی دەفتەرەكەشی بۆ دێتەوە".

پێشنیازەكانی دیكەی لیژنەكەی پەرلەمان تایبەت بوون بە كەموكوڕی و كێشە لۆجستییەكان لە هۆڵەكانی تاقیكردنەوە و چۆنیەتی مامەڵەی بەڕێوەبەر، مامۆستا و چاودێرەكان لەگەڵ قوتابی و لەبەرچاوگرتنی حاڵەتی دەروونییان. ئەو پەرلەمانتارە گوتی: "ئێمە دوو جار لەگەڵ وەزیری پەروەردە دانیشتووین، بەڵێنی داوە ئەو پێشنیارانەش جێبەجێ بكات، بۆیە لیژنەكەمان لە 20 تا 28ی ئەم مانگە كە تاقیكردنەوەی پۆلە كۆتاكانی تێدا بەڕێوەدەچێت، بەشێوەیەكی مەیدانی بەدواداچوون بۆ جێبەجێكردنی پێشنیازەكان دەكەین".

بەپێی ئامارەكانی بەڕێوەبەرایەتی گشتیی ئەزموونەكانی سەر بە وەزارەتی پەروەردەی حكومەتی هەرێمی كوردستان، بۆ ساڵی خوێندنی 2018-2019 بەگشتی 234 هەزار و 332 قوتابی پۆلی 12ی ئامادەیی و پۆلی 9ی بنەڕەتی و پیشەیی بەشدارییان لە تاقیكردنەوەكاندا كردووە.

كەریم لەتیف، بەڕێوەبەری لیژنەی باڵای ئەزموونەكان بە (رووداو)ی راگەیاند: "هەر گرفتێك لە پرسیارەكان هەبووبێت ئێمە ئامادەین هەڵەكان چاكبكەین و قەرەبووی قوتابیان بكەینەوە، ئەو پێشنیازانەش بۆ خولی دووەمی تاقیكردنەوەكان لە رۆژانی 20 تا 28ی ئەم مانگە بەگرنگی وەردەگیرێن و بەڵێن دەدەین چیدی ئەو هەڵانە دووبارە نەبنەوە".





ئەم هەواڵە 3106جار خوێندراوەتەوە
 
 
ڤیدیۆ گەلەری
چەند بیرۆکەیەک بۆ ڕزگاربوون لە گەرمای ھاوین
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad