English | عربی | Kurdî دواهەواڵ
ڕاستەوخۆ  
 
چارەی بنەڕەتی
2019-09-01 [12:01 PM]

نووسینی: ئاریان فه‌ره‌ج


كەیسەكانی ناكۆكی نێوان هەولێر و بەغدا پەیوەستن بە ژیان و گوزەرانی خەڵك و سەقامگیریی سیاسی و ئابوری و كۆمەڵایەتی هەردوولاوە، بۆیە چارەسەری بنەڕەتی و یەكجاری دەخوازن، چارەی كاتی و نیوەچڵ نە خەڵك و نە دامەزراوەكانی هەرێم بە یەكجاری لە دڵەراوكێ و نیگەرانی رزگار دەكەن و نە بۆ بەغداش خێری تێدایە. 

بۆ نموونە: ناكرێت بابەتی بۆدجە ساڵ بە ساڵ چارەسەر بكرێ و هەمووسەر ساڵێك دیسان بێتەوە مایەی ناكۆكی و كێشمەكێش، ئیستحقاقی پێشمەرگە بەردەوام كەڵەكە بێت و چارەیەك دیار نەبێت. دۆسیەی نەوت و سەرچاوە سروشتییەكان هەتا سەر هەر بە لێكگەیشتنی كاتی ئیدارە بدرێت، گرفتی ناوچە كوردستانییەكان هەر وا بە هەڵپەسێراوی و بێ چارە بمێنێ و وەك پشكۆی ژێر خۆڵەمێش هەركات قابیلی هەڵایسان و ئاگرگرتن بێت. 

ئەگەرچی كەڵەكەبوونی كێشەكان و مانەوەیان بێ چارەسەر بۆ ماوەی چەندین ساڵ، رێگەی چارەی یەكلاییكەرەوەی تا ئەندازەیەك زەحمەت كردووە، بەڵام لە هەمان كاتدا ئێستا ئیرادەیەكی راستەقینە و جددی لە هەرێم و لە بەغداش هەیە بۆ چارەسەر و رێككەوتن، دەستوریش وەك نەخشەڕێ و حەكەم لە بەیندایە، لە هەندێ دۆسیەی وەك ناوچە كوردستانییەكانیشدا، لایەنی نێودەوڵەتییش ئامادەی میانگیری و یارمەتییە، بەرژەوەندی هەرێم و بەغداش تەنها لە رێكەوتندایە، بۆیە دەبێ هەموو ئەم فاكتەرە ئیجابیانە بۆ گەیشتن بە رێكەوتن تەرخان بكرێت بەڵام رێكەوتنێكی بنەڕەتی و یەكجاری لە سەر كۆی دۆسییەكان و بۆ چارەی یەكلاكەرەوەی كۆی كێشەكان. چیتر خۆسەرقاڵكردن بە دۆزینەوەی چارەی كاتی و لێكگەیشتنی كورت خایەن دادی كێشەكان نادات و ئامانجەكان ناپێكێ و خەڵكیش لە دڵەراوكێ قورتار ناكات و دواجاریش نە لە قازانجی هەرێمە و نە عێراق و نە حكومەتی هەردولا. 

خۆشبەختانەش پێدەچێ بڕیاری هەردوو حكومەت گەیشتن بێت بە وەها رێكەوتنێك كە خاڵ لەسەر پیتەكان دابنێ و كۆتایی بە كێشمەكێش و یەكدی خەتاباكردن و لێكنەگەیشتن بهێنێ و هیچ پەراوێزێكیش بۆ مەترسی دوبارە سەرهەڵدانەوەی ئەو ناكۆكییانە لە مەدای نزیكدا نەهێڵێتەوە، هەڵبەت ئەوەش جوهد و تەقەللا و دەستبردن بۆ ووردەكارییەكان و كاتی پێویستی دەوێت تا ئەنجامێكی پتەوی لێ بەرهەم بێت.





ئەم هەواڵە 379جار خوێندراوەتەوە
 
 
ڤیدیۆ گەلەری
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
بە ڤیدیۆ.. كاره‌ سه‌خت و نایابه‌كانى چه‌ند كرێكارێك
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad