English | عربی | Kurdî دواهەواڵ
ڕاستەوخۆ  
 
ھەڵوێست و راسپاردەکانی پەرلەمانی کوردستان لەسەر دۆخی رۆژئاوای کوردستان
2019-10-15 [12:24 PM]

ZNA- هه‌ولێر



١ـ پەرلەمانی کوردستان دژە شەڕە و داوا دەکەین ھەرچی زووە شەڕ و لەشکرکێشی و ململانێی سەربازی کۆتایی پێبھێنرێت و لەبری ئەوەپشتیوانی بژاردەی چارەسەری ئاشتییانەین و دەخوازین لە رێگای دیالۆگەوە کۆتایی بە ناکۆکیەکان بھێنرێت.

٢ـ وێڕای بە توندی ئیدانەکردنی ھێرش و لەشکرکێشی و بە ئامانجگرتن و پەلاماری سەر ھاووڵاتیان، داواکارین سەروماڵ و گیانی خەڵکی سڤیل و دامەزراوە مەدەنییەکان پارێزراو بێت.

٣ـ پەرلەمانی کوردستان لە پێناوی پاراستنی ئاسایش و ئاشتی نێودەوڵەتی، بەرمەبنای ڕێکەوتتنامە نێودەوڵەتیەکان، داوا لە کۆمەڵگای نێودەوڵەتی و نەتەوەیەگرتووەکان و یەکێتی ئەوروپا و رێکخراوە ھەرێمایەتی و نێوەدەوڵەتییەکان دەکات، ھەوڵ و توانایان چڕتر بکەنەوە و گوشارە سیاسی و دیپلۆماسییەکانیان زیاتر بکەن بەئاراستەی کۆتایی ھێنان بەو شەرو لەشکرکێشیەی کە ئیستا لە رۆژئاوای کوردستان ھەیە.
٤- حکومەتی ھەریمی کوردستان رادەسپێرین تاوەکو لە چوارچێوەی تواناکان، بە ھاوکاری و ھەماھەنگی لەگەڵ ریکخراوە نێوەدەوڵەتییەکان ئامادەسازی تەواو بکات بۆ پێشوازی و حەواندنەوەو بە دەمەوە چوونی ئەوپەنابەرانەی کە بەھۆی شەڕو ململانێکانی ئێستای ناوچە جیاجیاکانی رۆژئاوای کوردستانەوە ڕوو لەھەریمی کوردستان دەکەن.

٥- داوا لە سەرۆکی ھەرێمی کوردستان و دامەزراوەی سەرۆکایەتی ھەرێمی کوردستان دەکەین ، وێڕای چرترکردنەوەی ھەولە دیپلۆماسییەکان و ھەماھەنگی لەگەل حکومەتی فیدرال، کاری زیاتربکات بۆ یەکخستنی ھەڵوێستی تەواوی لایەنە سیاسیە بەڕێزەکانی ھەرێمی کوردستان بە ئاڕاستەی پشتیوانیکردن لە بژاردەی ئاشتیانە.

٦- داوا لە حکومەتی عیراقی فیدراڵ دەکەین، ھاوکاری دامەزراوەکانی حکومەتی ھەریمی کوردستان بێت بە دابینکردنی بەشێک لە بودجەی (گواری)بۆ فریاکەوتن و حەواندنەوەی ئاوارەکان، چونکە ھاوکاری و بەدەمەوەچوونی پەنابەری نوێ و ئیدارەدانی ئاوارەو پەنابەرانی ئێستای ناو کامپەکانی ھەرێمی کوردستان ، بارگرانیەکی دارایی گەورە دەخاتە سەر ھەرێمەکەمان و لە تواناکانمان زیاترە.

٧- داوا لە سەرجەم ئەو کونسوڵخانەو نوێنەرایەتیە دیپلۆماسییانەی وڵاتان دەکەین کە لەھەرێمی کوردستانن، حکومەتەکانیان لەو دۆخەی ئیستای رۆژئاوای کوردستان بە وردەکاری رووداوەکانی و لێکەوتە ناوخۆیی و ھەریمایەتی و جیھانییەکانی ئاگادار بکەنەوەو ھەوڵ و توانا و گوشارە دیپلۆماسییەکانیان بۆ ڕاگرتنی شەڕ و ململانێی سەربازی و ماڵوێرانی خەلکی سڤیل و ئاوارە بوونیان، زیاتر بکەن و ھەموو لایەنە ناکۆکەکان بۆ گفتوگۆ و چارەسەری ئاشتی ھانبدەن. ھاوکات داوایان لێدەکەین کە ھاوکاری دامەزراوەکانی حکومەتی ھەریمی کوردستان بن بۆ بەدەمەوە چوونی ئاوارەو پەنابەران.

٨- پەرلەمانی کوردستان ھەڵمەتێکی نیشتمانی بۆ کۆکردنەوەی کۆمەک و پشتیوانی و بەدەمەوەچوونی ئاوارەو لێقەوماوانی رۆژئاوای کوردستان رادەگەینێت و لە روانگەی ئەرکی نیشتمانی و مرۆیی و نەریتی کوردستانیانەمانەوە، داخوازیمان ئەوەیە خەڵکی کوردستان وەک نەریتێکی مرۆڤدۆستانەی کوردستانیانە، ئەوەی لە توانایاندایە لە ریگای ریکخراوە ناوخۆیی و نێوەدەوڵەتییەکان و دامەزراوەکانی حکومەتی ھەرێمەوە ، بەدەم ئاوارەو پەنابەرانەوە بچن . پەرلەمانتارانی کوردستان بەشدارن لەم ھەلمەتە نیشتیمانییە.

٩- پەرلەمانی کوردستان نیگەرانییەکی قوڵی ھەیە لەوەی ئاراستەی رووداوەکان و کاری ھێزەچەکدارە توندرەوەکان بە جۆرێک بن کە دۆخی نەخوازراو و ناھەمواری عەفرین و پیشێلکارییەکانی مافی مرۆڤ و کارە دژە مرۆڤایەتییەکانیان و بە تالان بردنی سەرو ماڵی ھاووڵاتیان و گٶڕینی دیمۆگرافی لە ناوچەکانی دیکەی رۆژئاوای کوردستان دووبارە بکەنەوە. پیویستە ھەموو ھەولەکان بەو ئاراستیە بن کە رێ لەم ھێزە چەکدارانە بگیریت تا دۆخی سەری کانێ و گرێ سپی و کۆبانێ و ناوچەکانی دیکە وەک عەفرین لێ نەکەن.

١٠- گەلی کورد و گەلانی دیکەی سوریا، مافیکی سروشتی و یاسایی و دیموکراسییانەی خۆیانە، لە چوارچێوەی ھەوڵە دیپلۆماسییەکانی چارەسەری دۆخی گشتی سوریا بە ئاراستەی جنێڤ و ئاراستەی ئاستانە و بریارەکانی نەتەوەیەکگرتووەکان تایبەت بە سوریا، لە ھەر ریککەوتنێک بۆ دۆخی سوریای دوای شەڕ ، مافی نەتەوەیی و ھاولاتی بوون و یەکسانی و دادپەروەری لە ئەرک و مافیان لە دەستوری نوێی سوریا و شیوەی حوکمرانی لە چوارچێوەی سوریادا بچەسپێت.

١١-پەرلەمانی کوردستان داوا لەسەرجەم ھێزە کوردستانییەکانی رۆژئاوای کوردستان دەکات، ململانێی حزبی و ئایدیۆلۆژی تەسک بە لاوە بنێنن و قۆناغێکی نویی کاری پیکەوەیی و خەباتی بەرەیی لە سەر بنەمای بەرژەوەندی بالای خەلکی کوردستان لە رۆژئاوای کوردستان دەستپێبکەن و لە سەر بنەمای ئاشتی و دیموکراسی و دیالۆگ و پێکەوە ژیان و وەستانەوە دژی تیرۆر، خەباتی گەلی کوردستان لەرۆژئاوای کوردستان زیاتر پێشبخەن و لاپەرەیەکی نوێ ھەلبدەنەوە.

١٢- پەرلەمانی کوردستان سەرنجی کۆمەلگای نێوەدەولەتی بۆ ئەو راستییە رادەکیشیت کە رووداوەکانی ئەم دواییەی رۆژئاوای کوردستان و کشانەوەی ھیزەکانی ھاوپەیمانی نێودەولەتی و ئەو لەشکرکیشی و ناسەقامگیریەی کە لە چەند ناوچەیەکی رۆژئاوای کوردستان ھاتۆتە ئارا، ھەموو دەستکەوتەکانی شەری تیرۆر و شکاندنی ئەفسانەی داعش لە ناو دەبات و زەمینەی سەرھەڵدانەوەی داعش و تیرۆریستانی دیکە زیاتر دەکات و بەوەش جاریکی دیکە ئاشتی و ئاسایش و سەقامگیری ھەریمایەتی و جیھانی دەکەویتەوە بەر مەترسی.





ئەم هەواڵە 2353جار خوێندراوەتەوە
 
 
ڤیدیۆ گەلەری
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
بە ڤیدیۆ.. كاره‌ سه‌خت و نایابه‌كانى چه‌ند كرێكارێك
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad